“No sea nunca ansha pa e dia di mañan, pasobra e dia di mañan lo tin su mes inkietudnan.”—MATEO 6:34.

Splicacion: Ansiedad ta parti di bida. Pero no preocupa mucho awe pa e dia di mañan pasobra esey ta duna bo mas stress. Purba di no preocupa pa futuro.

• Stress por causa ansiedad. Pues purba esaki: Di prome, reconoce cu bo no por evita di sinti cierto grado di stress. Ora nos ta preocupa tocante cosnan cu nos no por evita, esey por duna nos mas stress. Di dos, corda cu no semper cosnan cu ta preocupa nos ta bay manera nos ta pensa.

“Sabiduria di ariba ta ... rasonabel.”—SANTIAGO 3:17.

Splicacion: Bo no mester ta un perfeccionista. Evita di exigi mucho di bo mes of di otro hende.

• Sea modesto, rasonabel y reconoce bo limitacionnan y esnan di otro hende. Ora bo haci esaki, tanto bo mes como esnan cu ta rond di bo lo haya menos stress y lo ta mas facil pa cos bay mas mihor. Tambe, keda cu un bon sentido di humor. Ora bo hari, hasta si algo bay robes, esey por kita tension y drecha bo beis.

“Esun cu tin un spirito calmo ta un hende di comprondemento.”—PROVERBIONAN 17:27.

Splicacion: Pensamento negativo por stroba bo di pensa bon, pues purba di keda calmo.

• Saca afo kico ta duna bo stress y wak con bo ta reacciona. Por ehempel, ora bo haya stress, wak kico bo ta pensa, sinti y haci. Bo por hasta skirbi nan. Ora bo haya sa con bo ta reacciona ora bo haya stress, esey por yuda bo deal cu ne mas mihor. Tambe, pensa con bo por elimina cosnan cu ta duna bo stress. Y si esaki no ta posibel, pensa kico bo por haci pa e cosnan ey duna bo menos stress. Kisas bo por busca un manera pa mehora bo trabou of uza bo tempo mas mihor.

• Purba di cambia e manera cu bo ta mira cos. Loke ta duna abo stress kisas no ta duna un otro hende stress. E diferencia ta depende di e manera cu bo ta mira cos. Considera e tres sugerencianan aki:

  1. No pensa lihe cu un hende ta haci algo cu mal intencion. Si un hende pasa bo dilanti den rij, bo por pensa cu el a haci esey pa malo y bo por rabia. No ta mas mihor pa pensa cu e no a haci esey pa malo?

  2. Wak e banda positivo di un asunto. Si bo mester warda hopi na un appointment na dokter of na aeropuerto, bo por uza e tempo ey pa lesa of haci trabou of check bo e-mail. Esey lo yuda kita stress un tiki.

  3. Wak mas aleu. Puntra bo mes: E problema aki lo ta un problema grandi mañan of otro siman? Distingui entre asunto serio y asunto menos serio.

“Laga tur cos tuma luga decentemente y na un manera ordena.”—1 CORINTIONAN 14:40.

Splicacion: Purba di ta organisa.

• Nos gusta pa nos bida ta organisa te na cierto grado. Un cos cu por causa desorden y stress ta ora bo pospone loke bo tin cu haci. Esaki por pone cu lo bo keda cu un lista largo di trabou cu no a ser haci. Dicon no purba e dos sugerencianan aki?

  1. Traha un schedule realistico y pega na dje.

  2. Saca afo y corigi cualkier actitud cu ta pone bo pospone loke bo tin cu haci.

“Un man yen di sosiego ta mihor cu dos mokete yen di trabou y coremento tras di biento.” —ECLESIASTES 4:6.

Splicacion: Hende cu ta adicto na trabou por stroba nan mes di ricibi e beneficionan di nan “dos mokete[nan] yen di trabou.” Kisas nan no tin tempo ni energia pa disfruta di loke nan a traha asina duro p’e.

• Nos mester tin un punto di bista balansa di trabou y placa. Ora bo tin mas placa, esey no kiermen cu bo ta mas feliz y cu bo tin menos stress. Ta net lo contrario, pasobra Eclesiastes 5:12 (BPK) ta bisa: “E hende riku ku nunka no tin basta no por drumi trankil.” Pues, purba di no gasta mas di loke bo tin.

