Awa ta cubri mayoria parti di nos planeta. Sinembargo, segun Organisacion Mundial Meteorologico, “ta solamente 0,5% di awa riba nos planeta ta awa dushi cu nos por uza.” Aunke e cantidad chikito aki ta suficiente pa sostene bida riba Tera, un gran parti di dje ta contamina of no ta accesibel mas pa motibo di demanda y cambio di clima. Algun experto ta premira cu denter di 30 aña, cinco mil miyon hende lo no tin suficiente awa dushi.

Nos planeta tin varios proceso natural cu ta percura pa semper nos tin suficiente awa. Ademas, tera, bida acuatico (organismo bibo den awa) y hasta rayo di solo ta traha hunto pa tene nos awanan limpi. Wak algun evidencia cu ta mustra cu nos planeta a ser diseña pa sobrevivi.

• Investigacion ta mustra cu tera por yuda elimina hopi cos cu ta contamina nos awanan. Den muras, algun mata ta conoci pa elimina nitrogeno, fosfor y pesticida.

• Algun cientifico a identifica varios proceso den naturaleza cu ta yuda purifica awa y ten’e limpi. Corida di awa ta kibra e substancianan cu ta contamina awa y bacteria ta disolve nan.

• Den apenas algun dia, dos tipo di cocolishi di awa dushi (mossel y clams) por elimina for di awa algun substancia kimico cu ta causa daño, y kisas nan ta haci esey hasta mihor cu e plantanan cu ta purifica awa.

• Nos planeta ta warda awa pa medio di e ciclo di awa. E ciclo aki, hunto cu otro proceso natural, ta percura pa awa no sali for di nos atmosfera of disparce.

E expertonan riba e tereno aki ta bisa nos pa nos haci tur loke ta posibel pa conserva awa. Pa reduci contaminacion di awa, nan ta conseha nos pa drecha cualkier lek di zeta cu nos vehiculo tin, no flush remedi cu nos no a uza den w.c. ni basha likido toxico den labamano of baki di laba tayo.

Algun ingeniero a bin cu metodo nobo pa saca salo for di awa (desalinacion). Nan meta ta pa aumenta e cantidad di awa dushi of awa cu hende por bebe.

Pero esey no ta suficiente. Saca salo for di awa no ta un bon solucion pasobra e ta costa hopi placa, y e ta rekeri demasiado energia. Den un informe di 2021 tocante maneho di awa, un fuente di Nacionnan Uni a bisa: “E progreso cu ta tuma luga rond mundo mester bay dos biaha mas lihe.”

“Dios ta evapora gota di awa hiba ariba; e gotanan di awa ta condensa y bira nubia cu ta contene awa. E nubianan, na nan turno, ta laga awa basha, y asina, awasero ta yobe riba tera.”—Job 36:​26-28.

Dios a crea ciclo natural pa proteha nos fuentenan di awa riba Tera.—Eclesiastes 1:7.

Pensa riba esaki: Como cu e Creador a diseña nos planeta di tal manera cu e por tene nos awanan limpi, ta rasonabel pa kere cu e tin e poder y cu e ta dispuesto pa soluciona e problemanan cu hende a causa na nos fuentenan di awa dushi. Wak e articulo “Dios Ta Priminti Cu Nos Planeta Lo Sobrevivi”, na pagina 15.