Sigui Mustra Bondad
Sigui Mustra Bondad
“Pasobra e fruta di lus ta consisti di tur sorto di bondad y husticia y berdad.”—EFESIONAN 5:9.
1. Con miyones di hende awe ta demostra cu nan ta di acuerdo cu Salmo 31:19?
E MIHO cos cu cualkier hende por haci ta di duna gloria na Yehova. Awe, miyones di hende ta haci esaki door di alaba Dios pa su bondad. Como Testigonan fiel di Yehova, di curason nos por bisa loke e salmista a canta: “Ki abundante ta Bo bondad, cu Bo a warda manera tesoro pa esnan temeroso di Bo!”—Salmo 31:19.
2, 3. Kico lo por sosode si nos trabou di haci disipel no ta ser compaña pa bon conducta?
2 Temor y respet profundo pa Yehova ta motiva nos na alab’E pa su bondad. Tambe esei ta impulsa nos pa ‘elogia Yehova, bendicion’E y papia di e gloria di su reino.’ (Salmo 145:10-13) Ta pesei nos ta participa cu celo den e trabou di predica e Reino y haci disipel. (Mateo 24:14; 28:19, 20) Naturalmente, bon conducta mester compaña nos actividad di predica, sino nos lo por trece reproche riba Yehova su nomber santo.
3 Hopi hende ta pretende cu nan ta adora Dios, pero nan conducta no ta cuadra cu e normanan describi den su Palabra inspira. Referiendo na hende cu a pretende di ta haci bon pero cu a laga esei solamente na palabra, apostel Pablo a skirbi: “Abo, esun cu ta siña un otro persona, no ta siña bo mes? Abo, esun cu ta predica: ‘No horta’, ta horta? Abo, esun cu ta bisa: ‘No comete adulterio’, ta comete adulterio? . . . ‘E nomber di Dios ta ser blasfema entre e nacionnan pa causa di boso’; net manera ta para skirbi.”—Romanonan 2:21, 22, 24.
4. Ki efecto nos bon conducta tin?
4 En bes di trece reproche riba Yehova su nomber, nos ta haci esfuerso pa glorific’e cu nos bon conducta. Esaki tin un bon influencia riba hende pafo di e congregacion Cristian. Di un banda, e ta yuda nos silencia nos opositornan. (1 Pedro 2:15) Pero mas importante, nos bon conducta ta atrae hende na Yehova su organisacion, y ta habri caminda pa nan dun’e gloria y gana bida eterno.—Echonan 13:48.
5. Cua preguntanan nos mester considera awor?
5 Pero siendo imperfecto, con nos por evita conducta cu lo por deshonra Yehova y pone hende cu ta busca e berdad trompica? Si, con nos por tin exito den mustra bondad?
Un Fruta di Lus
6. Cua ta algun di “e obranan infructifero cu ta pertenece na scuridad”? Pero cua fruta mester ta bisto entre Cristiannan?
6 Como Cristiannan dedica, nos ta disfruta di algo cu ta yuda nos evita “obranan infructifero cu ta pertenece na scuridad.” E obranan aki ta inclui cosnan cu ta deshonra Dios manera gañamento, hortamento, abla ofensivo, papiamento tocante sex den un forma insaludabel, conducta bergonsoso, chansanan vulgar y buracheria. (Efesionan 4:25, 28, 31; 5:3, 4, 11, 12, 18) En bes di practica e cosnan ei, nos ta sigui “cana como yiunan di lus.” Apostel Pablo ta bisa cu “e fruta di lus ta consisti di tur sorto di bondad y husticia y berdad.” (Efesionan 5:8, 9) Pues ta door di cana den e lus nos por sigui mustra bondad. Pero ki clase di lus esaki ta?
7. Kico nos tin cu haci pa sigui desplega e fruta di bondad?
7 Apesar di nos imperfeccionnan, nos por mustra bondad si nos ta cana den e lus spiritual. E salmista a canta: “Bo palabra ta un lampi pa mi pia, y un lus pa mi caminda.” (Salmo 119:105) Si nos kier sigui desplega “e fruta di lus” mediante “tur sorto di bondad”, anto nos tin cu haci uzo constant di e lus spiritual cu tin den e Palabra di Dios, y cu ta ser analisa cuidadosamente den publicacionnan Cristian y considera regularmente na nos reunionnan pa adoracion. (Lucas 12:42; Romanonan 15:4; Hebreonan 10:24, 25) Tambe nos tin cu presta atencion special na e ehempel y siñansanan di Hesucristo, “e lus di mundo” y “e reflexion di [Yehova] su gloria”—Juan 8:12; Hebreonan 1:1-3.
