Jose, un carpinte di Nazaret, tabata tata di crianza di Hesus. Pero ken tabata tata di Jose? E genealogia di Hesus den e Evangelio di Mateo ta menciona un tal Jacob, mientras cu esun di Lucas ta bisa cu Jose tabata “yiu di Heli.” Dicon tin dos diferente nomber?—Lucas 3:23; Mateo 1:16.

E relato di Mateo ta bisa cu “Jacob tabata tata di Jose.” E expresion Griego cu a ser uza aki ta indica bon cla cu Jacob tabata e tata biologico di Jose. Pues, Mateo a registra e genealogia di e famia di Jose. E registro aki ta mustra cu Jose tabata un heredero legitimo di e trono di David, un derecho cu a pasa pa Hesus, esta, Jose su yiu di crianza.

Di otro banda, e relato di Lucas ta bisa: “Jose, yiu di Heli.” E palabranan “yiu di” ta un expresion cu por ser interpreta como “yerno di.” Lucas 3:27 ta un otro ehempel di esey. Eynan, Sealtiel, kende su tata biologico tabata Jeconias, ta ser menciona como “yiu di Neri.” (1 Cronicanan 3:17; Mateo 1:12) Ta parce cu Sealtiel tabata casa cu un yiu muher di Neri, kende su nomber Bijbel no ta menciona, y asina a bira yerno di Neri. Den e mesun sentido, Jose tabata “yiu” di Heli debi cu el a casa cu Heli su yiu muher Maria. Pues, Lucas ta registra e liña di descendencia di Hesus “segun carni”, via di Maria, su mama biologico. (Romanonan 1:3, BS) Pues, Bijbel ta duna dos liña di descendencia di Hesus cu nos por siña hopi for di dje.

Den Medio Oriente di antiguedad, tabata comun pa hende uza lana di carne, di cabrito y di camel como tela. E tela mas uza ta­bata wol, y hopi biaha Bijbel ta papia di carne, pelamento di ­carne y paña di wol. (1 Samuel 25:2; 2 Reynan 3:4; Job 31:⁠20) Na Egipto y Israel, hende tabata cultiva mata di lino cu nan tabata uza pa traha linen. (Genesis 41:42; Josue 2:⁠6) E Israelitanan den tempo di Bijbel podise no tabata cultiva catuna pero e Scritura ta menciona cu na Persia si hende tabata uza e material aki. (Ester 1:​6, NW ) Seda tabata un tela costoso y di luho cu kisas comerciantenan biahero so tabata importa for di Lehano Oriente.​—⁠Revelacion 18:​11, 12.

E buki Jesus and His World ta bisa: “Tabatin wol na un variedad di color natural, for di color blanco te bruin scur.” Ademas di esey, hopi biaha hende tabata tiña wol. Hende tabata saca un tiña biña cu tabata hopi caro for di cierto cocolishi di lama. Tambe nan tabata uza diferente mata, raiz, blachi y insecto pa traha tiña di colornan manera cora, geel, blauw y preto.