Yehova—E Ehempel Supremo di Bondad

“Elogia Yehova di ehersitonan, pasobra Yehova ta bon.”—JEREMIAS 33:11, NW.

1. Dicon nos ta ser impulsa na alaba Dios pa su bondad?

YEHOVA DIOS ta bon den tur sentido di palabra. “Esta grandi su bondad ta!” profeta Zacarias a proclama *. (Zacarias 9:17) Si, bondad ta ser refleha den e manera cu Dios a forma e tera pa nos disfruta di dje. (Genesis 1:31) Nunca nos lo por comprende tur e leinan complica cu Dios a establece ora el a crea universo. (Eclesiastes 3:11; 8:17) Pero e tiki cu nos sa ta impulsa nos na alaba Dios pa su bondad.

2. Con lo bo describi bondad?

² Kico ta bondad? Bondad ta excelencia moral, of birtud. Sinembargo, bondad ta mas cu ausencia di tur maldad. Bondad, un parti di e fruta di spirito, ta un cualidad positivo. (Galationan 5:22, 23) Nos ta demostra bondad ora nos ta haci obranan bon y probechoso na fabor di otro hende. Den e mundo djawe, loke ta ser considera como bon den algun circulo por ser considera como malo den otro circulonan. Pero pa nos por gosa di pas y felicidad, mester tin un solo norma di bondad. Ken tin derecho di establece e norma aki?

3. Kico Genesis 2:16 y 17 ta indica en cuanto e norma di bondad?

³ Ta Dios ta fiha e norma di bondad. Na principio di historia humano, ta Yehova ta esun cu a duna e ordo aki na e prome homber: “Bo por come di tur palo di e hofi te na satisfaccion.  Pero, en cuanto e palo di conocemento di bon y malo, bo no mag come di dje, pasobra den e dia cu bo come di dje lo bo muri positivamente.” (Genesis 2:16, 17) Si, hende tin cu acudi na nan Creador pa haya conocemento di bon y malo.

Muestra di Bondad Inmereci

4. Kico Dios a haci pa humanidad for di tempo cu Adam a peca?

⁴ Hende su prospecto pa felicidad eterno den perfeccion tawata na peliger ora Adam a peca y a nenga di reconoce Dios su derecho di fiha e normanan di bondad. (Genesis 3:1-6) Sinembargo, prome cu Adam su yiunan a nace cu e herencia di pica y morto, Dios a profetisa cu lo bini un Simiña perfecto. Papiando en realidad cu “e colebra original”, Satanas e Diabel, Yehova a declara: “Lo mi pone enemistad entre abo y e mohe, y entre bo simiña y su simiña. Lo e machica bo den cabes y abo lo machic’e den hilchi.” (Revelacion 12:9; Genesis 3:15) Tawata Yehova su proposito pa rescata humanidad pecaminoso. Como muestra di su bondad inmereci, Yehova a haci e areglo ei pa salba esnan cu eherce fe den e sacrificio di rescate di su Yiu stima.—Mateo 20:28; Romanonan 5:8, 12.

5. Apesar cu nos a hereda un curason cu ta inclina na haci malo, con bini nos por demostra un grado di bondad?

⁵ Claro cu debi na e pica di Adam, nos a hereda un curason cu ta inclina na haci malo. (Genesis 8:21) Pero afortunadamente, Yehova ta yuda nos demostra un grado di bondad. Si nos pega na e cosnan cu nos a siña for di su precioso scrituranan santo, esei ta ‘haci nos sabi pa salbacion’ y ta ‘ekipa nos pa tur bon obra.’ Pero no solamente esei, sino tambe e ta capasita nos pa haci loke ta bon den su bista. (2 Timoteo 3:14-17) Pero pa beneficia di e instruccion di e Scritura y pa por demostra bondad, nos mester tin e actitud di e salmista cu a canta: “[Yehova] bo ta bon y ta haci bon; siña mi bo reglamentonan.”—Salmo 119:68.

