Mi mama tabatin 17 aña ora mi a nace na 1960. Prome cu mi a nace, ya mi tata a bay laga nos. Ami cu mi mama tabata biba cerca mi welanan na Burg, un pueblito cu ta situa na loke antes tabata Republica Democratico di Alemania, of Oost Alemania. Mescos cu hopi otro hende, nos tabata ateista y Dios no tabata nifica nada pa nos.

Segun cu mi tabata crece, mi welo tabata gusta pasa tempo cu mi. Nos tabata haci hopi cos hunto. Por ehempel, e tabata manda mi subi palo pa corta rama. Mi tabata gusta aventura tempo mi tabata mucha. Mi bida tabata masha dushi y sin ningun preocupacion.

Un dia, tempo mi tabatin shete aña, algo masha teribel a pasa cu mi. Mi a caba di cuminsa mi di dos aña na scol. Na caminda pa cas, mi a subi un palo di coriente y ora mi tabata na un haltura di ocho meter, coriente a dal mi y manda mi leu. Ora mi a spierta, mi tabata den hospital y mi no por a sinti mi brasanan. Nan tabata asina kima y e heridanan tabata asina teribel cu e dokternan mester a amputa nan pa evita cu mi sanger lo a venena. Manera lo bo por imagina, mi mama y mi welanan a keda hopi kibra. Pero como mucha, mi no a echt compronde con esaki lo a bay afecta mi bida.

Despues cu mi a sali for di hospital, mi a bay scol bek. Na scol, e muchanan tabata tenta mi, pusha mi y hasta tira cos riba mi pasobra mi no por a defende mi mes. Nan comentarionan cruel a pone mi na berguensa y a haci mi hopi dolor. Despues di esaki, nan a manda mi un scol na Birkenwerder cu tabata manera un internaat pa mucha cu tin limitacion fisico. Como cu e scol tabata hopi leu for di cas, mi mama y mi welanan no por a afford pa bishita mi. Ta den vakantie so mi tabata wak nan. E siguiente dies añanan, mi a crece sin mi mama y mi welanan.

Mi a siña haci hopi cos cu mi pianan. Bo por imagina bo kico kiermen uza bo tenchinan pa come cu un forki of cuchara? Di un manera of otro mi a bira habil den esey. Tambe mi a siña skeiro djente y peña cabey cu mi pia. Hasta ora mi ta papia cu hende mi a cuminsa haci gesto cu mi pianan. Kiermen, mi pianan a bira manera mi mannan!

Tempo mi tabata teenager, mi tabata gusta lesa cuenta di ciencia ficcion. Tin bes mi tabata  imagina cu mi tabatin brasa di tecnologia avansa cu ta permiti mi haci tur cos. Tempo mi tabatin 14 aña mi a cuminsa huma pasobra mi tabata pensa cu esaki lo a laga mi sinti mi sigur di mi mes y cu mi ta mescos cu tur otro hende. Ta comosifuera mi tabata bisa: “Si, mi tambe por haci esey. Hende cu ta huma ta hende grandi, sea nan tin brasa of no.”

Mi tabata tene mi mes ocupa cu diferente actividad social. Mi a hasta bira miembro di e asina yama Hubentud Aleman Liber, un organisacion socialista di hobennan cu gobierno tabata sponsor. Mi tabata traha como secretario, cu tabata un posicion respeta entre e miembronan local. Tambe mi a join un club di canto, mi tabata skirbi poema y tambe participa den deporte pa hende cu limitacion fisico. Despues di un stage, mi a cuminsa traha na un compania den mi pueblo. Segun cu mi tabata crece, mi tabata bisti mi protesisnan mas y mas pasobra mi kier a sinti mi manera un hende completo.

Un dia mi tabata warda na stacion di trein pa mi bay trabou, anto un homber a acerca mi. El a puntra mi si mi por imagina cu un dia Dios lo duna mi mi brasanan bek. Mi a keda un poco asombra. Di mes mi tabata kier mi brasanan bek! Pero pa mi esey tabata dificil y imposibel pa kere. Como un ateista, mi tabata convenci cu Dios no ta existi. For di e momento ey, mi a busca un manera pa evita e homber ey.

Algun tempo despues, un colega di trabou a invita mi pa bay bishita su famia. Ora nos tabata bebe koffie, su mayornan a cuminsa papia tocante Dios, Jehova. Pa prome bes den mi bida mi a tende cu Dios tin un nomber. (Revelacion 4:11) Pero, den mi mes, mi a rechasa e idea aki y a pensa: No por tin un Dios, sin importa ki su nomber ta. Mi ta bay mustra e hendenan aki cu nan ta robes. Sigur di mi mes, mi a acepta un curso di Bijbel. Pero, pa mi sorpresa, mi no por a proba cu Dios no ta existi.

