Teamwork ta nifica cu un esposo cu su esposa ta traha manera un piloto cu su copiloto cu tin e mesun plan di vuelo. Y hasta ora problema presenta, cada un ta pensa no riba “ami” sino “anos.”

PRINCIPIO DI BIJBEL: “Nan no ta dos mas, sino un carni.”—Mateo 19:6.

“Ora bo ta casa, bo no por pensa riba bo so mas. Tanto esposo como esposa mester coopera cu otro pa e matrimonio por bay bon.”—Christopher.

Ora un problema presenta, un esposo cu un esposa cu no ta traha hunto como un team ta inclina na ataca otro en bes di ataca e problema. Y asina un pieu ta bira un baca.

“Teamwork ta sumamente importante den un matrimonio. Si ami cu mi casa no ta traha hunto como team, nos lo ta djis dos hende cu ta biba cu otro den e mesun cas. Y esey lo causa problema ora nos mester tuma decisionnan importante.” —Alexandra.

PUNTRA BO MES:

• Mi ta considera cu e placa cu mi ta gana ta “di mi so”?

• Mi mester ta sin mi casa pa mi por relax completamente?

• Mi no ta worry cu e famianan di mi casa maske e si ta pega cu nan?

PAPIA CU OTRO RIBA LO SIGUIENTE:

• Den ki aspecto(nan) di nos matrimonio nos ta traha bon como team?

• Den ki aspecto(nan) nos por mehora?

• Kico nos por haci pa nos por coopera mas mihor cu otro?

ALGUN SUGERENCIA

• Imagina cu boso ta hungando un wega di tennis contra otro. Ki medida practico boso por tuma pa hunga cu otro den e mesun team en bes di contra otro?

• En bes di pensa “Con ami por gana?” pensa “Con anos por gana?”

“Lubida riba ken tin rason of no. Ta hopi mas importante pa boso tin paz y harmonia den boso matrimonio.”—Ethan.

PRINCIPIO DI BIJBEL: “No busca boso mes interes so, ma tambe interes di otro hende.”—Filipensenan 2:3, 4.