Siñadonan dje Palabra di Dios Anima Masha pa Cumpli cu Nan Encargo

CIENTOS di miles di maestro a bin hunto pa haya instruccion den e lunanan cu a pasa. Cuminsando na mei 2001, nan a reuni na cientos di Congreso di Districto “Siñadonan dje Palabra di Dios” di Testigonan di Yehova teni rond mundo. A anima e delegadonan masha pa nan siña nan mes, pa nan bira miho capasita y cumpli cu nan encargo como maestro.

Abo a asisti na un di e congresonan aki? Si ta asina, sin duda bo a aprecia e excelente alimento spiritual cu a ser sirbi na e reunionnan aki pa adora e Dios berdadero, Yehova. Pakico bo no ta repasa hunto cu nos e programa instructivo di e congreso?

Prome Dia: E Scritura Inspira Ta Probechoso pa Siña Hende

E presidente di congreso a duna delegadonan un bon bini caloroso cu e discurso “Sea Instrui, Siñadonan dje Palabra di Dios.” Hesucristo a siña for di Yehova, e “Magnifico Instructor”, y pesei el a bira e Gran Maestro. (Isaias 30:20, NW; Mateo 19:16) Si nos kier progresa como maestro of siñador di e Palabra di Dios, Yehova tin cu instrui nos tambe.

Despues a sigui e parti “Siña Hende Tocante e Reino Ta Produci Fruta Excelente.” E parti aki cu a consisti di entrevista di siñadornan experencia di e Palabra di Dios, a destaca e goso y recompensanan di haci disipel.

 A sigui un discurso motivador titula “Stimula door di ‘e Cosnan Magnifico di Dios.’” Den prome siglo, “cosnan magnifico” tocante e Reino di Dios a stimula hende na accion. (Echonan 2:11, NW) Nos tambe por stimula hende na accion door di declara “cosnan magnifico” manera por ehempel siñansanan biblico tocante e rescate, e resureccion y e pacto nobo.

E siguiente discurso a anima tur hende pa “Haya Deleite den Yehova Su Husticia.” (Salmo 35:27) Loke por yuda nos sigui tras di husticia ta di siña stima loke ta husto y odia loke ta malo, studia Bijbel, dal paso pa resisti influencianan cu ta spiritualmente perhudicial y cultiva humildad. E pasonan ei lo yuda proteha nos di mal asociacion, di mundo su normanan materialista y di dibirticion inmoral y violento.

E discurso clave, titula “Completamente Ekipa Como Siñadonan dje Palabra di Dios”, a recorda nos cu Yehova ta capasita nos como su ministernan mediante su Palabra, su spirito santo y su organisacion riba tera. Pa loke ta nos uzo di e Palabra di Dios, e orador a conseha nos: “Na moda di papia, nos meta ta pa hisa e mensahe di Bijbel for di e papel y inkt, anto hinc’e den curason di nos scuchadonan.”

E prome simposio di e congreso tawata titula “Siña Nos Mes Mientras Nos Ta Siña Otro Hende.” E parti di introduccion a enfatisa cu nos mester cumpli cu e mesun normanan halto di moralidad Cristian cu nos ta siña otro hende. E siguiente parti a conseha nos pa ‘maneha e palabra di e berdad corectamente.’ (2 Timoteo 2:15, NW) Sea nos tin poco of hopi tempo ta sirbi Dios, ta vital pa nos mes studia Bijbel regularmente y cu diligencia. E ultimo parti di e simposio a mustra cu Diabel ta busca pa mira si nos ta orguyoso, tin un actitud independiente, ta sinti nos mes importante, ta yalurs, envidioso, amarga, rencoroso y ta cana piki pieu. Sinembargo, si nos opone Diabel vigorosamente, lo e hui di nos. Pa nos por opon’e, nos tin cu hala cerca Dios.—Santiago 4:7, 8.

E discurso oportuno “Aborece e Plaga Mundano di Pornografia” a mustra nos con pa  lucha cu exito contra e practica degradante ei cu ta menasa nos spiritualidad. Profeta Habacuc a bisa di Yehova: “Bo wowonan ta mucho puro pa aproba maldad, y bo no por wak maldad cu tolerancia.” (Habacuc 1:13) Nos mester “aborece loke ta malo.” (Romanonan 12:9) E orador a spierta mayornan pa controla loke nan yiunan ta wak riba Internet y na television. Ademas, el a bisa cu esnan cu ta sinti atraccion pa pornografia mester busca yudansa cerca un amigo spiritualmente maduro. Tambe lo ta bon pa medita riba textonan di Bijbel y memorisa nan, textonan manera Salmo 97:10; Mateo 5:28; 1 Corintionan 9:27; Efesionan 5:3 y 12; Colosencenan 3:5; y 1 Tesalonicencenan 4:4 y 5.

