CUANTO celebro bo tin? Si bo contesta cu ta “uno so” bo tin, bo tin rason. Pero bo tin mas cu un sistema nervioso si. Den nos curpa tin un red di neuron cu ta asina extenso cu algun cientifico ta yam’e e “di dos celebro.” Ta trata di e sistema nervioso enterico cu no ta den nos cabes sino principalmente den nos bariga.

Pa nos curpa por comberti cuminda den energia, hopi coordinacion y esfuerso ta necesario. Pesey, ta bon mes cu nos celebro ta traha di tal manera cu e ta laga e sistema nervioso enterico, na moda di papia, dirigi mayoria di e trabounan digestivo.

Aunke e sistema nervioso enterico ta hopi mas simpel cu e celebro, toch e ta sumamente complica. Un hende tin mas o menos 200 pa 600 miyon neuron den su sistema digestivo. Cientificonan ta kere cu si e celebro mester a haci tur loke e sistema nervioso enterico ta haci, e nervionan cu lo e mester tin lo ta demasiado diki. Segun e buki The Second Brain, “ta mas safe y cumbiniente pa laga e [sistema digestivo] zorg pa su mes.”

Ta importante pa por tin diferente mescla di kimico hopi precies na e momento apropia y hiba na e luga corecto pa e sistema digestivo digeri cuminda. Ta pesey, profesor Gary Mawe apropiadamente ta yama e sistema digestivo “un laboratorio kimico.” E procesonan kimico cu ta tuma luga eyden ta increiblemente complica. Por ehempel, e muraya parti paden di e sistema digestivo ta consisti di celnan specialisa cu ta detecta ki tipo di kimico tin den e cuminda cu bo a come. E informacion aki ta yuda e sistema nervioso enterico determina precies ki tipo di enzym ta necesario pa kibra e cuminda den particula cu e curpa por absorba. Ademas, e sistema nervioso enterico ta hunga un papel masha importante den analisa e zuur y otro caracteristicanan kimico di particulanan di cuminda pa asina ahusta e enzymnan digestivo na harmonia cu esey.

Nos por compara e sistema digestivo cu un lopende band na un fabrica cu tin cu funciona principalmente bou di direccion di e sistema nervioso enterico. Bo “di dos celebro” ta zorg pa e musculonan di e murayanan di e sistema digestivo contrae of move pa cuminda por pasa door di dje. Ademas, e sistema nervioso enterico ta zorg pa adapta e cantidad di biaha y con duro e musculonan mester contrae pa e sistema funciona manera un lopende band.

Tambe e sistema nervioso enterico ta supervisa resistencia di bo curpa. E cuminda cu bo ta come probablemente ta contene bacteria cu por haci bo malo. Pesey, no ta nada straño cu un 70 pa 80 porciento di e linfocitonan—un componente principal di bo sistema inmunologico—ta den bo bariga. Si bo ingeri un gran cantidad di organismo cu por haci bo daño, e sistema nervioso enterico ta proteha bo door di causa contraccionnan fuerte cu ta pone bo saca of haya diarea pa bo curpa deshaci di un gran parti di e veneno.

Aunke e sistema nervioso enterico ta funciona independientemente di e celebro, ambos sistema nervioso ta comunica constantemente cu otro. Por ehempel, e sistema  nervioso enterico ta hunga un rol masha importante den regula e hormoonnan cu ta bisa bo celebro ki ora bo mester come y cuanto bo mester come. E ta duna señal na bo celebro ora bo bariga ta yen y por pone bo saca si bo come di mas.

Kisas bo a sospecha caba prome cu bo a lesa e articulo aki cu tin un conexion entre bo sistema digestivo y bo celebro. Por ehempel, bo a ripara cu ora bo come cierto cuminda vet, esey ta drecha bo beis? Investigadornan ta kere cu esaki ta sosode ora bo sistema nervioso enterico ta manda “señal di alegria” pa bo celebro. Y esaki na su turno ta start e proceso cu ta pone bo sinti bo bon. Kisas esey ta splica dicon hende cu tin stress ta haya gana di come algo zoet, salo of vet. Cientificonan ta studiando ki posibilidad tin pa stimula e sistema nervioso enterico na un manera artificial como tratamento pa depresion.

Un otro ehempel di comunicacion cu ta tuma luga entre e celebro y e sistema digestivo ta ora cu bo ta sinti cu bo no por come pa motibo di tension of hopi stress. Ta parce cu ora bo tin hopi stress, e sistema nervioso enterico ta manda e sanger cu tin cu bay na bo stoma un otro caminda. Un otro posibel consecuencia ora bo tin stress ta cu bo por haya gana di saca pasobra bo celebro por pone cu e contraccionnan normal cu bo ta haya den bo tripa ta cambia. Segun algun experto, e conexion cu tin entre bo celebro y bo tripa kisas ta loke ta pone bo haya un “presentimento.”

Aunke e sistema nervioso enterico por influencia bo sintimentonan, e no por pensa ni tuma decision pa bo. Cu otro palabra, e sistema nervioso enterico eigenlijk no ta un celebro. E no por yuda bo compone un cantica, calcula cuanto placa bo tin riba bo cuenta na banco ni haci bo huiswerk pa bo. Toch, e sistema maraviyoso aki ta sigui impresiona cientificonan ya cu e ta sumamente complica y probablemente nan tin hopi cos mas pa siña di dje. Pues e siguiente biaha cu bo ta bay come, para keto un rato y pensa riba tur e procesonan cu ta bay tuma luga den bo sistema digestivo: supervision, analisis, coordinacion y comunicacion.