1, 2. (a) Ki spiertamento a scapa bida di hopi hende? (Wak e prome plachi.) (b) Ki guia e pueblo di Dios tin cu por scapa nan bida?

“PARA, WAK, SCUCHA.” Mas cu 100 aña pasa na Merca, tabatin borchinan grandi cu e palabranan ey caminda trein tabata pasa. E borchinan ey a scapa bida di hopi hende. A pone nan pa evita cu un vehiculo ta crusa caminda net ora un trein ta acercando cu gran velocidad. Pues, hende cu a obedece e mensahe riba e borchi ey a scapa nan bida.

² Jehova ta haci algo mihor cu pone borchi di spiertamento. Ta comosifuera e ta para dilanti di su pueblo pa spierta nan contra peliger y guia nan riba e caminda cu ta hiba na bida eterno. Y mas importante ainda, e ta manera un wardador di carne amoroso cu ta guia y spierta su carnenan pa nan no coy e mal caminda.—Lesa Isaias 30:20, 21.

3. Con bin e famia humano tabata riba un caminda cu ta hiba na morto?

³ A traves di historia, Jehova a duna hende guia y instruccion specifico. Por ehempel, den e Hofi di Eden, Jehova a  duna Adam cu Eva instruccion cla cu lo por a yuda e famia humano haya felicidad y biba pa semper. (Gen. 2:15-17) Pero tur dos a rechasa e guia di nan Tata amoroso. En bes di obedece Jehova, Eva a scucha e conseho cu a parce di bin for di un colebra. Y Adam, na su turno, a scucha su casa, un simpel hende mortal. Como resultado, nan a hiba un bida yen di sufrimento y a muri sin speransa. Y pa motibo di nan desobediencia, henter e famia humano tabata riba un caminda cu ta hiba na morto.

4. (a) Dicon Jehova mester a duna instruccion nobo despues di e Diluvio? (b) Kico e cambio di circunstancianan a revela tocante e manera cu Dios ta mira bida?

⁴ Den tempo di Noe, Dios a duna instruccion cu lo a conserva bida di hende. Despues di e Diluvio, Jehova a prohibi su sirbidornan di come of bebe sanger. Dicon? Pasobra circunstancianan a cambia. Jehova lo a bay permiti hende come carni di bestia. Pesey, el a duna nan instruccion nobo: “Solamente, boso no mag come carni cu su bida, esta, su sanger.” (Gen. 9:1-4) Cu e mandamento ey Dios a mustra bon cla cu bida ta pertenece na dje. Como Creador y Dunador di bida, e tin derecho di traha ley tocante bida. Por ehempel, el a decreta cu hende no tabatin mag di kita bida di otro hende. Bida y sanger ta sagrado pa Dios, y e lo castiga tur hende cu no obedec’e.—Gen. 9:5, 6.

5. Kico nos lo analisa den e articulo aki, y dicon?

⁵ Den e articulo aki, nos lo analisa algun ehempel cu ta mustra con Dios a sigui duna instruccion a traves di siglonan. Esaki lo fortalece nos determinacion pa sigui e guia di Jehova aworaki y den e mundo nobo.

6. (a) Dicon e Israelitanan tabatin cu obedece e Ley di Moises? (b) Kico nan mester a haci pa Dios bendiciona nan?

⁶ Den tempo di Moises, Jehova a duna su pueblo instruccion cla relaciona cu conducta apropia y adoracion na dje. Dicon? Pasobra circunstancianan a bolbe cambia. Pa mas cu dos siglo, e Israelitanan a biba como catibo na Egipto caminda hende tabata venera morto, adora dios falso y tabata practica cosnan cu ta deshonra Dios. Ora Dios a libra su pueblo for di e tirania di Egipto, nan mester a haya instruccion nobo, y nan lo a bira un nacion dirigi pa e Ley di Jehova. Algun buki di referencia ta bisa cu e palabra Hebreo pa “ley” a bin di un palabra cu ta nifica “dirigi, guia, instrui.” E Ley di Moises tabata manera un muraya cu a proteha e pueblo di Dios contra inmoralidad y religion falso di e nacionnan rond di nan. Ora Israel a scucha di Dios, nan a haya su bendicion, pero ora nan a desobedec’e, nan a sufri consecuencia desastroso.—Lesa Deuteronomio 28:1, 2, 15.

7. (a) Splica dicon Jehova a duna su pueblo instruccion nobo. (b) Den ki manera e Ley tabata manera un tutor pa Israel?

