Ancianonan—Entrena Otronan pa Carga Responsabilidad

DEN congregacionnan di Testigonan di Yehova rond mundo, tin un necesidad urgente di hende homber cu por sirbi den posicion di supervision. Tin tres motibo principal pa e desaroyo aki.

Na prome luga, Yehova ta cumpliendo cu su promesa di haci ‘esun di mas menos bira un nacion poderoso.’ (Isaias 60:22) Door di su bondad inmereci, casi un miyon disipel nobo a batisa como Testigo di Yehova den e ultimo tres añanan. Mester di hombernan responsabel pa yuda esnan cu a caba di batisa progresa y bira Cristian maduro.—Hebreonan 6:1.

Na di dos luga, algun anciano cu a sirbi pa decadanan caba a haya nan forsa ta baha man na e cantidad di trabou cu nan ta haci den congregacion door cu nan a bira grandi of tin problema cu salu.

Y na di tres luga, awor aki tin hopi anciano Cristian celoso cu ta sirbi como miembro di Comite di Contacto cu Hospital, Comite di Construccion Regional y Comite di Salon di Asamblea. Den algun caso, pa nan por ta balansa, nan mester a entrega algun responsabilidad den nan congregacion local.

Pa satisface e necesidad urgente aki, con por haya mas homber cualifica? Entrenamento ta e solucion. Bijbel ta anima superintendentenan Cristian pa entrena “hombernan fiel, kendenan lo ta capas pa siña otro hende tambe.” (2 Timoteo 2:2) E verbo entrena ta nifica siña un hende pa e ta capacita, cualifica of competente. Laga nos mira con ancianonan por entrena otro hombernan pa bira cualifica.

Sigui Yehova Su Ehempel

No tin duda cu Hesucristo tawata capacita, cualifica y competente den su trabou, y esei no ta nada straño! Ta Yehova Dios mes a entren’e. Ki factornan a pone cu e programa di entrenamento aki tawata asina exitoso? Hesus a menciona tres cos na Juan 5:20: “E Tata [1] ta stima e Yiu y [2] ta mustr’E tur cos cu E mes ta haci; [3] y obranan mas grandi cu esakinan E lo mustr’E.” Door di analisa cada un di e factornan aki ancianonan lo por comprende e topico di entrenamento mas miho.

Ripara cu e prome cos cu Hesus a bisa ta: “E Tata ta stima e Yiu.” Desde comienso di creacion Yehova tawatin un relacion caluroso cu su Yiu. Proverbionan 8:30 ta duna detaye di e relacion ei: “E tempo ei Mi [Hesus] tawata na [Yehova Dios] su lado, manera un trahado experto, y dia tras dia mi tawata su delicia, regosihando semper su dilanti.” No tawatin duda den Hesus su mente cu Yehova tawatin “delicia” den dje. Y Hesus no a sconde e goso cu el a sinti mientras e tawata traha hunto cu su Tata. Esta agradabel ta ora tin un relacion caluroso y franco entre ancianonan Cristian y esnan cu nan ta entrena!

E di dos factor cu Hesus a menciona ta cu e Tata “ta mustr’E tur cos cu E mes ta haci.” E palabranan aki ta confirma loke Proverbionan 8:30 ta bisa, esta cu Hesus ‘tawata na lado’ di Yehova mientras e universo a ser crea. (Genesis 1:26) Ancianonan por sigui e bon ehempel ei door di traha personalmente cu e sirbidonan ministerial, mustrando nan con pa cumpli cu nan asignacionnan di un manera eficas. Pero no ta sirbidonan ministerial nobo so mester di entrenamento progresivo. Kico di e ruman hombernan fiel cu pa hopi aña ta trahando pa alcansa puesto di superintendente pero cu nunca no a ser nombra? (1 Timoteo 3:1) Ancianonan tin cu duna conseho  specifico na e rumannan aki pa nan por sa riba kico nan tin cu traha.

Por ehempel, kisas un sirbido ministerial ta confiabel, puntual y diligente den cumpli cu su asignacionnan. Kisas e ta un bon maestro tambe. Den hopi aspecto e por ta haci un trabou exelente den congregacion. Ma podise e no ta ripara cu e tin inclinacion di trata su compañeronan Cristian bruto. Ancianonan tin cu mustra “suavidad di sabiduria.” (Santiago 3:13) Lo no ta un muestra di bondad si un anciano papia cu e sirbido ministerial, anto mustr’e claramente kico ta e problema, dun’e ehempelnan specifico y dun’e sugerencia util pa e mehora? Si e anciano percura pa ‘sasona su conseho cu salo’, probablemente su conseho lo cai den bon tera. (Colosencenan 4:6) Naturalmente, e sirbido ministerial lo haci e trabou di e anciano mucho mas agradabel si e ta dispuesto pa acepta e conseho cu e ta haya.—Salmo 141:5.

Den algun congregacion, ancianonan ta duna entrenamento practico y continuo na e sirbidonan ministerial. Por ehempel, ora e ancianonan bai bishita esnan enfermo of esnan di edad, nan ta bai hunto cu un sirbido ministerial cu ta competente. Di e forma aki sirbidonan ministerial ta haya experencia den e trabou di pastoria. Naturalmente, tin hopi cos cu un sirbido ministerial mes por haci pa e progresa spiritualmente.—Mira e cuadro aki bou cu tin e tema “Loke Sirbidonan Ministerial Por Haci.”

