E Problemanan di Distincion di Clase

“POR TA MASHA BON CU IGUALDAD TA UN DERECHO DI HENDE. PERO NINGUN PODER RIBA TERA POR HACIE BIRA UN REALIDAD.”

Asina Honore de Balzac, un novelista Frances di siglo 19, a bisa. Bo ta di acuerdo cu ne? Hopi hende ta inclina na pensa cu desigualdad den sociedad ta algo robes. Toch, asta awor den siglo 21, ainda sociedad humano ta parti den varios clase social.

CALVIN COOLIDGE, presidente di Merca di 1923 pa 1929, tawata preocupa cu e problema di distincion di clase social. El a papia di “elimina tur privilegio di e clase social mas halto completamente.” No obstante, un 40 aña despues di Coolidge su gobernacion, e Comision Kerner—cu tawatin e tarea di studia e relacion entre hende di diferente rasa—tawata precupa cu Merca inevitablemente lo parti den dos sociedad, “uno colo cla, uno scur, esta dos clase separa y desigual.” Algun hende ta bisa cu ya e palabranan aki a cumpli caba y cu den e pais ei “e distincion economico y racial ta bira cada bes mas grandi.”

Dicon ta asina dificil pa logra igualdad di hende? Naturalesa humano ta hunga un papel importante. Exmiembro di congreso Mericano William Randolph Hearst a yega di bisa: “Tur hende a ser crea igual por lo menos den un sentido: nan no kier ta igual.” Kico e tawata kier men? Kisas Henry Becque, un escritor Frances di siglo 19, a expresa esaki di un manera mas cla ainda: “Loke ta haci igualdad bira un asunto asina dificil pa alcansa ta, cu nos kier ta igual cu nos superiornan so.” Cu otro palabra, aunke hende kier ta igual cu esnan cu ta miho para cu nan den sociedad, mayoria lo no ta dispuesto pa entrega cierto privilegio y bentaha pa laga hende cu den nan bista ta menos bon para cu nan, haya igualdad.

Den pasado hende tawata nace sea como hende comun, como aristocrat, of asta como miembro di famia real. Ainda esei ta e caso na algun luga. Pero den mayoria pais awe, ta placa ta determina si bo ta di clase inferior, medio of privilegia. Pero tin otro factor cu tambe ta determina bo clase social, por ehempel bo rasa, bo educacion, y si bo sa lesa y skirbi. Y tin luga caminda nan ta descrimina bo a base di bo sexo. Na e luganan ei nan ta considera hende mohe como e clase inferior.

 Tin Indicacion di Speransa?

Leinan di derecho humano a yuda kibra algun barera di clase social. Na Merca nan a pasa algun lei cu ta prohibi segregacion social. Na Sur Africa nan a prohibi apartheid. Aunke bo ta haya sclabitud aki aya ainda, e ta ilegal na varios parti di mundo. Decisionnan di corte a obliga hende reconoce e derecho cu cierto gruponan nativo tin riba tereno. Ademas, leinan contra descriminacion a habri caminda pa e clase menos privilegia haya yudansa.

Esei kier men cu desigualdad social lo caba? Toch no. Maske algun tipo di distincion di clase a perde forsa, tin otro cu a cuminsa haya forsa. E buki Class Warfare in the Information Age (Guera di Clase Social den e Era di Informacion) ta bisa: “Awendia no ta corecto pa categorisa hende como capitalista of di e clase trahado. Pero esei ta debi cu e dos clasenan aki a parti bira grupitonan mas chikito di hende rabia.”

Semper distincion di clase social lo keda separa hende for di otro? Wel, e siguiente articulo lo mustra cu tin speransa pa e situacion aki.