Segun cu nos tabata analisa profecianan di Bijbel, pocopoco mi creencianan ateista tabata bira menos fuerte. Mi a bin siña cu hopi profecia a cumpli caba aunke nan a ser skirbi cientos of hasta miles di aña prome. Un biaha, nos a compara e manera cu mundo ta aworaki cu loke tin para na Mateo capitulo 24, Lucas capitulo 21 y 2 Timoteo capitulo 3. Mescos cu un combinacion di sintoma por yuda un dokter haci un diagnosis corecto di un pashent su maleza, asina tambe e combinacion di e sucesonan menciona den e profecianan aki a yuda mi mira cu nos ta bibando den loke Bijbel ta yama “e ultimo dianan.” * Mi a keda asombra. Cu mi propio wowonan mi a mira cumplimento di e profecianan aki.

Mi tabata convenci cu loke mi tabata siña ta e berdad. Mi a cuminsa haci oracion na Jehova y a stop di huma aunke cu mi tabata huma pisa pa mas cu un decada. Mi a sigui cu mi curso di Bijbel pa mas o menos un aña. Dia 27 di april 1986, mi a batisa den secreto den un badkuip pasobra e  tempo ey testigonan di Jehova tabata prohibi na Oost Alemania.

Pa motibo cu Testigonan tabata prohibi na Oost Alemania, nos tabata reuni den gruponan chikito na casnan priva, y mi tabata conoce solamente algun Testigo. Riba un dia, na un manera inespera, mi a haya permiso di autoridad di gobierno pa mi biaha bay West Alemania caminda testigonan di Jehova no tabata prohibi. Pa prome biaha den mi bida, mi por a asisti na un congreso basa riba Bijbel y por a mira miles di mi ruman homber- y muhernan cristian. Esey tabata un experencia unico.

Despues cu e Muraya di Berlin a cay, testigonan di Jehova no tabata prohibi mas na Oost Alemania. Finalmente, nos tur por a adora Jehova libremente. Pues mi kier a dedica mas tempo den e trabou di predicacion. Pero mi tabatin berguensa pa combersa cu otro hende. Mi tabata sinti mi menos cu otro hende debi na mi limitacion fisico, y tambe pasobra mi a pasa mi hubentud den un internaat pa mucha cu limitacion fisico. Pero, na 1992 mi a purba di predica 60 ora pa luna. Mi a experencia hopi goso y a bay asina bon cu mi a dicidi di sigui haci esaki tur luna pa casi tres aña largo.

Semper mi ta tene na mente e palabranan di Bijbel cu ta bisa: “Ken ta debil sin cu mi tambe ta sinti mi debil?” (2 Corintionan 11:29) A pesar di mi limitacion fisico, ainda mi tin mi mente y mi stem. Pues mi ta haci mi best pa yuda otro hende. Como cu mi no tin mi brasanan, mi ta compronde pa otro hende cu tin limitacion fisico. Mi sa kico kiermen sinti cu bo tin masha gana di haci algo cu gewoon bo no por haci. Mi ta purba di anima esnan cu ta sinti asina. Mi ta hopi contento cu mi por yuda otro hende di e forma aki.

Mi tin cu admiti cu tin biaha mi ta sinti mi deprimi. Simplemente mi kier ta un persona completo. Mi por haci hopi cos riba mi mes, pero nan ta costa mi hopi mas tempo, esfuerso y energia cu normal. Mi dicho di tur dia ta: “Pa tur cos mi tin forsa pa medio di esun cu ta duna mi poder.” (Filipensenan 4:13) Tur dia Jehova ta duna mi e forsa cu mi tin mester pa mi haci e cosnan normal di tur dia. Mi a siña cu Jehova no ta stop di yuda mi. Pesey, hamas lo mi kier stop di sirbie.

Jehova a bendiciona mi cu un famia, loke mi tabata sinti falta di dje den mi infancia y hubentud. Mi tin un maraviyoso esposa, Elke, kende ta masha amoroso y ta tene hopi consideracion cu mi. Ademas, miyones di testigo di Jehova a bira mi rumannan spiritual, mi famia mundial.

Tambe mi ta haya consuelo den Dios su promesa di Paradijs caminda lo e haci “tur cos nobo”, incluso mi brasanan. (Revelacion 21:5) Mi ta compronde e promesa aki mas mihor ora mi pensa riba loke Hesus a haci tempo e tabata aki riba Tera. Den un frega di wowo el a cura hende cu tabatin man y pia mancaron, y hasta el a cura un homber su horea cu a ser kita afo cu spada. (Mateo 12:13; Lucas 22:50, 51) Jehova su promesanan y Hesus su milagernan ta convence mi cu pronto lo mi ta un homber completo atrobe.

Pero e bendicion di mas grandi cu mi a haya ta cu mi a siña conoce Jehova Dios. El a bira mi tata y mi amigo, mi consuelo y mi forsa. Mi ta sinti mescos cu Rey David, kende a skirbi: “SEÑOR ta mi fortaleza ... y mi ta wordo yuda; pesey mi curason ta regociha.” (Salmo 28:7) E berdad maraviyoso aki mi ta tene na dje henter mi bida. Aunke mi no tin brasa, mi ta bras’e cu tur mi forsa.