E siguiente discurso, “Laga e Pas di Dios Proteha Bo”, a consola nos cu e siguransa cu ora ansiedad bira casi insoportabel, nos por tira nos carga riba Yehova. (Salmo 55:22) Si nos expresa nos mes libremente den oracion, Yehova lo duna nos “e pas di Dios”, e calma y trankilidad interno cu ta bini di e relacion precioso cu nos tin cu ne.—Filipensenan 4:6, 7.

E prome dia tawatin un final hopi felis cu e discurso “Yehova Ta Embeyece Su Pueblo cu Lus.” E parti ei tawata un splicacion di e cumplimento di Isaias capitulo 60. Meimei di e scuridad di e mundo aki, “stranheronan”—e creciente multitud grandi di hende semehante na carne—ta disfruta di Yehova su lus hunto cu e Cristiannan ungi. Referiendo na versiculo 19 y 20, e orador a splica: “Yehova lo no ‘baha’ manera solo ni ‘mengua’ manera luna. Lo e sigui embeyece su pueblo door di tira lus riba nan. Ki un garantia maravioso esei ta pa nos segun cu nos ta pasa door di e ultimo dianan di e mundo scur aki!” Na conclusion di e discurso, e orador a anuncia publicacion di e buki E Profecia di Isaías—Lus pa Henter Humanidad, Volúmen Dos. Bo a caba di lesa e publicacion nobo aki?

Di Dos Dia: Adecuadamente Capasita pa Siña Otronan

Despues di un consideracion di e texto di dia riba e di dos dia, nos a scucha cu sumo atencion na e segundo simposio di e congreso, “Ministernan Mediante Ken Otro Hende Ta Bira Creyente.” E oradornan di e simposio aki di tres parti a enfatisa e tres etapanan envolvi den yuda hende bira creyente: plama e mensahe di Reino, cultiva e interes cu bo haya, y siña hende interesa warda loke Cristo a manda. Cu yudansa di entrevista y reconstruccion di experencia, nos por a mira spesificamente con nos por siña otro hende bira disipel.

E parti cu a sigui tawata riba e tema “Agrega na Bo Aguante Debocion na Dios.” E orador a mustra cu loke finalmente ta conta ta cu nos ta ‘perseverando te na fin.’ (Mateo 24:13) Nos mester uza tur loke Dios a duna nos pa yuda nos cultiva debocion na dje, esta, oracion,  studio personal, e reunionnan y e ministerio. Nos no tin cu laga deseo- y actividadnan mundano tuma e luga di nos debocion na Dios of asta caba cu ne.

Kon hende cu ta cansa y carga por haya refrescamento awe? E discurso “Hayando Refrescamento bou di Cristo Su Yugo” a contesta e pregunta ei. Bondadosamente Hesus a invita su siguidonan pa bini bou di su yugo y siña for di djE. (Mateo 11:28-30, NW) Nos por bini bou di Hesus su yugo door di sigui su ehempel estrechamente, hibando un bida simpel y balansa. A duna realze na e puntonan principal di e presentacion aki door di entrevista Cristiannan cu a simplifica nan bida.

Un di e puntonan sobresaliente di reunionnan grandi di Testigonan di Yehova ta e bautismo di sirbidornan di Dios resien dedica. E ruman cu a duna e discurso “Bautismo Ta Hiba na Mayor Privilegionan di Siña Hende”, a duna e candidatonan di bautismo un caloroso bon bini y a invita nan pa participa den oportunidadnan mas grandi di sirbishi. Siñadonan dje Palabra di Dios resien batisa cu ta satisface e rekisitonan biblico por haci esfuerso pa alcansa varios responsabilidad den e congregacion.

“Imita e Gran Maestro” tawata titulo di e prome discurso djatardi. Pa hopi tempo, Hesus den shelo a observa y imita su Tata cuidadosamente, y asina el a bira e Gran Maestro. Tempo cu E tawata riba tera, El a uza metodonan eficas di siña hende, manera preguntanan penetrante y comparacionnan simpel pero bibo. Hesus a basa su siñansa riba e Palabra di Dios y a papia cu entusiasmo, cariño y autoridad. Nos no a sinti nos motiva pa imita e Gran Maestro?

