Te awor, nos a trata algun detaye cu a contesta e pregunta, Ken Dios ta? Nos a mira den Bijbel cu e nomber di Dios ta Jehova y cu su cualidad di mas importante ta amor. Nos a considera tambe kico el a haci den pasado y kico lo e haci den futuro pa beneficia henter humanidad. Aunke cu tin hopi mas pa siña tocante Dios, kisas bo ta puntra bo mes ki beneficio lo mi saca si mi siña conoce Dios.

Jehova ta priminti cu “si bo busc’e, e lo laga bo hay’e.” (1 Cronicanan 28:9) Imagina e regalo maraviyoso cu lo bo haya ora bo busca Dios y siña conoc’e: “Un amistad [pega] cu ne.” (Salmo 25:14, NW) Kico un amistad asina por nifica pa bo?

Berdadero felicidad. Bijbel ta bisa cu Jehova ta “e Dios feliz.” (1 Timoteo 1:11) Si bo hala cerca Dios y imit’e, esey lo duna bo berdadero felicidad cu lo beneficia bo emocionalmente, mentalmente y fisicamente. (Salmo 33:12) Ademas, lo bo por tin un bida feliz door cu bo ta evita estilo di bida cu por causa daño, ta cultiva bon custumbernan y ta mantene un bon relacion cu otro hende. Sigur lo bo ta di acuerdo cu loke e salmista a bisa: “Ta bon pa mi keda cerca di Dios.”​—Salmo 73:28.

Dios lo mustra interes personal den bo. Jehova a priminti su sirbidornan: “Lo mi conseha bo; mi wowo ta riba bo.” (Salmo 32:8) Esey kiermen cu Jehova ta mustra interes personal den su sirbidornan y ta duna cada un di su sirbidornan loke nan tin mester. (Salmo 139:1, 2) Ora bo cultiva un bon relacion cu Jehova, lo bo ripara cu e semper t’ey pa bo.

Un futuro maraviyoso. Jehova no solamente lo yuda bo haya berdadero felicidad awor, sino e lo haci posibel tambe pa bo haya un futuro maraviyoso. (Isaias 48:17, 18) Bijbel ta bisa: “Pa haya bida eterno, nan tin cu siña conoce bo, e unico Dios berdadero, y esun cu bo a manda, Hesucristo.” (Juan 17:3) Den e temponan dificil aki, e speransa cu Jehova ta duna nos ta manera un anker cu ta “sigur y tambe firme.”​—Hebreonan 6:19.

Esakinan ta djis algun di e motibonan importante pa siña conoce Dios mas mihor y pa cultiva un bon amistad cu ne. Si bo ta desea esey, bo por tuma contacto cu un testigo di Jehova. Of, bo por bishita nos website jw.org/pap-x-paa pa haya mas informacion.