Durante un schoolreisje, un par di mucha homber a ser acusa di a agredi sexualmente un compañero di scol. Nan tur tabata bay un scol priva cu ta bon conoci na Canada. Despues di e incidente, Leonard Stern a skirbi den e corant Ottawa Citizen: “Inteligencia, un bon estudio y forma parti di un famia bon para no ta stop hobennan di haci loke ta malo.”

Stern a bisa tambe: “Bo ta verwacht cu mayornan tin como meta principal pa siña nan yiunan loke ta bon y loke ta malo. Pero ta parce cu hopi mayor ta mas preocupa pa nan yiunan siña bon na scol pa despues nan por haya un bon trabou y gana hopi placa.”

Ta berdad cu ta importante pa bay scol. Pero hasta e mihor estudio no ta yuda un hende combati su mal deseo- y inclinacionnan. Pues, ta ki tipo di enseñanza un hende mester pa e haci loke ta bon?

Bijbel ta manera un spiel. Ora nos les’e, nos ta mira nos limitacion- y debilidadnan mas cla. (Santiago 1:23-25) Pero no ta esey so Bijbel ta haci. Bijbel ta yuda nos cambia y cultiva cualidadnan cu ta promove berdadero paz y union, manera bondad, amabilidad, pasenshi, dominio propio y amor. Ta interesante pa mira cu Bijbel ta bisa cu amor ta “e laso perfecto di union.” (Colosensenan 3:14) Dicon amor ta asina special? Wak kico Bijbel ta bisa tocante e cualidad aki.

• “Amor tin pasenshi y ta bondadoso. Amor no ta jaloers, e no ta broma, e no ta halsa su mes, e no ta comport’e indecentemente, e no ta busca su mes interes, e no ta rabia lihe. E no ta keda corda e malo cu hende a hacie. E no ta alegra cu inhusticia [maldad], ma ta alegra cu loke ta berdad. E ta wanta tur cos ... [y] soporta tur cos. Amor no ta caba nunca.”—1 Corintionan 13:4-8.

• “Un hende cu tin amor no ta haci malo cu su prohimo.”—Romanonan 13:10.

• “Riba tur cos, stima otro intensamente, pasobra amor ta tapa un multitud di pica.”—1 Pedro 4:8.

Con bo ta sinti ora bo ta cu hende cu ta stima bo? Safe? Sigur? Trankil? Si, esey ta pasobra bo sa cu nan kier lo mihor pa bo y cu nunca nan lo kier haci bo daño.

Ademas, amor por conmove hende pa haci sacrificio y cambia nan estilo di bida pa otro hende. Por ehempel, ora un homber cu nos lo yama George a bira opa, e tabatin hopi gana di  pasa tempo cu su nieto. Pero e tabatin un problema. George tabata huma masha hopi mes, y su yerno no tabata kier pa e huma ora cu e ta cu e baby. Kico George a haci? Aunke el a huma pa 50 aña largo, el a stop di huma pa su nieto. Bo a mira kico amor por logra?

Tur hende por siña stima. Y mayornan ta den e mihor posicion pa siña nan yiunan esey. Nan ta alimenta y proteha nan yiunan y ta yuda nan ora algo malo pasa cu nan of nan bira malo. Bon mayornan ta papia cu nan yiunan. Tambe nan ta disciplina nan yiunan, locual ta inclui siña nan kico ta bon y kico ta malo. Ademas, bon mayornan ta pone un bon ehempel pa nan yiunan.

Pero lamentablemente tin mayor cu no ta cumpli cu nan responsabilidad. Acaso esey kiermen automaticamente cu nan yiunan lo ta un caso perdi? Claro cu no! Tin hopi adulto, hasta algun cu a lanta den famianan cu yen di problema, cu a haci cambionan grandi den nan bida, y a bira hendenan cariñoso y responsabel. Manera nos lo wak den e siguiente articulo, esey ta inclui algun persona cu hende tabata considera como caso perdi.