Ki Efecto Tecnologia Tin Riba Bo Capacidad Mental?
Constantemente hende mester siña, sea ta pa scol, trabou of otro motibo. Tecnologia por yuda nos den esey. Nunca prome den historia tabata asina facil pa haya asina tanto informacion sin cu bo tin cu sali for di bo cas of ni sikiera lanta for di bo stoel.
Sinembargo, hopi hende cu ta uza tecnologia demasiado a ripara lo siguiente:
-
Nan tin dificultad pa concentra ora nan ta lesa.
-
Nan ta ser distrai facilmente.
-
Masha lihe nan ta sinti nan laf ora nan ta nan so.
LOKE TA BON PA BO SA
LESAMENTO
Hende cu ta uza aparatonan electronico hopi no sa tin pasenshi pa lesa henter un articulo of buki. Mas bien, nan ta pasa lihe lihe riba dje pa haya un idea general di loke nan ta lesa.
No ta malo pa lesa algo lihe lihe pa haya un contesta pa un pregunta den pura. Pero esaki no ta un bon manera pa lesa si bo kier compronde algo bon.
PENSA RIBA ESAKI: Bo tin pasenshi pa lesa articulonan largo? Dicon lo bo compronde mihor si bo tuma bo tempo pa lesa algo bon?—PROVERBIONAN 18:15.
CONCENTRACION
Algun hende ta purba di uza tecnologia pa haci dos cos pareu, por ehempel, manda mensahe pa nan amigonan mientras cu nan ta studia. Pero e ora ey nan no ta pone bon atencion na ningun di e dos cosnan cu nan ta haci, y nan lo no haci niun di nan bon, specialmente ora tur dos cos ta rekeri concentracion.
Ta berdad cu ta rekeri esfuerso pa concentra y evita distraccion, pero bo esfuerso lo ta bale la pena. Wak kico un hoben cu yama Grace a bisa: “Lo bo haci menos fout y lo bo haya menos stress. Mi a siña cu ta mihor pa concentra riba un cos y evita e distraccion cu ta bin ora bo haci yen di cos pareu.”
PENSA RIBA ESAKI: Tecnologia ta hacie mas dificil pa bo concentra y corda loke bo ta studia?—PROVERBIONAN 17:24.
ORA BO TA BO SO
Tin hende no gusta ta nan so y pesey nan ta uza tecnologia pa entretene nan mes. Un señora cu yama Olivia a admiti: “Mi ta sinti mi laf si mi keda 15 minuut sin wak mi telefon, tablet of television.”
Sinembargo, ora un persona ta su so e ta haya oportunidad pa pensa of medita. Y esey ta hopi importante ora un persona ta siña, sea e ta hoben of hende grandi.
PENSA RIBA ESAKI: Ora bo ta bo so, bo ta uza e tempo ey pa pensa?—1 TIMOTEO 4:15.
LOKE BO POR HACI
PENSA CON BO TA UZA TECNOLOGIA
Den ki manera tecnologia por yuda bo mehora bo capacidad mental? Con tecnologia por stroba bo di concentra y siña?
PRINCIPIO DI BIJBEL: “Retene sabiduria sano y discrecion [esta, capacidad di pensa].”—PROVERBIONAN 3:21.
You May Also Like
SPIERTA!
Bo Ta Mucho Druk?
Hopi hende ta haya cu ta dificil pa parti nan mes entre trabou y famia. Kico ta e problema? Con por solucion’e?
LOKE HOBENNAN SA PUNTRA
Kico Mi Mester Sa Tocante Multitasking?
Ta posibel enfoca riba varios cos pareu?