⁷ Pero tabatin un otro motibo pakico e pueblo di Dios mester a haya instruccion nobo. E Ley a señala na un parti importante di Jehova su proposito, esta, yegada di e Mesias, Hesucristo. E Ley a corda e Israelitanan cu nan tabata imperfecto. El a yuda nan compronde tambe cu nan tabatin mester di un rescate, esta, un sacrificio perfecto cu lo a cubri nan picanan. (Gal. 3:19; Heb. 10:1-10) Ademas, e Ley a yuda proteha e liña di descendencia cu a hiba na e Mesias y a yuda e Israelitanan identific’e ora cu lo  el a aparece. Si, e Ley tabata manera un “tutor”, of voogd, cu a guia nan na Cristo.—Gal. 3:23, 24.

8. Dicon nos mester sigui guia di e principionan cu tin den e Ley di Moises?

⁸ Como cristiannan, nos tambe por beneficia di e instruccionnan cu tabatin den e Ley pa e nacion di Israel. Con asina? Mescos cu e spiertamento cu tin riba e borchi, nos por para y wak kico ta e principionan basico di e Ley. Aunke nos no ta cay bou di e Ley mas, nos por uz’e como un guia confiabel den nos bida diario y ora nos ta adora nos Dios santo, Jehova. El a laga skirbi e leynan ey den Bijbel pa nos por siña for di nan, pa su principionan guia nos y pa nos aprecia normanan moral halto. Por ehempel, scucha kico Hesus a bisa: “Boso a tende den pasado: ‘No comete adulterio.’ Pero ami ta bisa boso cu ken cu sigui wak un muher cu pasion, ya caba a comete adulterio cu ne den su curason.” Pues, no solamente nos mester evita di comete adulterio, pero tambe nos mester rechasa tur deseo y pensamento inmoral.—Mat. 5:27, 28.

9. Dicon Jehova mester a duna instruccion nobo?

⁹ Despues cu e Mesias a bin, circunstancianan a bolbe cambia. Pesey, Jehova a duna instruccion nobo y mas detaye tocante su proposito. Na aña 33, el a rechasa e nacion di Israel y a scoge e congregacion cristian como su pueblo.

10. (a) Dicon Jehova a duna e congregacion cristian instruccion nobo? (b) Ki diferencia tin entre e Ley di Moises y e ley di Cristo?

¹⁰ Den e prome siglo, e sirbidornan di Dios cu a bira parti di e congregacion cristian a haya instruccion mas amplio y tambe nobo tocante con pa adora Jehova y hiba un bida cristian. E sirbidornan di Dios devoto ey tabata parti di un pacto nobo. Dios a duna e Ley di Moises na un nacion, esta, Israel natural. Na contraste, Israel spiritual ta consisti di hende di diferente pais y cultura. Manera nos por mira, “Dios no ta haci distincion di persona, sino cu e ta acepta tur hende di tur nacion cu ta tem’e y cu ta haci loke ta corecto.” (Echo. 10:34, 35) Den e Tera Priminti, Israel natural mester a obedece e Ley di Moises cu a ser skirbi riba tabla di piedra. Israel spiritual mester cumpli cu e “ley di Cristo”, cu ta basa riba principionan skirbi riba nan curason. E “ley di Cristo” ta conta pa tur cristian y ta beneficia nan tur, sin importa unda nan ta biba.—Gal. 6:2.

11. Ki dos mandamento importante Hesus a duna?

¹¹ Israel spiritual a beneficia hopi di e guia cu Jehova a duna mediante su Yiu. Un poco prome cu Hesus a cera e pacto nobo, el a duna dos mandamento importante. E prome tabata relaciona cu e trabou di predica, y e otro tabata relaciona cu nan conducta como siguidor di Hesus y nan trato cu otro. E mandamentonan aki a conta pa tur cristian e tempo aya y ta aplica na tur sirbidor di Dios awe, sea cu nan tin e speransa pa bay cielo of pa biba aki riba Tera.

12. Kico a cambia na e trabou di predica?

¹² Laga nos analisa e mandamento cu Hesus a duna su discipelnan pa predica e bon noticia. E manera cu nan lo a predica a cambia, y tambe nan lo mester a predica na mas hende. Siglonan mas prome, hende cu no tabata Hudiu mester a bay Israel pa sirbi Jehova. (1 Rey. 8:41-43) Pero esey tabata prome cu Hesus a duna e mandamento cu nos ta haya na Mateo 28:19 y 20. (Les’e.) Hesus a bisa su discipelnan  pa “bay” cerca tur hende. Na Pentecoste di aña 33 tabata bisto cu awor Jehova tabata kier pa su sirbidornan predica e bon noticia na tur parti di mundo. E cambio ey tabata bisto ora cu spirito santo a baha riba 120 miembro di e congregacion cristian, y den un forma milagroso nan por a papia na diferente idioma cu e Hudiu- y proselitonan. (Echo. 2:4-11) Despues, nan a cuminsa predica na e Samaritanonan. Mas despues, na aña 36, nan a cuminsa predica na esnan cu no tabata Hudiu ni circuncida. Bo por bisa cu nan teritorio a expande for di loke tabata manera un “dam” di hende Hudiu pa un “lama” di hende di tur nacion.

