TUR aña, mas cu seis miyon hende ta biaha bay den un mondi aisla di palo di seda na e peninsula di Shima, Japon. Nan ta bay na e Gran Santuario di Ise, caminda mas cu dos mil aña caba hende ta adora e diosa shinto di solo cu yama Amaterasu Omikami. Prome, e hendenan ey ta laba nan man y boca pa purifica nan mes. Despues, mientras cu nan ta para dilanti di e sala di adoracion di e santuario, nan ta haci e siguiente ritual: nan ta buig, klap man y resa na e diosa. * E religion shinto ta permiti su miembronan practica otro religion. Ademas, algun budista, esnan cu ta yama nan mes cristian y otro hendenan no ta haya cu ta malo pa participa den e ritualnan di shinto na e santuario aki.

Hopi di e religionnan grandi na mundo tin santuario, * y miyones di hende ta bishita nan. Den paisnan cu ta considera nan mes cristian, tin hopi misa y santuario cu hende a dedica na Hesus, Maria y e santonan. Ademas, hende a establece santuarionan na luganan caminda sucesonan biblico of supuesto milagernan a tuma luga recientemente of caminda nan ta warda relikianan religioso. Hopi hende ta bay na e santuarionan aki pasobra nan ta kere cu tin mas chens cu nan oracionnan lo ser scucha na un luga sagrado. Pa otro hende, ora cu nan ta yega na un santuario, esey ta final di un biahe largo di peregrinacion cu nan a haci pa demostra cu nan ta personanan devoto.

Pero, ta berdad cu tin mas chens cu Dios ta tende y contesta oracionnan haci na un santuario? Dios ta keda contento cu hende cu ta haci biahenan di peregrinacion na santuarionan? Ademas, cristiannan mester adora Dios na un santuario? E contesta pa e preguntanan aki lo mustra nos con nos mester mira adoracion na santuario y lo yuda nos compronde e clase di adoracion cu realmente ta agrada Dios.

Un combersacion cu Hesus tabatin cu un muher Samaritano ta mustra kico Dios ta pensa di adoracion cu hende ta haci na luganan sagrado of santuario. Ora Hesus tabata biaha door di Samaria, el a para pa sosega na un pos cerca di e stad di Sicar. El a cuminsa papia cu un señora cu a bin eynan pa saca awa for di pos. Segun cu nan tabata papia, e señora a mustra e diferencia grandi cu tabatin entre e Hudiunan y e Samaritanonan. E señora a bis’e: “Nos antepasadonan a adora Dios riba e sero aki; pero boso ta bisa cu ta Jerusalem ta e luga caminda hende mester ador’e.”—Juan 4:5-9, 20.

 E sero cu e señora tabata papia di dje tabata Sero Gerizim, cu tabata keda 50 kilometer noord di Jerusalem. Un tempo, e Samaritanonan tabatin un tempel riba e sero ey unda nan tabata celebra fiestanan manera e Pasco Hudiu. Sinembargo, en bes di enfoca riba e diferencianan cu tabatin entre nan, Hesus a bisa e señora: “Kere mi: Lo yega e ora cu ni riba e sero aki ni na Jerusalem boso lo no adora e Tata.” (Juan 4:21) Esey tabata un comentario straño, specialmente biniendo for di un Hudiu. Dicon hende lo stop di adora Dios na e tempel na Jerusalem?

Hesus a sigui bisa: “Lo yega e ora, y ta awor, cu e adoradornan berdadero lo adora e Tata cu spirito y cu berdad, pasobra, en realidad, e Tata ta busca esnan cu kier ador’e asina.” (Juan 4:23) Pa hopi siglo, e Hudiunan a considera e magnifico tempel di Jerusalem como e centro di nan adoracion. Tres bes pa aña nan tabata bay eynan pa haci sacrificio na nan Dios, Jehova. (Exodo 23:14-17) Pero Hesus a bisa cu tur esaki lo a cambia y cu “adoradornan berdadero” lo adora Dios “cu spirito y cu berdad.”

E tempel hudiu tabata un edificio literal na un luga geografico specifico. Pero ora Hesus a papia di spirito y berdad, e no tabata referi na algo material ni na un luga specifico. Pues, Hesus a splica cu adoracion berdadero lo no a depende di ningun edificio of luga, sea cu ta riba Sero Gerizim, na e tempel na Jerusalem of cualkier otro luga sagrado.

Den e combersacion cu Hesus tabatin cu e Samaritano, el a papia tocante “e ora” cu e cambio den e manera di adora Dios “lo [a] yega.” Na ki tempo esey lo a tuma luga? E ora a yega ora Hesus, pa medio di su morto como sacrificio, a pone un fin na e sistema Hudiu di adora Dios cu tabata basa riba e Ley di Moises. (Romanonan 10:4) Pero Hesus a bisa tambe: “E ora ... ta awor.” Dicon? Pasobra como e Mesias, ya caba el a scoge discipelnan cu lo a obedece e siguiente mandamento: “Dios ta un Spirito, y esnan cu ta ador’e mester ador’e cu spirito y cu berdad.” (Juan 4:24) Pero, kico Hesus tabata kiermen cu adora Dios cu spirito y cu berdad?

Hesus no tabata papiando tocante e grado di entusiasmo cu hende ta mustra ora nan adora Dios. Mas bien, e tabata kiermen cu nos mester laga e spirito santo di Dios guia nos pa, entre otro, yuda nos compronde Bijbel. (1 Corintionan 2:9-12) Y e berdad cu Hesus a referi na dje ta e conocemento  exacto di siñansanan di Bijbel. Pesey, pa Dios aproba nos adoracion, no ta e luga ta e cos mas importante, sino cu nos adoracion ta di acuerdo cu loke Bijbel ta siña y cu nos ta laga e spirito santo guia nos.

Con cristiannan mester mira biahenan di peregrinacion y adoracion na un santuario? Wel, ora nos tene cuenta cu e mandamento di Hesus cu adoradornan berdadero mester adora Dios cu spirito y cu berdad, nos ta mira claramente cu adoracion na un santuario of luga sagrado no tin ningun balor special pa nos Tata den cielo. Ademas, Bijbel ta bisa kico Dios su punto di bista ta tocante veneracion of adoracion di imagen. E ta bisa: “Huy di idolatria” y “keda leu for di dios falso.” (1 Corintionan 10:14; 1 Juan 5:21) Pesey, un cristian berdadero lo no adora Dios na ningun luga cu hende ta considera como santo of cu ta promove idolatria.

Sinembargo, esaki no ta nifica cu e Palabra di Dios ta prohibi hende di tin un luga special pa haci oracion, studia of medita. Un luga di reuni cu ta ordena y digno ta bon pa siña y trata asuntonan spiritual. No ta robes tampoco pa traha algo pa recorda un persona cu a fayece, manera plachi graba pa pone riba un graf. Kisas esaki ta simplemente un muestra di cariño of pa recorda e difunto. Pero, si un hende ta considera un luga asina como santo of ta venera imagen of relikia na un luga asina, esey lo bay contra loke Hesus a bisa.

Manera nos por a mira, no ta necesario pa nos bay na un santuario pa Dios scucha nos oracion. Tampoco Dios lo no keda contento of duna nos un bendicion special si nos haci un biahe di peregrinacion na un santuario. Bijbel ta bisa cu Jehova Dios, e “Señor di cielo y Tera, no ta biba den tempel cu man di hende a traha.” Pero esey no ta nifica cu Dios ta leu for di nos. Unda cu nos ta nos por haci oracion na dje, y e lo scucha nos pasobra “e no ta masha leu for di cada un di nos.”—Echonan 17:24-27.