Un otro discurso motivador, “Bo Ta Dispuesto pa Sirbi Otro Hende?”, a anima nos pa imita Hesus su ehempel di sirbi otro hende. (Juan 13:12-15) E orador a dirigi su mes na ruman hombernan cualifica y a anima nan pa imita Timoteo y probecha di oportunidadnan pa yuda otro hende. (Filipencenan 2:20, 21) Tambe el a anima mayornan pa imita Elcana y Hana door di yuda nan yiunan alcansa e meta di e ministerio di tempo completo. Y el a anima hobennan pa imita e ehempel di Hesucristo y di e hoben Timoteo door di ofrece nan servicionan boluntariamente. (1 Pedro 2:21) Tambe e palabranan di rumannan cu a probecha di oportunidadnan pa sirbi otro hende a motiva nos.

E tema di e di tres simposio tawata “Beneficia Mas Plenamente di Educacion Teocratico.” E prome orador a enfatisa e importancia di aumenta nos capasidad di consentracion. Pa logra esei, nos tin cu cuminsa cu sesionnan cortico di studio personal y purba haci nan mas largo. Tambe el a anima e auditorio pa durante reunion nan busca e textonan y haci anotacion. E di dos orador a spierta nos cu nos tin cu tene duro na “e ehempel di palabranan sano.” (2 Timoteo 1:13, 14) Pa proteha nos mes di programanan inmoral di medionan di comunicacion, filosofianan mundano, criticonan di Bijbel y siñansanan apostata, nos tin cu saca tempo pa haci studio personal y pa asisti na reunion. (Efesionan 5:15, 16) E ultimo orador di e simposio a enfatisa e necesidad di practica loke nos a siña pa asina nos por beneficia plenamente di educacion teocratico.—Filipencenan 4:9.

Tawata emocionante pa nos tende e discurso “Percuracionnan Nobo pa Nos Adelanto Spiritual”! Nos a keda contento di tende cu pronto lo publica un buki nobo titula Beneficia di e Educacion di e Scol di Ministerio Teocratico. E manera cu e orador a describi e buki a  laga nos den gran expectativa pa hay’ele. E orador a bisa en cuanto e seccion di e buki cu ta contene varios punto di conseho pa duna discurso: “E buki di instruccion nobo aki no ta uza un metodo seglar pa presenta e 53 aspectonan aki di lesa, papia y instrui bon. E metodo ta basa riba principionan biblico.” E buki lo mustra con e profetanan, Hesus y su disipelnan a demostra bon habilidad di siña hende. Si, e buki di instruccion aki y e rasgonan nobo di e Scol di Ministerio Teocratico sigur lo yuda nos bira miho siñador dje Palabra di Dios.

Di Tres Dia: Sea Maestro en Bista di e Tempo

Despues di un consideracion di e texto di dia riba e ultimo dia, tur presente a paga bon tino na e ultimo simposio di e congreso, “E Profecia di Malakias Ta Prepara Nos pa e Dia di Yehova.” Malakias a profetisa un shen aña despues cu e Hudiunan a regresa for di Babilonia. Nan a bolbe drif cai den apostasia y maldad, deshonrando e nomber di Yehova door di ignora su leinan husto y door di trece bestianan ciego, lam y enfermo como sacrificio. Ademas, nan tawata diborcia for di e esposanan di nan hubentud, probablemente pa casa cu mohenan pagano.

E prome capitulo di Malakias ta sigura nos di e amor cu Yehova tin pa su pueblo. E ta enfatisa cu nos mester tin un temor respetuoso pa Dios y tambe aprecio y respet pa cosnan sagrado. Yehova ta spera di nos cu nos ta dun’e lo miho, y cu nos adoracion na dje ta motiva door di amor inegoista. Nos sirbishi sagrado no mester ta djis un formalidad, y nos tin cu duna cuenta y rason na Dios.

Aplicando e di dos capitulo di Malakias na nos tempo, e segundo orador di e simposio a puntra: “Nos ta personalmente alerta pa ‘hende no haya inhusticia riba nos lip’?” (Malakias 2:6) Esnan cu ta hiba delantera den duna instruccion mester tin sigur cu loke nan ta bisa ta firmemente basa riba e Palabra di Dios. Nos mester odia cosnan traicionero manera por ehempel obtene un diborcio inhusto.—Malakias 2:14-16.