• Pone tempo pa relax. Bo ta kita stress ora bo ta haci loke bo ta gusta. Sinembargo, recreo pasivo manera wak television kisas lo no yuda.

• Tene tecnologia na su debido luga. Evita di keda check e-mail, mensahe of bay riba rednan social. Purba di no check e-mail di trabou ora bo no ta na trabou. Haci esey solamente si ta necesario.

“Entrenamento fisico ta yuda.”—1 TIMOTEO 4:8.

Splicacion: Si bo haci ehercicio regularmente, esey ta yuda bo keda saludabel.

• Custumbra di haci ehercicio. Entrenamento fisico por yuda drecha bo beis y yuda bo curpa reacciona mas mihor na stress. Come saludabel y purba come na ora. Haci sigur cu bo ta drumi suficiente.

• No huma, droga of bebe di mas pa kita stress. A largo plaso, esakinan por duna bo mas stress ainda y bo por hasta daña bo salud y gasta e placa cu bo a traha asina duro p’e.

• Si bo ta sinti cu bo no por mas, ta mihor pa bay cerca bo dokter. Bo no mester sinti berguensa pa pidi yudansa profesional.

“Haci sigur kico ta e cosnan mas importante.”—FILIPENSENAN 1:10.

Splicacion: Analisa kico ta bo prioridadnan.

• Traha un lista di e trabounan cu bo tin cu haci den orden di importancia. Esaki lo yuda bo focus riba e trabounan di mas importante y lo yuda bo wak cua trabou bo no mester haci di biaha, cua bo por laga otro hende haci of hasta laga afo.

• Skirbi pa un siman con bo ta uza bo tempo. Despues, busca manera pa haci mihor uzo di bo tempo. Mas control bo tin riba bo tempo, menos stress lo bo sinti.

• Pone tempo pa descansa. Hasta si bo tuma break cortico, esaki por yuda bo haya forsa bek y por yuda bo haya menos stress.

“Ansha den curason di hende ta hacie abati, ma un bon palabra ta hacie contento.”—PROVERBIONAN 12:25.

Splicacion: Un hende amabel cu duna bo un palabra di animacion por laga bo sinti mas mihor.

• Papia cu un hende cu lo compronde bo situacion. Un amigo por yuda bo mira cosnan den un manera diferente of hasta bin cu un solucion cu bo no a pensa ariba. Y djis desahoga bo mes por laga bo sinti mas mihor.

• Pidi yudansa. Bo por pidi un hende haci e trabou cu bo tin cu haci of pa yuda bo cu e trabou?

• Si un hende cu bo ta traha cu ne ta duna bo stress, busca manera pa drecha e situacion. Por ehempel, bo lo por bisa e persona ey, na un manera amabel y cu tacto, con e ta pone bo sinti. (Proverbionan 17:27) Y si esaki no funciona, bo lo por limita e tempo cu bo ta pasa cu ne?

“Feliz ta esnan cu ta consciente di nan necesidad spiritual.”—MATEO 5:3.

Splicacion: Nos mester mas cu djis cuminda, paña y un dak riba nos cabes. Nos tin mester di Dios su guia. Pa nos por ta feliz, nos mester ta consciente cu nos tin mester di Dios y busca su guia.

• Loke por yuda nos hopi ta oracion. Dios ta bisa nos pa “tira tur [nos] inkietud riba dje, pasobra e ta interesa den [nos].” (1 Pedro 5:7) Ora nos ta haci oracion y ta pensa riba cosnan positivo, esey por duna nos paz mental.—Filipensenan 4:6, 7.

• Lesa cosnan cu lo yuda bo hala mas cerca di Dios. E principionan cu e revista aki ta papia di dje ta bin for di Bijbel, un buki cu a ser skirbi pa satisface nos necesidad spiritual. E principionan aki por duna nos “sabiduria practico” y anima nos pa uza nos “capacidad di pensa.” (Proverbionan 3:21, NW) Bo no ta kere cu lo ta bon pa pone meta pa lesa Bijbel? Kisas bo lo por cuminsa cu e buki di Proverbionan.