PRINCIPIO DI BIJBEL: “Ningun hende hamas a odia su mes curpa; ma e ta aliment’e y trat’e cu masha cariño.”—Efesionan 5:29.

LOKE ESAKI TA ENCERA: E principio di Bijbel aki ta anima nos pa haci tur loke nos por pa cuida nos salud fisico. Un informe ta mustra cu hopi problema cu salud tin di haber cu un hende su estilo di bida. Pesey, hende cu ta scoge bon por tin mihor salud.

LOKE BO POR HACI:

• Come Saludabel. Scoge alimento saludabel pa come y corda bebe suficiente awa.

• Haci Ehercicio. Sea cual sea bo edad, ta bon pa bo salud si bo haci ehercicio, hasta si bo tin un limitacion fisico of un maleza cronico. Bo famia y profesionalnan riba tereno di salud por duna bo sugerencia y animacion pa bo haci ehercicio, pero finalmente tur cos ta keda den bo man.

• Drumi Suficiente. Ora un hende tin custumber di drumi poco, e por haya problema serio cu su salud. Hopi hende cu no ta drumi suficiente ta dicidi di haci otro cos en bes di drumi. Pero hende cu ta drumi suficiente ta scoge un bida mas saludabel.

PRINCIPIO DI BIJBEL: “Laga nos limpia nos mes di tur impureza di carni y di spirito.”—2 Corintionan 7:1.

LOKE ESAKI TA ENCERA: Nos ta beneficia masha hopi mes ora nos no ta contamina nos curpa cu  substancianan dañino manera sigaria y siga, cu ta un di e causanan principal di maleza y morto.

LOKE BO POR HACI: Dicidi ki dia lo bo kier stop di huma y marca e fecha ey riba bo kalender. Un poco prome cu e fecha ey, deshaci di tur sigaria, asbak, lighter y cualkier otro cos cu tin di haber cu e bicio. No bay na luganan caminda hende ta huma. Y bisa famia y amigonan cu bo a dicidi di stop di huma pa nan por apoya bo.

TRAHA SAFE.

“Ora bo traha un cas nobo, traha un rand [of, muraya] na bo dak, pa bo no trece culpa di sanger riba bo cas, si un hende cay for di dje.”​—DEUTERONOMIO 22:8.

NO RABIA LIHE.

“Esun cu no ta rabia lihe tin gran comprondemento, ma esun cu ta rabia lihe ta halsa bobedad.”​—PROVERBIONAN 14:29.

NO COME DI MAS.

“No anda cu esnan cu ta ... golos.”​—PROVERBIONAN 23:20.