• Bo yiu ta comporta su mes na un manera hopi halsa, anto pa colmo ta dies aña so e tin.

• E kier pa tur hende trat’e manera un rey.

Por ta bo ta puntra bo mes: Ta kico a pas’e? Mi kier pa e ta contento cu su mes, pero mi no kier pa e sinti cu e ta mihor cu otro hende.

Acaso ta posibel pa siña bo yiu pa e ta humilde sin cu e ta perde balor propio?

Durante e ultimo decadanan, mayornan a ser anima pa malcria nan yiunan, elogia nan tur ora, hasta ora nan no a haci nada cu merece elogio, y pa no corigi nan ni disciplina nan. Nan tabata pensa cu si bo pone bo yiunan sinti cu nan ta special, nan lo lanta cu balor propio. Pero kico tabata e consecuencia? E buki Generation Me ta bisa: “En bes di lanta yiunan stabiel y feliz, e movemento di balor propio a crea un ehercito di mucha egoista.”

Hopi hende cu na mucha constantemente a haya elogio, no por enfrenta decepcion, critica ni fracaso ora nan bira adulto. Y como cu nan a siña enfoca riba nan mes deseonan, ta masha dificil pa nan forma un amistad duradero cu otro hende ora nan bira adulto. Como consecuencia hopi di nan ta sufri di ansiedad y depresion.

Loke cu realmente ta yuda un yiu haya un sintimento di balor propio ta ora e mes logra algo, y no pasobra un hende ta bis’e henter ora cu e ta special. Pues, e mester kere den su mes. Pero no ta esey so, e tin cu siña cierto habilidadnan, aplica loke e ta siña y mehora. (Proverbionan 22:29) Tambe e mester siña mustra interes den e necesidad di otro hende. (1 Corintionan 10:24) Pa e logra tur esey, e mester ta humilde.

Duna bo yiu elogio ora e merece esey. Si bo yiu muher haya un bon punto na scol, elogi’e pa esey. Si e haya un mal punto, no culpa e maestro di scol automaticamente. Asina bo no ta siña bo yiu pa e ta humilde. Ta mas mihor pa yud’e mira con e por mehora e siguiente biaha. Anto elogi’e ora cu di berdad e logra algo bon.

Corigi bo yiu ora ta necesario. Esey no kiermen cu bo mester critica bo yiu cada bes cu e haci un fout. (Colosensenan 3:21) Pero foutnan grandi si bo mester corigi. Y mescos ta conta ora e tin un actitud robes; si bo no corigie, ta bira mas dificil pa e cambia.

Por ehempel, supone cu bo yiu homber tin tendencia di gaba. Si bo no corigie, lo e por bira halsa y hende lo cuminsa aleha di dje. Pues splica bo yiu cu si e gaba, hende lo haya un mal impresion di dje y lo e por pasa berguensa. (Proverbionan 27:2) Splic’e tambe cu si e tin un punto di bista balansa di su mes, e lo no tin mester di cana bisa hende kico e ta bon aden. Si bo duna bo yiu e tipo di coreccion ey cu amor, bo ta siñ’e pa e ta humilde sin cu e ta sintie humilia.—Principio di Bijbel: Mateo 23:12.

Prepara bo yiu pa enfrenta realidad. Si bo cumpli cu tur bo yiu su deseonan, esaki por pon’e pensa cu e mester haya tur cos. Pues, si bo yiu, por ehempel, kier algo cu bo no por cumpra, splic’e dicon ta importante pa bo no gasta mas di loke bo tin. Si bo tin cu cancela un vakantie of un buitendag, splica bo yiu cu dado momento nos tur lo keda decepciona den e bida aki, anto kisas lo bo por bis’e kico ta yuda abo ora bo ta decepciona. En bes di proteha bo yiu di tur problema, prepar’e pa enfrenta desafio ora cu e bira grandi.—Principio di Bijbel: Proverbionan 22:6.

Anim’e pa duna. Laga bo yiu mira cu “tin mas felicidad den duna cu den ricibi.” (Echonan 20:35) Con bo por haci esey? Traha un lista hunto cu bo yiu di hende cu no por haci compras, cu no tin transportacion of cu mester di yudansa pa drecha algo na cas. Y ora bo ta bay yuda algun di nan, bay cu bo yiu cerca nan. Laga bo yiu mira con contento abo ta sinti ora bo ta yuda hende. E mihor manera pa siña bo yiu pa e ta humilde ta mediante bo ehempel.—Principio di Bijbel: Lucas 6:38.