“Bini Cerca Mi, . . . y Lo Mi Refresca Boso”

Ta Refrescante pa “Predica e Palabra”

E TAWATA un homber perfecto riba un mision importante. Su metodonan di duna instruccion tawata asina efectivo cu “e multitudnan a keda asombra di su siñansa.” (Mateo 7:28) Tambe E tawata un predicado incansabel. El a dedica su tempo, energia y recursonan principalmente na predica tocante e Reino di Dios. Si, Hesucristo a biaha rond su pais natal como un predicado y maestro incomparabel.—Mateo 9:35.

Hesus su mision urgente tawata pa predica “e evangelio di reino” na e hendenan di su tempo, y entrena su disipelnan pa haci e mesun trabou na un escala mundial. (Mateo 4:23; 24:14; 28:19, 20) E gran responsabilidad di e encargo di predica, e urgencia y tambe e magnitud di tal actividad lo a desanima Hesus su siguidonan imperfecto, kendenan tawatin nan limitacionnan?

Absolutamente cu no! Despues di instrui su disipelnan pa resa pidi Yehova Dios, e “Señor di cosecha”, pa mas trahado, Hesus a manda nan sali bai educa e pueblo. (Mateo 9:38; 10:1) Anto el a sigura nan cu e responsabilidad di ser su siguido—inclusivo e encargo di predica—lo trece berdadero alivio y consuelo. Hesus a bisa: “Bini cerca Mi, . . . y lo Mi refresca boso.”—Mateo 11:28, NW.

Un Fuente di Goso

Esta un invitacion compasivo, amoroso y bondadoso esei ta! E invitacion ta mustra cu Hesus ta masha interesa den su siguidonan. Su disipelnan ta ser refresca door di cumpli cu nan responsabilidad di predica “e evangelio”, esta, e bon noticia di e Reino di Dios. Esaki ta duna nan berdadero goso y satisfaccion.—Juan 4:36.

Hopi prome cu Hesus a bini na mundo, e Scritura a enfatisa cu goso mester ta un caracteristica di sirbishi sagrado na Dios. Esaki a sali na cla ora e salmista a canta: “Grita di alegria na SEÑOR, mundo henter. Sirbi SEÑOR cu goso; bin den su presencia cu cantamento gososo.” (Salmo 100:1, 2) Awe, hende di tur nacion ta alegra den Yehova, y nan expresionnan di alabansa ta manera e grito triunfante di un ehersito victorioso. Hende cu ta realmente fiel na Dios ta bin den su presencia “cu cantamento gososo.” Y esei ta na su luga, pasobra Yehova ta e “Dios felis”, cu kier pa su sirbidonan haya goso ora nan ta cumpli cu nan dedicacion na dje.—1 Timoteo 1:11, NW.

Esnan Cu Ta Predica Ta Sinti Nan Refresca

Con ta posibel cu trabou duro den sirbishi di veld no ta agota nos sino mas bien refresca nos? Wel, e trabou cu Yehova a manda Hesus haci tawata manera cuminda p’e, algo cu a dun’e energia. El a bisa: “Mi cuminda ta pa haci e boluntad di Esun cu a manda Mi, y pa cumpli cu su trabou.”—Juan 4:34.

Asina tambe predicadonan Cristian celoso djawe ta haya goso segun cu nan ta “predica e palabra.” (2 Timoteo 4:2) Connie, un señora Cristian riba 40 aña, ta dedica mas cu 70 ora pa luna na e trabou di predica, y ta bisa: “Despues di traha den sirbishi di veld, mi ta sinti un satisfaccion y un goso, maske mi ta cansa na final di e dia.”

Pero kico si hende no ta reacciona positivo riba e mensahe di Reino? Connie ta sigui bisa: “Maske con e reaccion por tawata, nunca a yega di duel mi cu mi a participa den e sirbishi di veld. Fuera di sa cu mi ta haciendo loke ta agrada Yehova, pa mi ta un placer di por papia tocante e berdad, pasobra segun cu mi ta haci esei e maravioso  speransa di Bijbel ta bira mas firme den mi curason.”

Otro Cristiannan ta haya cu door di yuda hende gana un conocemento exacto di Dios nan propio bida ta haya un proposito. Meloney, un mucha mohe cu regularmente ta pasa mas cu 50 ora pa luna den e trabou di predica, ta bisa: “E ministerio ta refrescante pasobra e ta duna mi bida un enfoke y proposito. Problemanan personal y tensionnan di tur dia ta bira menos importante ora mi ta den sirbishi.”

Millicent, un otro celoso predicado Testigo di Yehova, ta comenta: “E ministerio ta duna mas realze na cada dia cu mi pasa papiando cu otro hende tocante Dios su proposito pa humanidad y splicando nan con Paradijs lo ser restoura riba tera. E ta haci Yehova un persona real pa mi riba un base diario, y ta duna mi pas y un grado di felicidad interno cu mi no por haya via ningun otro medio.”

Esnan Cu Ta Ricibi e Mensahe Ta Sinti Nan Refresca

E ministerio Cristian sigur sigur ta refresca predicadonan di Reino, pero tambe e ta duna consuelo na hende cu ta acepta e mensahe cu ta duna bida. Un juffrouw di scol na Portugal a haya les cerca soeur cu pastor, pero toch el a sinti cu iglesia no a satisface su necesidadnan spiritual. E no tawata haya contesta riba su preguntanan tocante Bijbel. Un studio di Bijbel regular cu un Testigo di Yehova a dun’e un comprendemento progresivo di e Scritura. E juffrouw di scol a keda encanta. El a bisa: “Tur diaranson mi tawata spera ansiosamente pa mi ora di studio, ya cu tur mi preguntanan tawata ser contesta cu prueba combencente basa riba Bijbel.” Awe, e señora aki ta un sirbido di Yehova dedica, y e tambe ta refresca otro hende cu berdad biblico.

Pues ta obvio cu Testigonan di Yehova no ta sinti nan desanima door di e seriedad di nan encargo di predica ni door di e magnitud di nan teritorio mundial. Ni indiferencia ni oposicion no ta descurasha nan. Nan a dedica nan mes vigorosamente na cumpli cu nan encargo di predica e Reino. Nan ta comparti e bon nobo tur caminda cu nan por haya hende: sea ta na un parada di truck na Merca (1), na un aeropuerto na Corea (2), den Seronan di Andes (3) of den un pacus na Londen (4). Cu goso Hesus su siguidonan di tempo actual ta efectua rond mundo nan trabou recompensador. Y manera Hesus a priminti, el a refresca nan y a uza nan pa refresca hopi otro hende.—Revelacion 22:17.