Dicon Ta Importante pa Sa si Tin un Creador

PLAY

Ta haci un diferencia si bo sa cu tin un Creador of no? Si e evidencianan a convence bo cu un Dios todopoderoso ta existi, kisas lo bo tin gana di mira e evidencianan cu ta mustra cu ta Dios a inspira Bijbel. Y si bo ta confia loke Bijbel ta bisa, lo bo por haya e siguiente beneficionan.

Lo bo disfruta mas di bida

LOKE BIJBEL TA BISA: “[Dios] a haci bon, dunando boso awasero for di cielo y tempo di bon cosecha, y asina a laga boso haya cuminda na abundancia y a yena boso curason cu alegria.”—Echonan 14:17.

LOKE ESAKI TA NIFICA: Tur loke bo ta disfruta di dje den naturaleza ta un regalo di e Creador. Lo bo ta mas agradecido ainda pa e regalonan ey ora bo haya sa cuanto e Creador ta interesa den bo.

Haya bon conseho cu lo yuda bo awor

LOKE BIJBEL TA BISA: “Lo bo sa kiko ta nifiká: ta un hende rekto, biba un bida bon den bista di Dios i di hende, trata tur hende sin haci distinshon. E ora ei lo bo sa kon bo tin ku biba.”—Proverbionan 2:9, BPK.

LOKE ESAKI TA NIFICA: Como bo Creador, Dios sa loke bo tin mester pa ta feliz. Ora bo lesa Bijbel, bo por siña hopi cos cu por yuda bo den bo bida.

Haya contesta pa bo preguntanan

LOKE BIJBEL TA BISA: “Lo bo ... descubri e conocemento di Dios.”—Proverbionan 2:5.

LOKE ESAKI TA NIFICA: Si bo sa cu tin un Creador, bo por haya contesta pa pregunta importante, manera: Kico ta e proposito di bida? Dicon tin asina tanto sufrimento? Kico ta pasa cu nos ora nos muri? Bo por haya contesta satisfactorio den Bijbel.

Bo por tin speransa pa futuro

LOKE BIJBEL TA BISA: “‘Mi sa e plannan cu mi tin pa boso’, SEÑOR ta declara, ‘plannan pa paz y no pa calamidad, pa duna boso un futuro y un speransa.’”—Jeremias 29:11.

LOKE ESAKI TA NIFICA: Dios ta priminti cu den futuro lo e elimina maldad, sufrimento y hasta morto. Ora bo confia den Dios su promesanan, bo speransa pa futuro lo duna bo e curashi cu bo tin mester pa trata cu bo problemanan.

WAK KI BENEFICIO ALGUN HENDE CU TA KERE DEN UN CREADOR A HAYA

“Semper mi ta keda impresiona ora mi mira con Dios ta yuda nos den asina tanto aspecto di bida. E ta yuda nos sa kico ta mas importante den bida, con pa trata cu hende y con pa bira su amigo.”—Cyndi, Merca.

“Como cu mi ta kere den un Creador, mi tin un bida dushi y cu proposito. Nunca mi no ta sinti mi laf, pasobra semper mi por siña mas tocante Dios, su creacion y su Palabra.” —Elise, Francia.

“Ora mi aplica loke nos Creador ta siña nos for di Bijbel, mi ta mas feliz. E ta yuda mi ta menos critico, mas atento y mas satisfecho. Ademas, e ta yuda mi pa ta un mihor tata.”—Peter, Hulanda.

“Prome cu mi a siña tocante Dios, mi tabata djis come, drumi y lucha pa yega trabou na tempo. Mi no tabata disfruta di bida. Awor mi ta mira bida como un regalo maraviyoso cu nos mester balora y disfruta di dje.” —Liz, Estonia.

“Mi ta un hende cu ta preocupa hopi. Como cu mi sa cu lo bay tin un fin na maldad, inhusticia y sufrimento, esey ta yuda mi trata cu mi preocupacionnan.”—Adrien, Francia.

Testigonan di Jehova

Dicon Ta Importante pa Sa si Tin un Creador

Lo bo disfruta mas di bida

Haya bon conseho cu lo yuda bo awor

Haya contesta pa bo preguntanan

Bo por tin speransa pa futuro

You May Also Like

E Caminda Cu Ta Hiba na Felicidad—⁠Proposito den Bida