Bida di Famia y Amistad cu Otro Hende
Pa hopi hende, ta dificil pa mantene un bon amistad cu famia y amigonan. Laga nos considera algun principio di Bijbel cu por yuda nos haya bon amistad cu otro hende.
PENSA RIBA OTRO HENDE
PRINCIPIO DI BIJBEL: “No busca boso mes interes so, ma tambe interes di otro hende.”—Filipensenan 2:4.
LOKE ESAKI TA ENCERA: Lo bo tin bon amistad cu otro hende ora bo ta pensa riba loke abo por haci pa nan y no riba loke nan por haci pa bo. Si bo ta pensa solamente riba bo mes, bo por daña bo amistad cu otro hende. Por ehempel, ora un casa ta pensa riba su mes deseonan so, e lo tin mas chens di bira infiel na su pareha. Ademas, hende lo no kier ta amigo di un persona cu semper ta gaba tocante tur loke e tin y tocante cuanto cos e sa. Pesey, manera e buki The Road to Character ta bisa: “Hende egoista lo haya nan cu hopi problema.”
LOKE BO POR HACI:
-
Yuda otro hende. Bon amigo ta confia otro y semper ta cla pa yuda otro. Segun algun estudio, esnan cu ta yuda otro hende ta sufri menos di depresion y tin mas balor propio.
-
Mustra empatia. Empatia ta e habilidad di hinca bo mes den sapato di un otro persona. Si bo mustra empatia, bo lo no uza sarcasmo ofensivo, esta, haci un chansa cu e intencion di hurt un persona.
Ora bo mustra empatia, ta bira mas facil pa tolera diferencia di opinion y comportacion. Y esey por yuda bo evita prehuicio y yuda bo haya amistad cu hende di diferente cultura of background.
-
Pasa tempo cu otro hende. Mas tempo bo pasa cu otro hende, mas lo bo siña conoce nan. Si bo kier haya un bon amigo, bo mester papia cu ne tocante cosnan cu e ta interesa den dje y cu ta importante p’e. Esey kiermen cu ta importante pa bo ta un bon scuchado y pa bo mustra interes den e preocupacionnan di bo amigo. Un estudio reciente ta bisa cu “hende cu tin combersacion profundo cu otro ta mas feliz.”
SCOGE BON AMIGO
PRINCIPIO DI BIJBEL: “Mal compania ta daña bon custumber.”—1 Corintionan 15:33.
LOKE ESAKI TA ENCERA: Hende cu bo ta asocia cu ne lo por tin un bon influencia of un mal influencia riba bo. Sociologonan tambe ta reconoce esey. Por ehempel, nan ta bisa cu un persona cu pasa hopi tempo cu esnan cu ta huma of cu ta divorciando, probablemente lo cuminsa huma of lo kier divorcia.
LOKE BO POR HACI: Bira amigo di hende cu tin cualidad y norma y balor cu bo ta admira of lo kier imita. Por ehempel, asocia cu hende cu ta prudente, respetuoso, generoso y hospitalario.
OTRO PRINCIPIONAN DI BIJBEL
Wak video basa riba Bijbel cu ta pa yuda parehanan casa, teenager y mucha pa mehora nan bida di famia
NO BISA COS PA HURT OTRO HENDE.
“Tin hende ta papia sin pensa, manera hinca di spada.”—PROVERBIONAN 12:18.
SEA GENEROSO.
“E hende generoso lo prospera.”—PROVERBIONAN 11:25.
TRATA OTRO HENDE MESCOS CU ABO KIER PA NAN TRATA BO.
“Tur loke boso kier pa hende haci cu boso, boso tambe mester haci cu nan.”—MATEO 7:12.
