Confia den Yehova e Dios Cu Ta Real

Bo a yega di wak shelo riba un anochi sin nubia y mira centenares di streya? Con bo ta splica nan existencia?

DEN e silencio di anochi, ta manera e streyanan a papia cu Rei David di antiguo Israel, y esei a impuls’e pa skirbi: “E shelonan ta conta di e gloria di Dios; y e firmamento ta proclama e obra di Su mannan.” (Salmo 19:1) Si, ta e Creador y no e creacion, ta digno “pa ricibi gloria y honor y poder.”—Revelacion 4:11; Romanonan 1:25.

“Esun cu a traha tur cos ta Dios”, Bijbel ta bisa. (Hebreonan 3:4) Si, e Dios berdadero, “kende su nomber ta Yehova, abo so ta e Haltisimo riba henter tera.” (Salmo 83:18, NW) Y E no ta un ilusion of un espehismo. Hesucristo a bisa di su Tata celestial, Yehova: “Esun cu a manda Mi ta berdadero.”—Juan 7:28.

Yehova—E Cumplidor di Su Propositonan

Dios su nomber unico, Yehova, ta aparece casi 7.000 biaha den e Scritura Hebreo so caba. * Su nomber mes ta señala na e echo cu di berdad E ta existi. Dios su nomber ta nifica literalmente “E Ta Causa pa Bira.” Di e manera ei Yehova Dios ta describi su mes como e Cumplidor di su propositonan. Ora Moises a puntra Dios su nomber, Yehova a bai den detaye tocante su nificacion bisando asin’aki: “Lo mi resulta di ta loke lo mi resulta di ta.” (Exodo 3:14, NW) E traduccion di Rotherham ta declara bon cla: “Lo Mi Bira loke sea mi kier.” Yehova ta resulta di ta, of ta scohe pa bira, loke sea ta necesario pa E haci su proposito y promesanan husto un realidad. Pesei E tin un cantidad impresionante di titulo, manera Creador, Tata, Soberano Señor, Wardador, Yehova di ehersitonan, Esun cu ta scucha oracion, Hues, Magnifico Instructor, Redentor.—Huesnan 11:27; Salmo 23:1; 65:2; 73:28, NW; 89:26; Isaias 8:13; 30:20, NW; 40:28; 41:14.

Ta solamente e Dios berdadero tin derecho di carga e nomber Yehova, pasobra hende nunca sa sigur si nan plannan lo tin exito. (Santiago 4:13, 14) Ta Yehova so por bisa: “Manera awasero y sneu ta cai for di shelo, y no ta bolbe ayanan sin muha tera, y ta haci tera produci y spruit, y ta duna simiña na e sembrado y pan na esun cu ta come, asina mi palabra cu ta sali for di mi boca lo ta; e lo no bolbe bashi cerca mi, sin cumpli cu loke mi ta desea, y sin alcansa e proposito cu cual mi a mand’e.”—Isaias 55:10, 11.

Yehova ta asina sigur di cumpli cu su proposito cu asta loke pa hende por parce di no ta real, for di Su punto di bista si ta real.  Hopi tempo despues cu Abraham, Isaac y Jacob a muri, Hesus a menciona nan y a bisa: “E [Yehova] no ta e Dios di e mortonan, sino di e bibonan, pasobra pa E tur ta biba.” (Lucas 20:37, 38) E tres patriarcanan fiel aki tawata morto, pero e proposito di Dios di resusita nan lo cumpli sigur, pesei pa Dios nan tawata casi manera na bida. Pa Yehova trece e fiel sirbidonan aki bek na bida no ta mas dificil cu crea e prome hende for di stof di tera.—Genesis 2:7.

Apostel Pablo ta duna un otro ehempel di e echo cu Dios ta causa pa su propositonan ser realisa. Abraham ta ser yama “tata di hopi nacion” den e Scritura. (Romanonan 4:16, 17) Tempo Abram no tawatin yiu ainda, Yehova a cambia su nomber pa Abraham, cu ta nifica “Tata di un Multitud.” Yehova a haci e nificacion di e nomber ei bira un realidad door di haci milager y duna Abraham y su esposa Sara e capasidad di haya yiu atrobe, aunke nan tur dos tawata di edad avansa.—Hebreonan 11:11, 12.

