PRINCIPIO DI BIJBEL: “Esun cu no ta rabia lihe ta mihor cu e [hende] poderoso.”—Proverbionan 16:32.

LOKE ESAKI TA ENCERA: Ta hopi bon si nos siña domina nos emocionnan. Nos tur por rabia de bes en cuando, pero loke no ta bon ta si nos perde cabes. Y a keda comproba cu un hende cu perde cabes hopi biaha ta bisa of haci cos cu despues e ta lamenta.

LOKE BO POR HACI: Siña controla bo rabia prome cu e controla bo. Tin hende ta pensa cu ora un hende explota di rabia, esey kiermen cu e ta un hende fuerte, pero eigenlijk e ta un hende debil. Bijbel ta bisa: “Esun cu no tin dominio riba su spirito ta manera un stad basha abou, sin muraya.” (Proverbionan 25:28) Un bon manera pa controla nos rabia ta door di busca pa sa kico a pasa prome cu nos bisa of haci algo. Pesey Bijbel ta bisa: “Prudencia di un hende ta haci cu e no ta rabia lihe.” (Proverbionan 19:11) Y ta bon pa nos scucha tur dos banda di medaya, ya cu esaki por yuda nos compronde e situacion y keda calmo.

PRINCIPIO DI BIJBEL: “Mustra cu boso ta agradecido.”—Colosensenan 3:15.

LOKE ESAKI TA ENCERA: Ta ser bisa cu ta hende agradecido so por ta feliz. Hasta hende cu a sufri un perdida hopi grandi ta reconoce cu esey ta berdad. Nan ta bisa cu loke a yuda nan deal cu nan emocionnan tabata e echo cu nan tabata agradecido pa loke ainda nan tin en bes di enfoca riba loke nan a perde.

 LOKE BO POR HACI: Tur dia, traha un lista di e cosnan cu bo ta agradecido p’e. Esakinan por ta cosnan chikito manera un bunita subida di solo, un bon combersacion cu nos tabatin cu un hende cu nos stima of e simpel echo cu nos tin un dia mas di bida. Si bo pensa riba e cosnan aki y ta agradecido pa nan, lo bo sinti bo mas feliz.

Algo cu por yuda bo hopi ta ora bo ta pensa riba bo famia y amigonan y dicon bo ta agradecido na nan. Pensa kico bo ta gusta di nan y bisa nan esey, sea personalmente, mediante un carta, un e-mail of un mensahe via telefon. Di e manera aki, bo ta fortalece bo amistad cu nan y lo bo sinti e felicidad di haci bon cos pa otro hende.—Echonan 20:35.

EVITA DISCUSION.

“E cuminsamento di pleito ta manera ora dam kibra; pesey, laga e asunto para, prome cu e rementa.”​—PROVERBIONAN 17:14.

NO PREOCUPA DEMASIADO PA FUTURO.

“Pues no sea nunca ansha pa e dia di mañan, pasobra e dia di mañan lo tin su mes inkietudnan. Cada dia tin su mes problemanan.”​—MATEO 6:34.

PENSA PROME CU BO ACTUA.

“Capacidad di pensa mes lo vigila bo, discernimento mes lo proteha bo.”​—PROVERBIONAN 2:11, NW.