Un Fruta di Spirito
8. Con bini nos por mustra bondad?
8 Lus spiritual sin duda ta yuda nos mustra bondad. Tambe nos por manifesta e cualidad aki pasobra Dios su spirito santo of forsa activo ta guia nos. Bondad ta parti di e “fruta di spiritu.” (Galationan 5:22, 23) Si nos ta somete nos mes na e guia di Yehova su spirito santo, lo e produci den nos su maravioso fruta di bondad.
9. Con nos por actua na harmonia cu e palabranan di Hesus cu ta para skirbi na Lucas 11:9-13?
9 Nos deseo sinsero pa agrada Yehova door di demostra bondad, un di e frutanan di spirito, mester motiva nos pa actua na harmonia cu e palabranan di Hesus: “Sigui pidi, y lo e ser duna na boso; sigui busca, y boso lo haya; sigui bati, y lo ser habri pa boso. Pasobra tur cu ta pidi ta ricibi, y tur cu ta busca ta haya, y pa tur cu ta bati lo ser habri p’e. En berdad, cua tata tin den boso cu si su yiu ta pidi un pisca, lo dun’e acaso un colebra en bes di un pisca? Of si e pidi tambe pa un webo, lo dun’e un scorpion? Pesei, si boso, aunke boso ta [imperfecto y pues relativamente] malbado, sa con pa duna bon regalo na boso yiunan, cu cuanto mas rason e Tata den shelo lo duna spirito santo na esnan cu ta pidie!” (Lucas 11:9-13) Laga nos sigui Hesus su conseho door di haci oracion pidi Yehova pa su spirito ya asina nos por sigui demostra su fruta di bondad.
“Sigui Haci Bon”
10. Exodo 34:6 y 7 ta menciona cua maneranan cu Yehova ta demostra su bondad?
10 Teniendo lus spiritual for di e Palabra di Dios y cu yudansa di Dios su spirito santo, nos por “sigui haci bon.” (Romanonan 13:3) Door di studia Bijbel cu regularidad, nos ta siña mas tocante con nos por imita Yehova su bondad. E articulo anterior a considera aspectonan di Dios su bondad menciona den e declaracion na Moises cu ta para skirbi na Exodo 34:6 y 7. Ei nos ta lesa: “Yehova, Yehova, un Dios misericordioso y yen di gracia, cu ta tarda pa rabia y ta abundante den bondad amoroso y berdad, cu ta conserva bondad amoroso pa miles, y ta pordona eror y transgresion y pica, pero di ningun manera lo e duna despensacion di castigo.” Un analisis di e maneranan aki cu Yehova ta mustra su bondad lo yuda nos “sigui haci bon.”
11. Ki influencia e echo cu nos sa cu Yehova ta misericordioso y yen di gracia mester tin riba nos?
11 E declaracion dibino aki ta spierta nos cu nos tin cu imita Yehova door di ser misericordioso y yen di gracia. Hesus a bisa: “Felis ta esnan misericordioso, ya cu nan lo ser mustra misericordia.” (Mateo 5:7; Lucas 6:36) Conciente di e echo cu Yehova ta yen di gracia, of comprension, nos ta ser impulsa pa ta comprensivo y placentero den e manera cu nos ta trata otro hende, inclusivo esnan na ken nos ta predica. Esaki ta na harmonia cu Pablo su conseho: “Laga boso expresion semper sea cu gracia, sasona cu salo, pa boso por sa con boso mester duna un contesta na cada un.”—Colosencenan 4:6.
12. (a) Siendo cu Dios ta tarda pa rabia, con nos mester trata otro hende? (b) Yehova su bondad amoroso ta motiva nos pa haci kico?
12 Siendo cu Dios ta tarda pa rabia, nos deseo pa “sigui haci bon” ta impulsa nos pa soporta e fayonan chikito di nos compañeronan di creencia y consentra riba nan bon cualidadnan. (Mateo 7:5; Santiago 1:19) Yehova su bondad amoroso ta motiva nos pa desplega amor leal, asta bou di e sircunstancianan di mas dificil. Esaki sigur ta algo hopi deseabel.—Proverbionan 19:22.
13. Con nos mester actua pa refleha cu Yehova ta ‘abundante den berdad’?
13 Como cu nos Tata celestial ta ‘abundante den berdad’, nos ta trata na ‘recomenda nos mes como ministernan di Dios door di papia e berdad.’ (2 Corintionan 6:3-7) Dos di e shete cosnan cu Yehova ta odia ta “un lenga falso” y “un testigo falso cu ta lansa mentira.” (Proverbionan 6:16-19) Pues nos deseo pa agrada Dios ta motiva nos pa ‘kita falsedad y papia berdad.’ (Efesionan 4:25) Laga nos nunca keda sin manifesta bondad den e manera vital aki.
