Bon Obra Ta Glorifica Dios

MEDIANTE nan conducta excelente y obranan ehemplar, Cristiannan berdadero ta duna gloria na Dios. (1 Pedro 2:12) Esaki ta bisto den loke a sosode na Italia den e ultimo añanan.

Den luna di september di 1997, un temblor fuerte a sagudi varios parti di e areanan di Marche y Umbria, causando daño na casi 90.000 cas. Grupo di Testigonan di Yehova inmediatamente a ofrece yudansa na compañeronan creyente y na otro hende. Nan a percura pa esnan cu a ser afecta haya trailer, slaapzak, stoof, generator y otro cosnan necesario. Hende no a keda sin ripara esaki.

E corant Il Centro a informa: “E prome hendenan cu a yega pa duna yudansa den e areanan afecta tawata Testigonan di Yehova di Roseto [den e provincia di Teramo] . . . Ademas di reuni cu regularidad pa haci oracion, esnan fiel na Yehova ta traha di un manera practico, dunando un man na esnan cu ta sufri, sin importa na cua religion nan ta pertenece.”

E alcalde di Nocera Umbra, un di e pueblonan cu a keda mas afecta, a skirbi e Testigonan: “Mi ta gradici boso personalmente di curason pa e yudansa cu boso a duna na e poblacion di Nocera. Mi tin sigur cu mi ta expresa e sintimentonan di tur su habitantenan.” Ademas, e minister di asuntonan interior a duna e Congregazione Cristiana dei Testimoni di Geova (Congregacion Cristian di Testigonan di Yehova) un certificado di honor y un medaya. Esaki tawata “pa duna reconocemento na e trabou cu nan a haci y e diligencia cu nan a mustra den actividadnan relaciona cu e estado di emergencia cu a lanta den e areanan di Umbria y Marche.”

Den luna di october 2000, un inundacion desastroso a dal e region di Piedmont den e parti nort di Italia. Atrobe, di biaha e Testigonan a cuminsa prepara pa duna yudansa. Ei tambe hende no a keda sin ripara e bon obranan cu nan tawata haci. E region di Piedmont a duna nan un plakkaat pa nan “trabou boluntario y balioso den yuda e poblacion di Piedmont afecta pa inundacion.”

Hesucristo a instrui su disipelnan: “Laga boso lus briya dilanti di hende di tal manera cu nan por mira boso bon obranan y glorifica boso Tata cu ta den shelo.” (Mateo 5:16) Testigonan di Yehova ta contento pa glorifica Dios y no nan mes, door di haci ‘bon obra’ cu ta yuda nan prohimo spiritualmente y den otro maneranan.