Yehova Su Bondad Ta Ser Elogia

6. Despues cu Rei David a laga trece e arca di pacto Jerusalem, Levitanan a canta un cantica cu a contene cua expresion?

⁶ Rei David di Israel di pasado a reconoce Dios su bondad y a busca Su guia. David a bisa: “Yehova ta bon y recto. Pesei E ta instrui pecado den e caminda.” (Salmo 25:8) Entre e instruccionnan cu Dios a duna e Israelitanan tawatin dies lei importante—e Dies Mandamento—skirbi riba dos tabla di piedra y warda den un caha sagrado cu nan a yama e arca di pacto. Despues cu David a laga trece e Arca Jerusalem, capital di Israel, Levitanan a canta un cantica cu a inclui e expresion: “Gradici Yehova, pasobra “su bondad amoroso ta te na tempo indefini.” (1 Cronicanan 16:34, 37-41) Lo mester tawata hopi dushi pa tende e palabranan ei for di boca di e cantantenan Levita!

7. Kico a sosode despues cu a trece e Arca den e Santisimo y despues di Salomon su oracion di dedicacion?

⁷ E mesun palabranan ei di alabansa a ser enfatisa durante dedicacion di e tempel di Yehova cu Salomon yiu di David a traha. Despues cu a pone e arca di pacto den e Santisimo di e tempel nobo resien traha, e Levitanan a cuminsa alaba Yehova, bisando: “Pasobra E ta bon, pasobra su bondad amoroso ta te na tempo indefini.” Na e ocasion ei e tempel a yena milagrosamente cu un nubia, locual a simbolisa Yehova su presencia glorioso.  (2 Cronicanan 5:13, 14) Despues di Salomon su oracion di dedicacion, “candela a baha for di shelo y a cuminsa kima e ofrenda kima y e sacrificionan.” Ora nan a mira esaki, “tur e yiunan di Israel . . . a buig te abou cu nan cara na tera riba suela y a cai na suela y a gradici Yehova, ‘pasobra e ta bon pasobra su bondad amoroso ta te na tempo indefini.’” (2 Cronicanan 7:1-3) Despues di un fiesta di 14 dia, e Israelitanan a regresa nan cas “alegre y contento di curason pa e bon cu Yehova a haci pa David y pa Salomon y pa su pueblo Israel.”—2 Cronicanan 7:10.

8, 9. (a) Aunke e Israelitanan a alaba Yehova pa su bondad, cu tempo ki rumbo nan a sigui? (b) Kico Jeremias a profetisa pa Jerusalem, y con e profecia ei a cumpli?

⁸ Lamentablemente, e Israelitanan no a sigui biba na harmonia cu nan canticanan di alabansa na Dios. Cu tempo, e pueblo di Huda tawata ‘glorifica Yehova simplemente cu nan lip.’ (Isaias 29:13) En bes di actua conforme cu Dios su normanan di bondad, nan a cuminsa practica loke ta malo. Y di kico nan maldad a consisti? Wel, nan tawata culpabel di idolatria, inmoralidad, opresion di hende pober y otro picanan serio! Como resultado, Jerusalem a ser destrui y e habitantenan di Huda a ser hiba preso na Babilonia na aña 607 prome cu Era Comun.

⁹ Asina Dios a disiplina su pueblo. Sinembargo, mediante profeta Jeremias el a profetisa cu lo bolbe tende den Jerusalem stem di hende cu ta bisa: “Elogia Yehova di ehersitonan, pasobra Yehova ta bon; pasobra su bondad amoroso ta te na tempo indefini!” (Jeremias 33:10, 11) Y asina a sosode. Despues cu e pais a keda desola pa 70 aña, un resto Hudiu a regresa Jerusalem na aña 537 prome cu Era Comun. (Jeremias 25:11; Daniel 9:1, 2) Nan a reconstrui e altar na e sitio di e tempel riba Sero Moria y a cuminsa ofrece sacrificio  einan. Den e di dos aña despues di nan regreso nan a pone e fundeshi di e tempel. Ki un ocasion emocionante! Esdras a conta: “Ora cu e trahadonan a pone e fundeshi di e tempel di Yehova, e ora ei e sacerdotenan bisti cu paña oficial, cu trompet, y e Levitanan e yiunan di Asaf, cu cimbal, a lanta para pa alaba Yehova conforme e instruccion di David rei di Israel. Y nan a cuminsa responde, alabando y dunando gradicimento na Yehova, ‘pasobra E ta bon, pasobra su bondad amoroso pa cu Israel ta te na tempo indefini.’”—Esdras 3:1-11.