E di tres factor cu a haci e entrenamento cu Hesus a ricibi asina exitoso tawata cu Yehova a entren’e cu futuro progreso na mente. Hesus a bisa di su Tata cu lo E mustra e Yiu “obranan mas grandi cu esakinan.” E experencia cu Hesus a haya ora e tawata riba tera a yud’e desaroya cualidadnan cu lo e tin mester di dje pa cumpli cu tareanan cu lo e haya den futuro. (Hebreonan 4:15; 5:8, 9) Por ehempel, ki un responsabilidad grandi lo e haya pronto, ora e tin cu resucita y husga miles di miyones di hende cu na e momento aki ta morto!—Juan 5:21, 22.

Ora ancianonan ta entrena sirbidonan ministerial awe, nan mester pensa riba futuro. Maske cu por parce di tin suficiente anciano y sirbido ministerial pa percura pa e necesidadnan actual, esei lo ta e caso tambe si forma un of mas congregacion nobo den futuro? Durande e ultimo tres añanan, tawatin mas cu 6.000 congregacion nobo rond mundo. Mester di hopi anciano y sirbido ministerial pa percura pa e congregacionnan nobo ei!

Ancianonan, boso ta sigui Yehova su ehempel door di desaroya un relacion personal y caluroso cu e hombernan cu boso ta entrenando? Boso ta mustra nan con pa nan haci nan trabou? Boso ta tene futuro necesidadnan na mente? Siguiendo Yehova su ehempel den e  manera cu El a entrena Hesus lo trece bendicion rico pa hopi hende.

No Tene Miedu di Delega

Ancianonan capacita cu tin custumber di cumpli cu varios responsabilidad pisa na mes momento, kisas no ta inclina pa delega autoridad na otronan. Kisas nan a purba delega trabou den pasado pero no a haya e resultado cu nan a desea. Pesei por ta nan a adopta e actitud di: ‘Si bo kier un trabou bon haci, hacie bo mes.’ Pero e actitud ei ta na harmonia cu Yehova su boluntad expresa den e Scritura, esta, pa hombernan menos experencia haya entrenamento di esnan cu tin mas experencia?—2 Timoteo 2:2.

Apostel Pablo a keda decepciona ora un di su compañeronan di biahe, esta Juan Marco, a bandona e grupo ora esaki tawata na Pamfilia y a bai cas bek. (Echonan 15:38, 39) Toch Pablo no a laga esei desanim’e di entrena otronan. El a scohe un otro ruman homber hoben cu yama Timoteo, y a entren’e pa e trabou di misionero. * (Echonan 16:1-3) Na Berea e misioneronan a haya oposicion asina fuerte cu no tawata sabi pa Pablo keda ei. Pues el a laga Silas, un ruman homber mas grandi y madura, hunto cu Timoteo pa percura pa e congregacion nobo ei. (Echonan 17:13-15) No tin duda cu Timoteo a siña masha hopi mes di Silas. Mas despues, ora Timoteo tawata cla pa asumi mas responsabilidad, Pablo a mand’e Tesalonica pa e anima e congregacion einan.—1 Tesalonisencenan 3:1-3.

E relacion entre Pablo cu Timoteo no tawata strictamente formal, sin emocion of impersonal. Nan tawatin un relacion caluroso. Ora Pablo a skirbi e congregacion di Corinto, el a referi na Timoteo—kende el a pensa di manda einan—como su “yiu stima y fiel den Señor.” Tambe el a bisa: “[Timoteo] lo haci boso corda mi camindanan cu ta den Cristo.” (1 Corintionan 4:17) Timoteo a aplica loke Pablo a siñ’e y a cualifica pa cumpli cu su asignacion. Hopi ruman homber hoben a bira sirbido ministerial, anciano of asta superintendente biahero capas. Esaki ta door cu nan a beneficia for di e entrenamento cu nan a haya di hombernan mas grandi cu a mustra berdadero interes den nan, net loke cu Pablo a haci den caso di Timoteo.

Ancianonan, Entrena Otronan!

No tin duda cu e profecia di Isaias 60:22 ta cumpliendo awe. Yehova ta haci ‘esun di mas menos bira un nacion poderoso.’ Pa e nacion ei keda “poderoso”, e mester ta bon organisa. Ancianonan, pakico no pensa riba maneranan adicional pa entrena hombernan dedica cu ta cualifica pa haya e entrenamento aki? Haci sigur cu cada sirbido ministerial ta bon na haltura di loke e tin cu mehora aden pa e haci progreso. Y boso ruman hombernan batisa, probecha di cualkier atencion personal cu boso haya. Probecha di oportunidadnan pa aumenta boso habilidad, conocemento y experencia. Sin duda Yehova lo bendiciona un programa amoroso asina di yuda otronan.—Isaias 61:5.

[Nota]

[Cuadro na pagina 30]

Loke Sirbidonan Ministerial Por Haci

Ancianonan ta duna entrenamento na sirbido ministerial, pero tin hopi cos cu sirbidonan ministerial mes por haci pa nan por progresa spiritualmente.

—Sirbidonan ministerial mester ta diligente y confiabel ora nan ta cumpli cu nan asignacionnan. Tambe nan mester desaroya bon custumber di studia. Progreso ta depende principalmente di studio y aplicacion di e cosnan cu nan a siña.

—Ora un sirbido ministerial ta prepara pa e duna un parti na un reunion Cristian, e no tin cu duda pa pidi un anciano capacita sugerencia riba con pa presenta e material.

—Tambe e sirbido ministerial por pidi un anciano pa wak con e ta duna un discurso biblico y dun’e conseho pa e mehora.

Sirbidonan ministerial mester busca, acepta y aplica conseho di e ancianonan. Di e manera aki nan progreso “por ta bisto pa tur hende.”—1 Timoteo 4:15.