Dicon Hende No Tin Respet Mas pa Bida?

PLAY

DICON TA IMPORTANTE PA MUSTRA RESPET PA BIDA?

Ora nos haci cos cu ta malo pa nos salud of cu ta pone bida di otro hende na peliger, esey ta mustra cu nos no ta respeta nos mes bida ni bida di otro hende.

Humamento di sigaria no ta djis causa cancer, e ta pone cu ta bira mas dificil pa bo curpa bringa e enfermedad ey. Mas o menos 90 porciento di hende cu ta muri pa motibo di cancer di pulmon ta pasobra e persona mes tabata huma of un persona rond di dje tabata huma.
Ora un tiroteo tuma luga, hopi hende ta keda cu trauma emocional pa varios aña. Un informe di Universidad Stanford ta bisa: “Investigacion ta mustra cu hasta hende cu logra scapa [di tiroteo na scol] sin ningun daño fisico ta keda cu problema emocional y mental cu por afecta nan bida pa hopi aña.”
Hende cu ta core auto bou di influencia di alcohol of droga ta bira un peliger pa otro hende cu ta riba caminda y hasta pa hende cu ta cana canto di caminda. Ora hende no ta mustra respet pa bida, hopi bes ta hende inocente ta sufri daño.

LOKE BO POR HACI

Cuida bo salud. Nunca no ta mucho laat pa stop cu mal habito manera humamento, vaping (un tipo di sigaria electronico), bebemento di mas of uzo di droga. E mal habitonan ey ta afecta bo salud y ta mustra falta di respet pa bida di hende rond di bo, incluso bo famia.

“Laga nos limpia nos mes di tur impureza di carni.”—2 Corintionan 7:1.

Tene cuenta cu siguridad. Pa preveni accidente, haci sigur cu bo cas ta den bon estado. Core auto cu cuidou y haci sigur cu bo auto ta safe pa core. No laga otro hende presiona bo pa participa den actividad cu por causa lesion grave of hasta morto.

“Ora bo traha un cas nobo, traha un rand na bo dak, pa bo no trece culpa di sanger riba bo cas, si un hende cay for di dje.”—Deuteronomio 22:8. a

Sea amabel cu otro hende. Ora nos tin respet pa bida, esey ta influencia tambe con nos ta mira hende di diferente nacionalidad, posicion social y cultura. Dicon? Pasobra prehuicio y odio ta e causa di mayoria violencia y guera cu nos ta mira rond mundo.

“Kita tur tipo di amargura malicioso, rabia, furia, gritamento y papiamento di cos ofensivo for di boso, y tambe tur loke ta perhudicial. Pero bira bondadoso cu otro.”—Efesionan 4:31, 32.

LOKE TESTIGONAN DI JEHOVA TA HACI

Testigonan di Jehova ta siña hende tin un bida saludabel i balansa. Nos curso di Bijbel y reunionnan a yuda hopi hende vence adiccion y stop cu habito cu tabata causa nan daño.

Riba nos proyectonan di construccion, nos ta presta hopi atencion na siguridad. E hendenan cu ta traha como boluntario pa yuda construi nos luganan di adoracion y otro edificio ta haya entrenamento pa evita accidente. Nos edificionan ta ser inspecciona regularmente pa haci sigur cu nan ta cumpli cu e leynan local di siguridad.

Nos ta yuda hende cu pasa den desaster natural. Na aña 2022, nos organisacion a yuda cu mas o menos 200 desaster natural grandi cu a tuma luga rond mundo. Nos a uza casi 12 miyon dollar di placa cu a ser contribui pa duna yudansa na e victimanan di e desasternan ey.

Ora Ebola a cuminsa afecta hopi hende na West Africa (2014) y na Republica Democratico di Congo (2018), nos a siña hende con pa evita di pega cu e maleza mortal ey. Nos a manda algun representante pa papia cu diferente grupo tocante e tema “Obediencia Ta Salba Bida.” Nos a pone un luga pa laba man na entrada di cada un di nos luganan di adoracion. Ademas, nos a enfatisa e importancia di laba man, y nos a splica otro cos practico cu hende por haci pa evita di pega cu e maleza.

Na Sierra Leone, nan a elogia e testigonan di Jehova riba radio pasobra nan a yuda tanto testigonan di Jehova como hende cu no ta testigo di Jehova den e region pa evita di pega cu Ebola.

Un luga pa laba man durante e periodo cu Ebola tabata plamando na Liberia na aña 2014

a Den e antiguo Medio Oriente, e rekisito ey a mustra cu tabata importante pa pensa riba e siguridad di bo miembronan di famia y di otro hende.

SPIERTA!