13, 14. (a) Kico e “mandamento nobo” ta encera? (b) Kico nos por siña for di e ehempel cu Hesus a pone?

¹³ Awor, laga nos analisa e di dos mandamento di Hesus. Esey tabata “un mandamento nobo” cu tin di haber cu e manera cu nos mester trata nos rumannan. (Lesa Juan 13:34, 35.) E mandamento aki ta encera mas cu djis stima nos rumannan den nos bida di tur dia. Nos mester ta dispuesto pa hasta muri pa nan. Esaki no tabata un rekisito di e Ley di Moises.—Mat. 22:39; 1 Juan 3:16.

¹⁴ Hesus a pone e mihor ehempel den esaki. El a stima su discipelnan asina tanto cu e tabata dispuesto pa sacrifica su bida pa nan. Y e tabata cla pa haci esey. Anto el a spera cu su discipelnan lo tabata dispuesto pa haci mescos; awe esey ta conta pa nos tambe. Kisas nos lo por haya nos ta sufri y podise hasta muri pa nos rumannan den fe.—1 Tes. 2:8.

15, 16. (a) Con circunstancianan a cambia den nos tempo? (b) Con Dios ta guia nos awe?

¹⁵ Hesus a nombra “e esclavo fiel y prudente” pa duna su siguidornan cuminda spiritual na e debido tempo. (Mat. 24:45-47) E cuminda aki ta inclui instruccion nobo pa ora circunstancianan cambia. Kico ta e circunstancianan actual?

¹⁶ Awe nos ta bibando den “e ultimo dianan”, y djis dilanti porta tin un tribulacion manera no a yega di sosode nunca. (2 Tim. 3:1; Mar. 13:19) Ademas, Satanas y su demoñonan a ser saca for di cielo y benta riba Tera, y nan ta causa hopi ay, of problema, pa humanidad. (Rev. 12:9, 12) Tambe nos a haya e mandamento pa haci un trabou historico y nunca bisto, esta, pa predica na hende di tur idioma rond mundo.

17, 18. Kico nos tin cu haci ora nos haya instruccion nobo?

¹⁷ Ta importante pa nos uza e hermentnan pa predica cu e organisacion di Jehova ta provee. Abo sa uza nan? Na reunion, bo ta presta atencion na e instruccionnan cu nos ta haya tocante con pa uza e hermentnan aki na un manera eficaz? Bo ta mira e instruccionnan aki como guia di Dios?

¹⁸ Pues, manera nos por a mira, pa Jehova sigui bendiciona nos, nos tin cu presta bon atencion na e instruccionnan cu nos ta haya via e congregacion cristian. Si for di awor nos ta dispuesto pa obedece instruccion, lo ta mas facil pa nos sigui instruccionnan durante e “tribulacion grandi”, cu lo elimina e sistema malbado di Satanas completamente. (Mat. 24:21) Despues di esey, nos lo mester haya instruccion nobo pa biba riba un Tera liber di cualkier influencia satanico.

19, 20. Ki bukinan Dios lo habri, y kico lo ta e resultado?

¹⁹ Jehova a duna e nacion di Israel e Ley di Moises pasobra nan tabatin mester di instruccion nobo. Mas despues, e congregacion cristian tambe tabatin  mester di instruccion nobo, y nan a haya esey den e “ley di Cristo.” Di igual manera, Bijbel ta bisa cu Dios lo habri bukinan pa duna nos instruccion nobo den e mundo nobo. (Lesa Revelacion 20:12.) E bukinan aki muy probablemente lo contene rekisitonan specifico cu Dios lo duna humanidad e tempo ey. Ora nos analisa nan, nos tur, incluso esnan cu resucita, lo por haya sa kico ta Jehova su boluntad pa nos. E bukinan aki sigur lo duna nos mas comprondemento di Jehova su manera di pensa. Hende cu lo biba den Paradijs aki riba Tera lo haya mas y mas comprondemento di e Palabra inspira di Dios y di loke e bukinan nobo ta revela. Esaki lo yuda nan trata nan prohimo cu amor, respet y dignidad. (Isa. 26:9) Imagina bo cuanto cos nos lo bay siña y yuda otro hende siña bou di e guia di nos Rey, Hesucristo.

²⁰ Tur hende cu di buena gana ta acepta loke tin “para skirbi den e bukinan” aki lo haya bida eterno. Dios lo skirbi nomber di tur esnan cu keda fiel durante e prueba final permanentemente den “e buki di bida.” Nos tambe por ricibi e privilegio ey. Si nos PARA pa analisa e Palabra di Dios, WAK pa compronde su nificacion y SCUCHA pa obedece e guia di Dios, nos por sobrevivi e tribulacion grandi, y nos lo tin henter eternidad pa siña tocante Jehova, nos Dios sabi y amoroso.—Ecl. 3:11; Rom. 11:33.