10. Cu cua expresion significativo Salmo 118 ta cuminsa y termina?

¹⁰ Den varios salmo nos ta haya un expresion similar di alabansa tocante Yehova su bondad. Entre nan tin Salmo 118, cu famianan Israelita tawata canta pa conclui e celebracion di Pasco Hudiu. E salmo ei ta cuminsa y termina cu e palabranan: “Gradici Yehova, pasobra e ta bon; pasobra su bondad amoroso ta te na tempo indefini.” (Salmo 118:1, 29) Probablemente esakinan tawata e ultimo palabranan di alabansa cu Hesucristo a canta hunto cu su fiel apostelnan e anochi prome cu su morto na aña 33 Era Comun.—Mateo 26:30.

“Por Fabor, Laga Mi Mira Bo Gloria”

11, 12. Ora Moises a mira djis un punta di Dios su gloria, ki declaracion el a tende?

¹¹ Siglonan prome cu tempo di Esdras, Yehova a establece un coneccion entre su bondad y su bondad amoroso. Djis despues cu e Israelitanan a adora e bishe di oro den desierto y e malechornan a ser ehecuta, Moises a pidi Yehova: “Por fabor, laga mi mira bo gloria.” Sabiendo cu Moises lo no por a mira Su cara y keda na bida, Yehova a bisa: “Mi mes lo haci pa tur mi bondad pasa dilanti bo cara.”—Exodo 33:13-20.

¹² E siguiente dia riba Sero Sinai, Yehova su bondad a pasa dilanti Moises su cara. Na e ocasion ei Moises a mira djis un punta di Dios su gloria y a tende e declaracion aki: “Yehova, Yehova, un Dios misericordioso y yen di gracia, cu ta tarda pa rabia y ta abundante den bondad amoroso y berdad, cu ta conserva bondad amoroso pa miles, y ta pordona eror y transgresion y pica, pero di ningun manera lo e duna despensacion di castigo, mandando castigo pa eror di tata riba yiu y riba nieto, riba e di tres generacion y riba e di cuater generacion.” (Exodo 34:6, 7) E palabranan aki ta indica cu Yehova su bondad ta relaciona cu su bondad amoroso y otro aspectonan di su personalidad. Un analisis di esakinan lo yuda nos tambe mustra bondad na otro hende. Prome, laga nos considera e cualidad menciona dos biaha den e bunita declaracion aki di Dios su bondad.

“Un Dios . . . Abundante den Bondad Amoroso”

13. Den e declaracion di Dios su bondad, cua cualidad ta ser menciona dos biaha, y dicon esaki ta apropiado?

¹³ “Yehova [ta] un Dios . . . abundante den bondad amoroso . . . , cu ta conserva bondad amoroso pa miles.” E palabra Hebreo traduci “bondad amoroso” ta nifica tambe “amor leal.” Ta e unico cualidad menciona dos biaha den Dios su declaracion na Moises. Esei ta masha apropiado ya cu Yehova su cualidad dominante ta amor! (1 Juan 4:8) E expresion bon conoci di alabansa na Yehova “pasobra e ta  bon, pasobra su bondad amoroso ta te na tempo indefini” ta enfatisa e cualidad aki.