Siendo cu Hesucristo tawatin hopi poder y autoridad, el a papia di realidadnan for di un punto di bista superior cu di hende. Aunke su amigo intimo Lazaro a muri, Hesus a bisa su disipelnan: “Nos amigo Lazaro a pega soño, ma Ami ta bai pa mi lant’e for di soño.” (Juan 11:11) Dicon Hesus a papia di un homber morto como si fuera e ta simplemente na soño?

Ora Hesus a yega Betania, stad natal di Lazaro, el a bai na e graf y a manda pa kita e piedra cu tawata tapa e entrada. Despues di a resa na bos halto, el a ordena: “Lazaro, bin pafo!” Y mientras bista di tur presente tawata claba riba e graf, “esun cu a muri a bin pafo, cu su mannan y pianan lora den paña di graf, y tawatin un lenso lora rond di su cara.” Anto Hesus a bisa: “Los e y lag’e bai.” (Juan 11:43, 44) Hesus a resusita Lazaro; el a restoura bida na un homber cu tawatin cuater dia morto! Cristo no a papia cos cu no ta berdad ora el a bisa cu su amigo tawata na soño. For di e punto di bista di Yehova y Hesus, defunto Lazaro tawata manera djis na soño. Si, Hesus y su Tata celestial ta ocupa nan mes cu asuntonan cu ta real.

Yehova Por Pone Nos Speransanan Bira Realidad

Tin un contraste grandi entre idolonan engañoso y e Dios real. Adoradonan di idolo ta comete un eror ora nan ta atribui poder sobrehumano na nan obhetonan di adoracion. Pero maske cuanto nan venera nan idolonan, esaki no ta duna nan poder di haci milager. Di otro banda, Yehova Dios si por referi na su sirbidonan cu tin hopi tempo morto como si fuera nan ta bibo, pasobra E por duna nan bida atrobe. “SEÑOR ta e Dios berdadero”, y nunca E ta gaña su pueblo.—Jeremias 10:10.

Ta un gran consuelo pa sa cu na Yehova su debido tempo, e mortonan cu ta den su memoria lo ser resusita, restoura na bida! (Echonan 24:15) Si, resureccion ta encera restoura e patronchi di bida di un persona. Pa e Creador no ta un problema pa corda e patronchi di bida di esnan cu a muri y resusita nan. Su sabiduria y poder no tin limite. (Job 12:13; Isaias 40:26) Y como cu Yehova tin un amor  inmenso, lo E uza su memoria perfecto pa resusita e mortonan den un paradijs riba tera y cu e personalidad cu nan tawatin prome cu nan a muri.—1 Juan 4:8.

Segun cu fin di e mundo di Satanas ta acerca, esnan cu ta confia den e Dios berdadero sigur tin un futuro briyante. (Proverbionan 2:21, 22; Daniel 2:44; 1 Juan 5:19) E salmista ta sigura nos: “Aki poco tempo e malbado lo no t’ei mas; . . . Ma e humildenan lo hereda e tera, y lo deleita nan mes den pas abundante.” (Salmo 37:10, 11) Crimen y violencia lo ta cosnan di pasado. Husticia lo prevalece, y dificultadnan economico lo disparce. (Salmo 37:6; 72:12, 13; Isaias 65:21-23) Tur rastro di descriminacion social, racial, etnico y entre tribu lo pasa pa historia. (Echonan 10:34, 35) Lo no tin guera ni armanan di guera mas. (Salmo 46:9) Na e tempo ei “ningun habitante lo no bisa: ‘Mi ta malo.’” (Isaias 33:24) Tur hende lo gosa di salu perfecto y vibrante. (Revelacion 21:3, 4) Pronto Paradijs riba tera lo bira un realidad. Esei ta Yehova su proposito!

Si, tur speransa basa riba Bijbel pronto lo ser realisa. Pakico laga nos mes ser engaña door di loke e mundo aki ta adora como dios, mientras cu nos por pone nos pleno confiansa den Yehova? Ta Su boluntad pa “tur hende wordo salba y yega na conocemento di e berdad.” (1 Timoteo 2:3, 4) En bes di dedica nos tempo y recurso na e ilusionnan of espehismonan di e sistema di cosnan aki y su diosnan, laga nos aumenta nos conocemento di e Dios cu ta real y confia den dje di henter nos curason.—Proverbionan 3:1-6; Juan 17:3.

[Nota]

[Plachi na pagina 6]

For di e punto di bista di Yehova y Hesus, Lazaro tawata simplemente na soño

[Plachinan na pagina 7]

Pronto Paradijs riba tera lo bira un realidad