Pa hopi siglo, epidemia a causa morto di miyones di persona pasobra ningun hende tabata sa con maleza contagioso ta plama. Cu tempo, cientificonan a haya sa e berdad. Nan a descubri cu microorganismo manera bacteria y virus ta causa hopi maleza. E descubrimento ey a yuda preveni y trata hopi maleza, y miles di miyones di hende por biba mas largo y mas saludabel.

Kico di otro preguntanan importante manera esnan menciona akibou? Bo ta kere cu si bo haya sa e berdad tocante e preguntanan aki, esey lo cambia bo bida?

• Ken Dios ta?

• Ken Hesucristo ta?

• Kico e Reino di Dios ta?

• Kico ta spera nos den futuro?

Miyones di hende a haya contesta riba e preguntanan ey y nan bida a mehora. E contesta riba e preguntanan ey por tin un bon efecto riba bo bida tambe.

Kisas bo ta puntra bo mes: Acaso ta posibel pa haya sa e berdad tocante cualkier cos? Al fin y al cabo, dia pa dia ta bira mas dificil pa haya sa si algo ta berdad of no. Dicon esey ta asina?

Wel, hopi hende no tin confianza cu gobiernonan, negoshinan ni medionan di comunicacion ta papia berdad. Nan ta haya cu ta dificil pa saca afo si loke ta ser bisa ta berdad, djis un opinion, mitar berdad of si ta mentira. Como cu hende no ta confia otro y hopi informacion ta incorecto, hende no ta di acuerdo cu otro encuanto kico realmente ta berdad y kico esey ta nifica pa nan.

A pesar di e retonan ey, toch ta posibel pa haya contesta confiabel pa e preguntanan di mas importante den bida. Con? Na e mesun manera cu nos ta busca contesta pa otro preguntanan.

Di un of otro manera, hende ta busca e berdad tocante cierto cos tur dia. Ban wak e ehempel di Jessica. El a bisa: “Mi yiu muher no tin mag di come pinda. Su alergia ta asina severo cu un cantidad masha chikito di proteina di pinda por mat’e.” Pesey Jessica mester check bon si e cuminda cu e ta cumpra ta safe pa su yiu muher. El a sigui bisa: “E prome cos cu mi ta haci ta lesa e labelnan di e comestibelnan cuidadosamente pa wak kico ta e ingredientenan. Despues mi ta haci mas investigacion y hasta mi ta yama e fabrica pa haci sigur cu no tin risico cu e producto por ser contamina cu pinda. Ademas, mi ta dobel check cu fuentenan confiabel si e manera cu e compania ta handle alimento ta safe.”

Kisas e preguntanan cu abo ta purba di haya contesta p’e no ta asina importante manera esnan di Jessica. Pero bo por uza e siguiente metodo cu Jessica a uza pa bo haya contesta pa cualkier pregunta cu bo por tin:

• Busca pa sa tur dato.

• Haci investigacion adicional.

• Haci sigur cu bo fuentenan ta confiabel.

E metodo aki por yuda bo haya contesta pa e preguntanan di mas importante den bida. Ban wak con.

Ora Jessica tabata buscando e berdad den Bijbel, el a uza e mesun metodo cu e ta uza pa haci sigur cu e alimento cu e ta cumpra no ta contamina cu pinda. El a bisa: “Mi a lesa na un manera cuidadoso y haci bon investigacion pa mi haya e berdad den Bijbel.” Miyones di hende a haci loke Jessica a haci pa investiga loke Bijbel ta siña tocante e siguiente preguntanan:

• Kico ta e proposito di bida?

• Kico ta pasa cu nos ora nos muri?

• Dicon nos ta sufri?

• Kico Dios ta haciendo pa caba cu sufrimento?

• Con nos por tin un bida di famia feliz?

Bo por haya contesta confiabel pa e preguntanan ey y pa cualkier otro pregunta si bo lesa Bijbel y haci investigacion adicional online riba www.pr418.com.