Esey ta un deseo irealistico? Claro cu no! Bijbel ta bisa cu Dios a hinca e deseo ey den nos curason. (Eclesiastes 3:11) Bijbel ta bisa tambe cu “Dios ta amor.” (1 Juan 4:8) Cu esey na mente, bo ta kere cu ta logico cu Dios lo duna nos un deseo cu nunca lo bira realidad?

Ningun hende no kier muri. Pesey Bijbel ta bisa cu morto ta un “enemigo.” (1 Corintionan 15:26) Tin hende ta biba largo, otronan ta biba cortico, pero tardi of trempan nos tur ta muri. Hopi hende no gusta pensa riba morto, y hasta nan tin hopi miedo di muri. Pero algun dia e enemigo aki lo ser venci?

Bo tabata sa cu nunca tabata Dios su proposito pa hende muri? E buki biblico di Genesis ta duna prueba cu Dios tabata kier pa hende biba pa semper riba Tera. Jehova Dios a traha e Tera cu tur loke hende tin mester pa hiba un bida feliz. Despues el a crea e prome hende, Adam, y a pon’e den un paradijs, un hofi den Eden. Anto “Dios a mira tur loke el a traha, y ata, tur cos tabata masha bon.”—Genesis 1:26, 31.

Adam a ser crea den imagen di Dios; e tabata un hende perfecto. (Deuteronomio 32:4) Adam su  esposa, Eva, tambe tabata sin ningun clase di defecto mental y fisico. Jehova a bisa nan: “Sea fructifero y multiplica, y yena e Tera y haci esaki somete na bo; y goberna riba e piscanan di lama y riba e parhanan di cielo, y riba tur ser bibo cu ta move riba Tera.”—Genesis 1:28.

Pa yena e Tera cu nan descendientenan lo a tuma tempo. Eva lo mester a haya yiu, y su yiunan lo mester a haya yiu te ora henter e Tera lo a bira habita manera tabata Dios su proposito. (Isaias 45:18) Bo ta kere cu ta logico cu Jehova lo a duna nan e mandato ey si nan lo a biba djis pa mira nan yiunan, nietonan y kisas nan bisanietonan?

Awor, pensa un rato riba e trabou cu Adam a haya di pone e bestianan somete nan mes na dje. Adam mester a duna e bestianan nomber, esey sigur lo a tuma tempo. (Genesis 2:19) Ademas, pa e por a domina e bestianan, lo e mester a observa nan pa e por a haya sa con pa cuida nan. Esey sigur lo a tuma mas tempo ainda.

Pues, e instruccion cu Dios a duna Adam cu Eva pa yena e Tera y domina e animalnan ta indica cu e prome pareha a ser crea pa biba hopi tempo. Y ta berdad cu Adam a biba hopi largo.

Bijbel ta bisa cu un tempo hende tabata biba hopi mas largo cu nos ta biba actualmente. E ta bisa: “Tur e dianan cu Adam a biba tabata 930 aña.” Despues e ta menciona seis hende homber mas cu a biba mas cu 900 aña: Set, Enos, Cainan, Jared, Matusalen y Noe. Nan tur a biba prome cu e Diluvio den tempo di Noe, kende tabatin 600 aña ora e Diluvio a tuma luga. (Genesis 5:5-27; 7:6; 9:29) Con bin nan a biba asina largo?

Tur e hombernan ey a biba hopi cerca di e tempo cu hende tabata perfecto. Probablemente esey ta e motibo cu nan a biba asina largo. Pero ki relacion tin entre perfeccion y biba largo? Y con morto lo ser venci? Pa contesta e preguntanan ey, nos mester compronde prome dicon nos ta bira bieu y muri.