14. Dicon nos mester ta pordonado?
14 Loke Dios a declara na Moises mester motiva nos tambe pa ta pordonado, pasobra Yehova ta cla pa pordona. (Mateo 6:14, 15) Claro cu Yehova ta castiga pecadonan cu no repenti. Pesei nos tin cu apoya su normanan di bondad pa loke ta trata mantene e limpiesa spiritual di e congregacion.—Levitico 5:1; 1 Corintionan 5:11, 12; 1 Timoteo 5:22.
“Vigila Cuidadosamente”
15, 16. Con Pablo su conseho registra na Efesionan 5:15-19 ta yuda nos sigui practica bondad?
15 Pa sigui mustra bondad apesar di e maldad cu tin rond di nos, nos mester ta yen di Dios su spirito y vigila con nos ta cana. Pesei Pablo a anima Cristiannan na Efeso: “Vigila cuidadosamente pa e manera cu boso ta cana no ta manera hende imprudente sino manera hende sabi, cumprando e tempo oportuno pa boso mes, pasobra e dianan ta malo. Pa e motibo aki, stop di bira irasonabel, sino sigui percibi loke ta e boluntad di Yehova. Tambe, no bira burachi cu biña, den cua tin corupcion, sino sigui yena boso cu spirito, papiando cu boso mes cu salmo y alabansa pa Dios y canticanan spiritual, cantando y compañando boso mes cu musica den boso curason na Yehova.” (Efesionan 5:15-19) E conseho aki sigur ta na su luga den e ultimo dianan trabahoso aki.—2 Timoteo 3:1.
16 Pa nos por sigui practica bondad, nos tin cu vigila bon pa nos cana manera hende cu ta eherce sabiduria dibino. (Santiago 3:17) Nos tin cu evita picanan serio, tambe yena nos mes cu spirito santo y laga e forsa aki guia nos. (Galationan 5:19-25) Door di aplica e instruccion spiritual duna na reunionnan Cristian, asambleanan y congresonan, nos por sigui haci loke ta bon. Tambe e palabranan di Pablo na e Efesionan ta corda nos cu na mayoria di nos reunionnan di adoracion, nos ta beneficia di nos cantamento sinsero di “canticanan spiritual”, ya cu hopi di nan ta trata di cualidadnan spiritual, manera por ehempel bondad.
17. Cristiannan cu tin un malesa grave cu ta stroba nan di asisti regularmente na reunion, por ta sigur di kico?
17 Kico di nos compañeronan di creencia cu no por asisti na reunionnan Cristian regularmente pa motibo di un malesa grave? Podise nan ta sinti nan mes desanima pasobra no ta tur biaha nan por adora Yehova den compania di nan rumannan spiritual. Pero nan por tin sigur cu Yehova ta comprende nan situacion, cu lo e mantene nan den e lus, lo duna nan su spirito santo y lo yuda nan sigui haci loke ta bon.—Isaias 57:15.
18. Kico lo yuda nos sigui e caminda di bondad?
18 Pa sigui e caminda di bondad nos mester vigila cu ken nos ta anda y aparta for di hende cu no tin “amor pa bondad.” (2 Timoteo 3:2-5; 1 Corintionan 15:33) Aplicando tal conseho nos ta evita di “aflihi e spirito santo di Dios” door di bai contra su guia. (Efesionan 4:30) Ademas, nos ta haya yudansa pa haci loke ta bon si nos desaroya amistad pega cu esnan kende nan bida ta duna evidencia cu nan stima bondad y cu nan ta laga e spirito santo di Yehova guia nan.—Amos 5:15; Romanonan 8:14; Galationan 5:18.
Bondad Ta Produci Bon Resultado
19-21. Conta experencianan cu ta mustra e efecto di demostra bondad.
19 Si nos cana den e lus spiritual, somete nos mes na e guia di Dios su spirito y vigila con nos ta cana, nos lo por evita loke ta malo y “sigui haci bon.” Esaki na su turno por produci bon resultado. Considera e experencia di Zongezile, un Testigo di Yehova na Sur Africa. Un mainta riba caminda pa scol, el a pasa check e saldo di su cuenta di spar. E papel di bancomatico a mustra ekibocadamente cu e tawatin mas di 42.000 rand (11.000 florin). Un watchman di e banco y otro hende a anim’e pa e lanta e placa y deposit’e na un otro banco. Ta e pareha Testigo cu e tawata biba cerca dje so a felisit’e pasobra e no a lanta e placa.
20 E siguiente dia di trabou, Zongezile a notifica banco di e eror. Nan a descubri cu e number di su cuenta di spar tawata casi mescos cu esun di un comerciante rico, kende pa kibocacion a deposita placa riba su cuenta. Asombra cu Zongezile no a gasta ningun cen preto di e placa aki, e comerciante a puntr’e: “Di cua religion bo ta?” Zongezile a splica cu e ta un Testigo di Yehova. E funcionarionan di banco a felisit’e calorosamente, y a bisa: “Mare tur hende tawata honrado manera Testigonan di Yehova.” Pues en berdad actonan di honrades y bondad por pone otro hende glorifica Yehova.—Hebreonan 13:18.
