Un persona cu tin perseverancia no ta entrega ora e hay’e cu obstaculo of decepcion. Experencia por yuda un hende haya e habilidad aki. Mescos cu un mucha no por siña cana sin cay, asina tambe e no por bay bon den bida si e no siña enfrenta problema.

Tin mucha ta desanima ora nan haci fout, ora nan enfrenta problema of ora un hende corigi nan. Y tin otronan ta gewoon entrega. Pero ta importante pa nan compronde lo siguiente:

• No ta tur cos nos por haci bon.—Santiago 3:2.

• Nos tur lo enfrenta problema den bida.—Eclesiastes 9:11, NW.

• Si nos no haya coreccion, nos nunca lo por mehora.—Proverbionan 9:9.

Perseverancia por yuda bo yiu pa enfrenta problema cu exito den bida.

Ora bo yiu keda sin logra algo.

PRINCIPIO DI BIJBEL: “Un hende husto ta cay shete bes, y ta lanta atrobe.”—Proverbionan 24:16.

Yuda bo yiu saca afo si un problema ta serio of no. Por ehempel, kico lo e haci si e haya un mal punto pa un proefwerk? Lo e entrega y bisa: “Nada mi no ta haci bon”?

Siña bo yiu pa persevera; yud’e pensa con e por mehora e siguiente biaha. Di e manera ey, lo e purba soluciona su problema y stop di sinti duele di su mes.

Tene cuidou si pa no soluciona e problema ey p’e, pero yud’e pa e mes por soluciona su problema. Bo por puntr’e: “Kico bo por haci pa compronde e les mas mihor?”

Ora algo malo sosode.

PRINCIPIO DI BIJBEL: “Boso no sa con boso bida lo ta mañan.”—Santiago 4:14.

Ningun hende no sa kico lo pasa mañan. Un hende por ta rico awe y bira pober mañan; un hende por ta bon di salud awe y bira malo mañan. Bijbel ta bisa: “No ta hende lihe tin e careda, ni hende fuerte e bataya ... Pasobra tempo y suceso imprevisto ta alcansa nan tur.”—Eclesiastes 9:11, NW.

 Como mayor, bo ta haci tur loke bo por pa proteha bo yiu di peliger. Pero ta imposibel pa proteh’e di tur problema den bida.

Claro cu bo yiu ainda no sa kico kiermen perde un trabou of pasa den problema financiero. Toch bo por siñ’e con pa enfrenta otro problemanan, por ehempel, ora e perde un amigo of ora un famia fayece. *

Ora un hende corigi bo yiu.

PRINCIPIO DI BIJBEL: “Scucha conseho ... pa bo por ta sabi pa resto di bo bida.”—Proverbionan 19:20.

Un hende cu ta corigi bo yiu, no ta haci esey pasobra e kier spanta bo yiu of hacie daño. En realidad e ta yud’e cambia un actitud of conducta cu no ta bon.

Si bo siña bo yiu pa acepta coreccion, boso tur dos ta scapa di hopi tristeza den futuro. Un tata cu yama John a bisa: “Si un yiu no sinti e consecuencia di su foutnan, nunca e ta siña. Y constantemente e lo sali for di den planchi cay den candela y abo lo tin cu scap’e for di e candelanan ey. Esaki ta haci tanto e bida di e mayornan como esun di nan yiunan hopi duro.”

Con bo por yuda bo yiu acepta coreccion di buena gana? Sin importa ta ken a corigi bo yiu—sea na scol of un otro caminda—no bisa cu bo yiu no merece e coreccion ey. En bes di esey, bo por puntr’e:

• “Dicon bo ta kere cu e persona a corigi bo?”

• “Con bo por mehora?”

• “Kico lo bo haci e siguiente biaha cu bo haya bo den e situacion aki?”

Corda cu si un hende corigi bo yiu, esey lo yuda bo yiu, no awor so sino tambe ora e bira grandi.