14. Ken specialmente ta disfruta di Dios su bondad y amor leal?

¹⁴ Un aspecto di Yehova su bondad ta cu e ta “abundante den bondad amoroso.” Esaki ta bisto specialmente na e manera tierno cu e ta cuida su fiel sirbidonan humano dedica na dje. (1 Pedro 5:6, 7) Testigonan di Yehova por duna prueba cu e ta “conserva bondad amoroso” pa cu esnan cu stim’e y ta sirbie. (Exodo 20:6) E nacion di Israel natural a stop di experencia Yehova su bondad amoroso, of amor leal, door cu nan a rechasa su Yiu. Pero Dios su bondad y amor leal pa cu Cristiannan fiel for di tur nacion lo dura pa semper.—Juan 3:36.

Yehova—Misericordioso y Yen di Gracia

15. (a) E declaracion cu Moises a tende riba Sero Sinai a cuminsa cu cua expresion? (b) Kico misericordia ta encera?

¹⁵ E declaracion cu Moises a tende riba Sero Sinai a cuminsa cu e expresion: “Yehova, Yehova, un Dios misericordioso y yen di gracia.” E expresion Hebreo traduci “misericordia” por referi na “mondongo” y ta estrechamente conecta cu e palabra pa “matris.” Pesei misericordia ta encera sintimentonan tierno di duele cu un hende ta sinti profundamente te den su paden. Pero misericordia ta inclui mas cu duele sinsero. E mester motiva nos pa haci algo pa alivia e sufrimento di otronan. Por ehempel, ancianonan Cristian amoroso ta mira cu ta necesario pa ta misericordioso cu compañeronan di creencia, ‘mustrando misericordia, cu alegria’, ora cu esaki ta apropiado.—Romanonan 12:8; Santiago 2:13; Hudas 22, 23.

16. Dicon nos por bisa cu Yehova ta yen di gracia?

¹⁶ Dios su bondad ta keda manifesta tambe den su gracia. Segun diccionario, un persona yen di gracia ta mustra hopi comprension y ta masha bondadoso specialmente cu esnan cu ta menos cu ne. Yehova ta e miho ehempel di un persona comprensivo den su trato cu su sirbidonan fiel. Por ehempel, pa medio di angel Dios bondadosamente a fortalece profeta Daniel cu tawata di edad avansa, y a informa e birgen Maria di e privilegio cu lo el a ricibi di duna lus na Hesus. (Daniel 10:19; Lucas 1:26-38) Como Yehova su pueblo, nos sigur ta aprecia e manera comprensivo cu E ta dirigi su mes na nos mediante e paginanan di Bijbel. Nos ta alab’e pa e manifestacion aki di su bondad y ta trata di mustra e mesun comprension ei den nos trato cu otro hende. Ora esnan cu tin cualificacionnan spiritual ta reahusta un compañero di creencia “den un spirito di suavidad”, nan ta purba pa ta suave, comprensivo.—Galationan 6:1.

Un Dios Cu Ta Tarda pa Rabia

17. Dicon nos ta gradicido cu Yehova “ta tarda pa rabia”?

¹⁷ “Un Dios . . . cu ta tarda pa rabia.” E palabranan ei ta enfatisa un otro aspecto di Yehova su bondad. Cu pasenshi Yehova ta tolera nos fayonan y ta duna nos tempo pa vence debilidadnan serio y haci adelanto spiritual. (Hebreonan 5:12–6:3; Santiago 5:14, 15) Dios su pasenshi ta beneficia tambe esnan cu ainda no a bira su adorado. Nan tin tempo ainda pa reacciona riba e mensahe di Reino y repenti. (Romanonan 2:4) Sinembargo, maske Yehova tin pasenshi, tin biaha su bondad ta impuls’e na expresa su rabia, manera ora el a rabia cu e Israelitanan cu a adora e bishe di oro na Sero Sinai. Pronto Dios lo expresa su rabia na un escala mas grandi ainda ora e pone fin na Satanas su sistema malbado.—Ezekiel 38:19, 21-23.

