Profeta Moises a bisa cu si nos obedece Dios su mandamentonan, nos lo haya Dios su bendicion. (Deuteronomio 10:13; 11:27) Nos no ta obedece Dios pasobra nos tin miedo di haya castigo di dje. Dios su bunita cualidadnan ta motiva nos pa stim’e y evita di haci cualkier cos cu por pon’e bira tristo. “Pasobra amor pa Dios ta nifica cu nos ta cumpli cu su mandamentonan.”—1 Juan 5:3.

Pero ki bendicion nos lo ricibi si nos obedece Dios? Laga nos papia riba dos beneficio.

“Ami ta SEÑOR bo Dios, kende ta siña bo, pa bo prospera, kende ta guia bo den e caminda cu bo mester cana.”—ISAIAS 48:17.

Jehova Dios, nos Creador, conoce nos y ta duna nos e guia cu nos tin mester. Si nos kier pa Dios su siñansa yuda nos tuma decision sabi, nos mester siña for di e Santo Scritura kico Dios kier pa nos haci y despues haci loke e ta bisa.

“Feliz ta esnan cu ta tende e palabra di Dios y ta cumpli cu ne!”—LUCAS 11:28.

Actualmente, miyones di hende cu ta cumpli cu e Palabra di Dios ta echt feliz. Laga nos wak un ehempel di un hende homber di Spaña. E tabata rabia hopi lihe y tabata trata hende malo, hasta su propio esposa. Un dia, el a lesa den e scrituranan loke Profeta Moises a bisa di e yiu di Jacob cu yama Jozef, kende no tabata rabia lihe. Ora a bende Jozef como esclavo y a ser’e den prizon inhustamente, e no a rabia, el a keda trankil y hasta a pordona. (Genesis, capitulo 37-45) E meneer aki di Spaña a bisa: “Ora mi medita riba Jozef su ehempel, esey ta motiva mi pa no rabia lihe, pa ta amabel y mustra dominio propio. Como resultado, awor mi tin un bida feliz.”

E Santo Scritura ta duna mas guia tocante con nos mester trata otro hende. Laga nos wak mas detaye den e siguiente articulo.