Dos Ruman Cu A Desaroya un Actitud Distinto for di Otro

DECISIONNAN cu mayornan ta tuma inevitablemente ta afecta nan yiunan. Esei ta e caso awe mescos cu e tawata den hofi di Eden. E rebeldia di Adam cu Eva tawatin un impacto profundo riba henter humanidad. (Genesis 2:15, 16; 3:1-6; Romanonan 5:12) Apesar di esei, si nos kier, cada un di nos por scohe pa desaroya un bon relacion cu nos Creador. E relato di Cain cu Abel, e prome rumannan den historia humano, ta mustra esei.

E Scritura no ta indica cu Dios a papia cu Adam cu Eva despues cu nan a ser saca for di Eden. No obstante, Yehova no a keda sin comunica cu nan yiunan. Sin duda Cain cu Abel a haya sa loke a sosode cu nan mayornan. Nan por a mira “e kerubinnan y un spada tur na vlam di candela cu tawata bira den tur direccion, pa warda e caminda cu ta bai na e palo di bida.” (Genesis 3:24) Tambe e hombernan aki a experencia cu loke Dios a bisa tawata berdad, esta cu sodo y dolo lo bira parti di bida.—Genesis 3:16, 19.

Cain cu Abel mester tawata na haltura di loke Yehova a bisa e colebra: “Lo mi pone enemistad entre abo y e mohe, y entre bo simiña y su simiña; e lo herida bo cabes, y abo lo herida su hilchi di pia.” (Genesis 3:15) Locual cu Cain cu Abel tawata sa tocante Yehova por a yuda nan desaroya un bon relacion cu ne.

Door di reflexiona riba e profecia di Yehova y su cualidadnan como un Benefactor amoroso, Cain cu Abel lo mester a sinti un deseo pa ricibi aprobacion di Dios. Pero te na ki grado nan lo a cultiva e deseo ei? Nan lo a reacciona riba nan deseo natural pa adora Dios, anto desaroya nan spiritualidad te na e punto di eherce fe den dje?—Mateo 5:3.

E Rumannan Ta Trece Ofrenda

Cu tempo, Cain cu Abel a trece ofrenda na Dios. Cain a ofrece fruta, y Abel a ofrece e prome bestianan di su tou. (Genesis 4:3, 4) Pa e tempo ei e hombernan aki lo por tawatin 100 aña di edad, ya cu Adam tawatin 130 aña di edad ora el a bira tata di su di tres yiu, Set.—Genesis 4:25; 5:3.

Nan ofrenda a indica cu Cain cu Abel a reconoce nan estado pecaminoso y a desea di haya Dios su fabor. Nan lo mester a pensa maske ta un poco riba Yehova su promesa relaciona cu e colebra y e Simiña di e mohe. Exactamente cuanto tempo y esfuerso Cain cu Abel a dedica na desaroya un bon relacion cu Yehova no ta ser menciona. Pero e manera cu Dios a reacciona riba nan ofrenda ta yuda nos comprende e pensamentonan profundo di cada un di nan.

Tin erudito ta kere cu Eva a mira Cain como e “simiña” cu lo destrui e colebra, ya cu ora Cain a nace el a bisa: “Mi a haya un yiu homber cu yudansa di SEÑOR.” (Genesis 4:1) Si Cain tambe tawatin e pensamento aki, e tawata completamente kiboca. Di otro banda, Abel a ofrece su sacrificio cu fe. Pues, “pa medio di fe Abel a ofrece na Dios un miho sacrificio cu Cain.”—Hebreonan 11:4.

 E echo cu Abel tawatin comprendemento spiritual y Cain no, no tawata e unico diferencia entre e dos rumannan aki. Tawatin un diferencia di actitud tambe. Pesei “SEÑOR a aprecia Abel y su ofrenda, ma Cain y su ofrenda E no a aprecia.” Probablemente Cain no a pensa masha riba su ofrenda y a presenta su ofrenda djis pa formalidad. Pero Dios no a aproba e tipo di adoracion cu ta djis pa hende mira. Cain a desaroya un curason malbado, y Yehova a dicerni cu su motivacionnan tawata robes. E manera cu Cain a reacciona ora su sacrificio a ser rechasa a revela kico tawata su berdadero actitud. En bes di drecha su actitud, “Cain a rabia masha pisa y su cara a cera.” (Genesis 4:5) Su comportacion a revela su pensamento y intencionnan malbado.

Advertencia y Reaccion

Door cu Dios tawata conoce Cain su actitud, el a puntr’e: ‘Pakico bo ta rabia? Y pakico bo cara ta cera asina? Si bo haci bon, lo bo no wordo acepta? Y si bo no haci bon, pica ta loer na porta. Y su deseo ta pa bo, ma abo mester domin’e?’—Genesis 4:6, 7.

Tin un les pa nos den esaki. Den un sentido, pica ta loer na porta cla pa devora nos. Pero Dios a duna nos boluntad liber, y nos por scohe pa haci loke ta bon. Yehova a invita Cain pa “haci bon”, ma E no a fors’e pa cambia. Cain a scohe su mes caminda.