18. Pa loke ta berdad, ki contraste tin entre Yehova y lidernan humano?

¹⁸ “Yehova [ta] un Dios . . . abundante den . . . berdad.” Esta distinto Yehova ta di lidernan humano cu ta haci promesanan grandi sin cumpli cu nan! Na contraste cu esei, adoradonan di Yehova por depende riba tur cos cu su Palabra inspira ta bisa. Como cu Dios ta abundante den berdad, semper nos por confia su promesanan. Nos Tata celestial den su bondad,  sin falta ta contesta nos oracionnan pa haya berdad spiritual door di suministra esei na abundancia.—Salmo 43:3; 65:2.

19. Con Yehova a demostra bondad sobresaliente na pecadonan repenti?

¹⁹ “Yehova [ta] un Dios . . . [cu] ta pordona eror y transgresion y pica.” Den su bondad, Yehova ta cla pa pordona pecadonan repenti. Nos sigur ta gradicido cu nos amoroso Tata celestial a haci areglo pa nos haya pordon via e sacrificio di Hesus. (1 Juan 2:1, 2) En berdad nos ta masha contento cu tur hende cu eherce fe den e rescate por disfruta di un relacion aproba cu Yehova, cu e speransa di bida eterno den su mundo nobo priminti. Esakinan realmente ta motibonan di sobra pa alaba Yehova pa su bondad cu el a demostra na humanidad!—2 Pedro 3:13.

20. Ki prueba nos tin cu Dios no ta cera wowo pa maldad?

²⁰ “Di ningun manera [Yehova lo] duna despensacion di castigo.” En realidad esaki ta un motibo mas pa elogia Yehova pa su bondad. Dicon? Pasobra un aspecto vital di bondad ta cu di ningun manera E ta cera wowo pa maldad. Ademas, “n’e revelacion di Señor Hesus for di shelo cu su angelnan poderoso”, lo e duna pago mereci na “esnan cu no conoce Dios y esnan cu no ta obedece e bon nobo.” Nan “lo sufri e castigo hudicial di destruccion eterno.” (2 Tesalonicencenan 1:6-9) E adoradonan di Yehova cu sobrevivi lo por disfruta e ora ei di bida na plenitud, sin ser molestia door di hende malbado, hende cu no tin “amor pa bondad.”—2 Timoteo 3:1-3.

Imita Yehova Su Bondad

21. Dicon nos mester demostra bondad?

²¹ Indudablemente nos tin hopi motibo pa alaba y gradici Yehova pa su bondad. Como su sirbido, nos no mester haci nos sumo posibel pa demostra e cualidad aki? Si, pasobra apostel Pablo a anima compañeronan Cristian: “Bira imitado di Dios, manera yiunan stima.” (Efesionan 5:1) Nos Tata celestial ta demostra bondad consistentemente, y esei nos tambe mester haci.

22. Kico nos lo considera den e siguiente articulo?

²² Si nos ta dedica na Yehova di henter nos curason, sin duda nos lo tin masha deseo pa imita su bondad. Pero debi cu nos ta bini di e pecado Adam, no ta facil pa nos haci loke ta bon. Sinembargo, den e siguiente articulo nos lo mira dicon toch ta posibel pa nos mustra bondad na otro hende. Tambe nos lo considera varios manera cu nos por y lo mester imita Yehova—e ehempel supremo di bondad.

Con Lo Bo Contesta?

• Kico ta bondad?

• Cua expresion biblico ta enfatisa Dios su bondad?

• Cua ta algun manera cu Yehova a mustra su bondad?

• Dicon nos mester imita Yehova su ehempel di bondad?

[Nota]

[Preguntanan di Estudio]

[Plachi na pagina 12]

Yehova a disiplina su pueblo di antiguedad pasobra nan no a biba segun nan expresionnan di alabansa

[Plachi na pagina 12]

Un resto fiel a regresa Jerusalem

[Plachi na pagina 13]

Moises a tende un declaracion maravioso di Dios su bondad

[Plachi na pagina 15]

Nos por mira Yehova su bondad den e manera cu E ta dirigi su mes na nos mediante e paginanan di Bijbel