Papiando riba e tema “Ken Lo Sobrevivi e Dia di Yehova?” e ultimo orador di e simposio a yuda nos prepara pa e dia di Yehova. El a declara: “Ta ki un consuelo pa e sirbidornan di Yehova sa cu Malakias capitulo 3, versiculo 17, ta haya su cumplimento principal riba nan! E ta bisa: ‘“Sigur nan lo bira di mi”, Yehova di ehersitonan a bisa, “riba e dia cu mi produci  un propiedad special. Y lo mi mustra compasion na nan, mescos cu un homber ta mustra compasion na su yiu homber cu ta sirbie.”’”

Un otro punto sobresaliente di e congreso tawata e drama “Respeta Yehova Su Autoridad”, presenta den pleno trahe y esenario antiguo, y cu a bai over di e yiunan di Core. Apesar di e actitud rebelde cu nan tata tawatin contra Moises cu Aron, nan si a keda fiel na Yehova y na su representantenan. Aunke Core y su siguidornan a muri, e yiunan di Core si a keda na bida. E siguiente discurso, “Somete Nos Mes Lealmente na Dios Su Autoridad”, a aplica e contenido di e drama na cada un di nos. E orador a spierta nos di seis area den cua Core y su siguidornan a faya: keda sin apoya Yehova su autoridad lealmente; laga orguyo, ambicion y celo domina nan; consentra riba e imperfeccionnan di esnan cu Yehova a nombra; desaroya un actitud kehoso; bira malcontento cu nan privilegionan di sirbishi; y laga amistad of relacion familiar bai prome cu lealtad na Yehova.

“Ken Ta Siñando Tur Nacion e Berdad?” tawata tema di e discurso publico. E berdad cu e orador a trata no tawata berdad en general, sino e berdad tocante Yehova su proposito di cua Hesucristo a duna testimonio. E orador a considera e berdad relaciona cu creencia, e berdad en cuanto manera di adora y e berdad pa loke ta conducta personal. Haciendo un comparacion entre e Cristiannan di prome siglo cu Testigonan di Yehova awe, nos conviccion cu ‘sigur sigur Dios ta meimei di nos’, realmente a bira mas firme.—1 Corintionan 14:25.

Despues di un resumen di e articulo di studio di E Toren di Vigilancia pa e siman ei, e discurso final “Cumpli Urgentemente cu Nos Comision di Siña Otro Hende”, a stimula tur siñador di Dios su palabra den auditorio na accion. Un repaso breve di e programa a enfatisa e importancia di uza e Scritura ora di siña hende, e maneranan cu nos por bira maestronan capasita y e necesidad di tin confiansa den e berdad cu nos ta siña otro hende. E orador a conseha nos pa ‘haci nos progreso bisto’ y tambe ‘paga bon tino na nos mes y na nos siñansa.’—1 Timoteo 4:15, 16.

Nos a gosa di un gran bankete spiritual na e Congreso di Districto “Siñadonan dje Palabra di Dios”! Laga nos imita nos Magnifico Instructor, Yehova, y nos Gran Maestro, Hesucristo, door di siña otro hende e palabra di Dios.

[Cuadro/Plachi na pagina 28]

Publicacionnan Nobo Pa Satisface Necesidadnan Special

Cu hopi entusiasmo delegadonan na e Congreso di Districto “Siñadonan dje Palabra di Dios” a ricibi dos publicacion cu lo ta hopi practico pa siña berdadnan biblico na hende den cierto partinan di mundo. E tratado (na Spaño) titula Bo Tin un Spirito Inmortal? lo ta un medio util pa cuminsa combersacion cu hende cu ta biba den paisnan caminda e idiomanan local no ta haci un distincion entre “alma” y “spirito.” E tratado nobo ta mustra bon cla cu tin un diferencia entre forsa spiritual y criatura spiritual y cu hende no ta bira spirito ora nan muri.

Na fin di e di dos dia di congreso a presenta e foyeto nobo (na Spaño) Con pa Logra un Bida Satisfaciente. A prepara e foyeto aki cu e proposito di uz’e pa cuminsa studio di Bijbel cu hende cu no ta conoci cu e idea di un Creador cu un personalidad, y cu tin un buki cu Dios a inspira. Bo a haya chens di uza e publicacionnan nobo aki den bo ministerio?

[Plachinan na pagina 26]

Na Milan, Italia, y na congresonan rond mundo, cientos di hende a batisa

[Plachi na pagina 29]

E drama “Respeta Yehova Su Autoridad” a conmove e auditorio