E relato inspira ta sigui bisa: “Anto Cain a papia cu su ruman Abel. Y a sosode cu ora nan tawata den cunucu, Cain a lanta contra su ruman Abel y a mat’e.” (Genesis 4:8) Asina Cain a bira un asesino desobediente, cu sanger friu. E no a mustra ni un tiki remordimento ora Yehova a puntr’e: “Unda bo ruman Abel ta?” Mas bien, Cain a contesta di un manera bruto y sin sintimento: “Mi no sa. Ta wardado di mi ruman mi ta anto?” (Genesis 4:9) E echo cu el a gaña sin cuer’i cara y no a para responsabel pa loke el a haci a revela Cain su crueldad.

Yehova a maldiciona Cain y a prohibie di bai den bicindario di Eden. E maldicion cu tawatin riba e tera caba aparentemente lo a bira mas bisto den caso di Cain, y e tera lo no a produci ora Cain cultiv’e. El a hay’ele ta dual rond y biba como fugitivo riba tera. Door di reclama cu su sentencia tawata severo,  Cain a duna di conoce cu e tawatin miedo cu nan lo venga morto di su ruman riba dje, pero e no a demostra berdadero repentimento. Yehova a pone un “marca” riba Cain, probablemente un decreto formal cu otro hende sa di dje y ta mantene nan mes na dje pa evita cu hende lo a tuma vengansa contra dje.—Genesis 4:10-15.

E ora ei Cain “a sali for di e presencia di SEÑOR y a bai biba na tera di Nod, pariba di Eden.” (Genesis 4:16) El a casa cu un di su ruman muhenan of subrinanan y a haya Enoc, su prome yiu homber, anto a traha un stad cu el a duna e nomber ei. Cain su desendiente Lamec a resulta di ta mes violento cu su antepasado malbado. Pero henter e liña di desendencia di Cain a ser destrui durante e Dilubio di dia di Noe.—Genesis 4:17-24.

Les pa Nos

Nos por siña un les for di e relato di Cain cu Abel. Apostel Juan ta anima Cristiannan pa stima otro, “no manera Cain, kende tawata di e malbado, y a mata su ruman.” Cain “su obranan tawata malo, y esnan di su ruman tawata husto.” Tambe Juan ta bisa: “Ken cu odia su ruman ta un matado; y boso sa cu ningun matado no tin bida eterno ta permanece den dje.” Si, e manera cu nos ta trata nos compañeronan Cristian ta afecta nos relacion cu Dios y nos speransa di biba den futuro. Nos no por ta odiando ningun di nos compañeronan creyente anto na mesun momento gosa di Dios su aprobacion.—1 Juan 3:11-15; 4:20.

Cain cu Abel lo a haya e mesun criansa, pero Cain no tawatin fe den Dios. De echo, el a mustra cu e tawatin e actitud di Diabel, e ‘matado y tata di mentira’ original. (Juan 8:44) Loke Cain a haci ta mustra cu nos tur tin un oportunidad pa scohe y tambe cu esnan cu ta scohe pa peca ta separa nan mes for di Dios, y cu Yehova ta condena esnan cu no ta repenti.

Di otro banda, Abel tawatin fe den Yehova. Si, “pa medio di fe Abel a ofrece na Dios un miho sacrificio cu Cain, door di cual el a obtene e testimonio cu e tawata husto, ora Dios a duna testimonio di su regalonan.” Maske e Scritura no ta contene ningun palabra di loke Abel a bisa, mediante su fe ehemplar, “ainda e ta papia.”—Hebreonan 11:4.

Abel tawata e prome den e lista largo di hende cu a mantene integridad. Su sanger, cu ta ‘sclama na Yehova for di suela’, no a ser lubida. (Genesis 4:10; Lucas 11:48-51) Si nos tambe tin fe manera Abel, nos tambe por gosa di un relacion precioso y duradero cu Yehova.

[Cuadro na pagina 22]

E CUNUKERO Y E WARDADO DI CARNE

Algun di e responsabilidadnan cu Dios a duna Adam tawata pa cultiva e tera y cuida e bestianan. (Genesis 1:28; 2:15; 3:23) Su yiu homber Cain a cuminsa traha den agricultura, y Abel a bira un wardado di carne. (Genesis 4:2) Pero siendo cu hende tawata come solamente fruta cu berdura prome cu Dilubio, pakico cria carne?—Genesis 1:29; 9:3, 4.

Pa carne por aumenta nan mester haya cuido di hende. Abel su profesion a mustra cu hende a cria e bestianan domestico aki desde principio di historia di hende. E Scritura no ta bisa si e prome hendenan a uza lechi como alimento, pero asta esnan cu ta vegetariano por uza lana di carne. Y ora carne muri, por usa nan cuero pa varios cos. Por ehempel, pa Adam cu Eva por a cubri nan curpa, Yehova a “traha bisti di cuero” pa nan.—Genesis 3:21.

En todo caso, ta rasonabel pa asumi cu na principio Cain cu Abel a copera cu otro. Nan a produci algo cu otro miembronan di famia tawatin mester dje pa bisti of come bon.

[Plachi na pagina 23]

Cain su “obranan tawata malo, y esnan di su ruman tawata husto”