IMAGINA cu bo ta wak un pelicula di un mucha muher famoso; laga nos bisa di un musico cu bo ta admira. E pelicula ta cuminsa tempo cu e tabata chikito. Bo ta mira con e ta bay les di muziek y ta practica masha hopi mes. Despues bo ta mir’e ta duna concierto, biaha rond mundo y haya fama internacional. No ta dura hopi cu e ta bira bieu, y na final di e pelicula, e ta muri.

Esaki ta un storia real di un persona cu ya no ta existi mas. No ta importa si e tabata un artista, un cientifico, un atleta of cualkier otro persona famoso. Basicamente e storia lo ta mescos. Kisas e persona a logra hopi cos durante su bida, pero probablemente bo ta puntra bo mes ta cuanto mas lo e por a logra si e no a bira bieu y muri.

Lamentablemente, esey ta loke ta spera nos tur. (Eclesiastes 9:5) Ni maske kico nos haci, nos no por logra scapa di biehes y morto. No esey so, diripiente nos por perde nos bida pa motibo di un maleza cruel of un accidente. Ta manera Bijbel ta bisa, nos ta manera neblina cu “ta aparece pa un rato y despues ta disparce.”—Santiago 4:14.

Como cu nos por muri na cualkier momento, algun hende tin e pensamento: “Laga nos come y bebe, pasobra mañan nos ta muri.” (1 Corintionan 15:32) Pero bo no ta di acuerdo cu hopi hende ta biba asina pasobra nan no tin speransa pa futuro y sa cu nan por muri cualkier momento? Nos tur, tardi of trempan, lo haci nos mes e pregunta: E bida aki so tin? Nos lo haci e pregunta ey specialmente ora nos ta pasando den un situacion cu ta causa nos hopi dolor. Na unda nos por haya e contesta?

Hopi hende ta pensa cu cientificonan por haya e contesta. Progreso riba tereno di ciencia y dokternan a haci posibel cu nos por biba mas largo. Y algun cientifico ta purbando pa nos por biba mas largo ainda. Sea cu nan logra esey of no, e preguntanan aki ta keda: Dicon nos ta bira bieu y muri? Tin speransa cu algun dia nos enemigo morto lo no t’ey mas? E siguiente articulonan lo analisa e topiconan aki y contesta e pregunta: E bida aki so tin?