Ora un amigo di nos ta sufri di un enfermedad mental, nos lo por sinti cu no tin nada cu nos por haci pa yud’e. Pero nos ta mustra nos amigo cuanto nos ta stim’e ora nos yud’e trata cu su problema di salud mental.

“[Sea] cla pa scucha.”—SANTIAGO 1:19.

Un di e mihor maneranan pa yuda bo amigo ta di scucha ora e kier papia. No sinti cu bo mester reacciona riba tur loke e bisa. Lag’e sa cu bo ta scuchando y ta echt interesa den dje. Purba di tin un mente habri y no core saca conclusion of ta cla pa husga. Corda cu e por bisa cos cu e no echt kiermen y cu despues e por lamenta.—Job 6:2, 3.

“Papia palabranan di consuelo.”—1 TESALONICENSENAN 5:14.

Bo amigo por ta sufri di ansiedad, of e por ta luchando cu e sintimento cu e no ta bal nada. Ora bo sigur’e cu bo ta stim’e, bo por consol’e y anim’e, hasta si bo no sa exactamente kico pa bisa.

“Un berdadero amigo ta stima semper.”—PROVERBIONAN 17:17.

Ofrece yudansa practico. En bes di asumi cu bo sa con pa yuda, puntra kico bo por haci. Si ta dificil pa bo amigo splica bo kico e tin mester, sugeri algo practico cu boso por haci hunto, manera bay cana. Of bo por ofrece pa haci compra, yuda cu limpieza of algo otro.—Galationan 6:2.

 “Tene pasenshi.”—1 TESALONICENSENAN 5:14.

No ta semper bo amigo lo ta cla pa papia. Laga bo amigo sa cu lo bo ta contento pa scuch’e ora e tin gana di papia. Pa motibo di su maleza, bo amigo por bisa of haci algo cu ta hurt bo. Kisas e ta cancela boso plannan of e por tin mal beis. Tene pasenshi y mustra comprension segun cu bo ta dun’e e yudansa cu e tin mester.—Proverbionan 18:24.

“Mi ta haci sigur cu mi ta un amiga cu semper e por conta cu ne. Aunke mi no tin solucion pa su problemanan, semper mi ta purba di scucha kico e tin di bisa. Tin biaha, ta djis un hende e mester pa scuch’e pa e sintie mihor.”—Farrah, a kende su amiga ta sufri di trastorno di comemento, ansiedad y depresion clinico.

“Un di mi amiganan ta masha amabel y positivo. El a invita mi pa bin come un cuminda dushi na su cas. E tabata masha amoroso, y esey a hacie facil pa mi expresa mi sintimentonan. Esey a anima mi masha!”—Ha-eun, kende ta sufri di depresion clinico.

“Ta hopi importante pa nos tene pasenshi. Ora mi esposa haci algo cu ta pone mi rabia, mi ta corda mi mes cu ta su maleza ta pon’e haci asina. Esey ta yuda mi pa mi no rabia y pa mi mustra mas comprension pa cu ne.”—Jacob, kende su esposa ta sufri di depresion clinico.

“Mi esposa ta un gran fuente di apoyo y consuelo pa mi. Ora ansiedad ta domina mi, nunca e no ta forsa mi pa haci algo cu mi no tin gana di haci. Tin biaha, esey kiermen cu e no ta haya oportunidad pa haci loke e tin hopi gana di haci. Mi ta echt aprecia su generosidad y tur e sacrificionan cu e ta haci pa mi.”—Enrico, kende ta sufri di ansiedad.