21 Actonan di bondad no mester ta dramatico pa nan tin un bon efecto. Un ehempel: Un Testigo hoben cu ta sirbi como un evangelisado di tempo completo riba un di e islanan di Samoa tawatin cu bai e hospital local. Tawatin hopi hende ta warda riba e docter, y e Testigo a ripara cu banda di dje un señora hende grandi tawata hopi malo. El a duna e señora un chens di bai na su luga ya asina e por a haya atencion medico mas lihe posibel. Despues di poco tempo, e Testigo a topa e señora aki na plasa. E señora a cord’e y tambe su bon obra na hospital. E di: “Awor mi sa cu Testigonan di Yehova di berdad stima nan prohimo.” Antes e señora no tawata scucha e mensahe di Reino, pero e bondad cu e Testigo a mustra na dje tawatin un bon efecto. El a acepta un studio di Bijbel na cas y a cuminsa gana conocemento di e Palabra di Dios.
22. Cua ta un manera importante pa “sigui haci bon”?
22 Muy probablemente, bo por conta un experencia cu ta demostra e balor di mustra bondad. Un manera hopi importante di “sigui haci bon” ta door di participa regularmente den proclama e bon noticia di e Reino di Dios. (Mateo 24:14) Laga nos sigui participa den e actividad precioso aki, realisando cu esaki ta un manera pa haci bon, specialmente na esnan cu reacciona positivo. Mas importante ainda, nos ministerio y bon conducta ta glorifica Yehova, e fuente principal di bondad.—Mateo 19:16, 17.
Sigui “Obra Loke Ta Bon”
23. Dicon e ministerio Cristian ta un bon obra?
23 Nos ministerio sin duda ta un bon obra. E por resulta den salbacion pa nos y pa esnan cu scucha e mensahe di Bijbel y subi e caminda cu ta hiba na bida eterno. (Mateo 7:13, 14; 1 Timoteo 4:16) Ora nos ta confronta decisionnan, e deseo di haci loke ta bon probablemente ta pone nos puntra nos mes: ‘Ki efecto e decision aki lo tin riba mi actividad di predica e Reino? Loke mi tin pensa di haci di berdad ta bon? Lo e yuda mi duna otronan un man pa acepta e “bon nobo eterno” y haya un bon relacion cu Yehova Dios?’ (Revelacion 14:6) Nos lo haya gran felicidad si nos tuma un decision cu ta permiti nos haci mas pa e Reino.—Mateo 6:33; Echonan 20:35.
24, 25. Cua ta algun manera pa haci bon den congregacion, y di kico nos por tin sigur si nos sigui mustra bondad?
24 Laga nos nunca balota e efectonan probechoso di bondad. Nos por sigui desplega e cualidad aki door di apoya e congregacion Cristian y door di haci loke nos por pa contribui na su bienestar. Un cos ta sigur, nos ta haci bon ora nos ta asisti y participa cu regularidad na reunionnan Cristian. Nos presencia so ya ta anima compañeronan di adoracion, y nos comentarionan bon prepara ta edifica nan spiritualmente. Tambe nos ta haci bon ora nos uza nos recursonan pa mantene e Salon di Reino y ora nos ta yuda cuid’e bon. (2 Reinan 22:3-7; 2 Corintionan 9:6, 7) Si, “mientras cu nos tin tempo faborabel p’e, laga nos obra loke ta bon pa cu tur, pero specialmente pa cu esnan relaciona cu nos den e fe.”—Galationan 6:10.
25 Nos no por mira di antemano cua ta tur e situacionnan den cua nos mester mustra bondad. Pesei segun cu nos ta enfrenta retonan nobo, laga nos busca iluminacion for di e Scritura, resa pidi Yehova pa su spirito santo, y haci nos best pa cumpli cu su bon boluntad perfecto. (Romanonan 2:9, 10; 12:2) Nos por tin sigur cu Yehova lo bendiciona nos abundantemente mientras nos ta sigui mustra bondad.
Con Lo Bo Contesta?
• Kico ta e miho cos cu nos por haci, y con nos por logr’e?
• Dicon bondad ta ser yama un “fruta di lus”?
• Dicon bondad ta ser yama un “fruta di spirito”?
• Ki efecto nos bon conducta tin?
[Preguntanan di Estudio]
[Plachi na pagina 17]
Dios su Palabra y su spirito santo por yuda nos mustra bondad
[Plachi na pagina 18]
Mustra bondad ta produci bon resultado