Bo A Ricibi “e Spirito di e Berdad”?

‘E Tata lo duna boso un otro ayudante pa keda cu boso pa semper, e spirito di e berdad.’—JUAN 14:16, 17, NW.

1. Ki informacion importante Hesus a duna su disipelnan durante su ultimo oranan cu nan den e sala djariba?

“SEÑOR, unda bo ta bai?” Esei ta un di e cosnan cu e apostelnan di Hesus a puntr’e durante e ultimo oranan cu el a pasa cu nan, den un sala djariba na Jerusalem. (Juan 13:36) Den transcurso di e reunion, Hesus a laga nan sa cu a yega tempo pa e bai laga nan y bolbe cerca su Tata. (Juan 14:28; 16:28) Lo e no ta cu nan fisicamente mas pa instrui nan y contesta nan preguntanan. Pero el a duna nan confiansa, bisando: “Lo mi pidi e Tata, y E lo duna boso un otro consolado [ayudante, NW], pa e keda cerca boso pa semper.”—Juan 14:16.

2. Kico Hesus a priminti di manda pa su disipelnan despues cu e bai?

² Hesus a identifica e ayudante ei y a splica nan con lo e yuda su disipelnan. El a bisa nan: “E cosnan aki mi no a bisa boso for di principio, pasobra mi tawata cerca boso. Ma awor mi ta bai cerca esun cu a manda mi . . . Ta cumbini boso cu mi ta bai; pasobra si mi no bai, e consolado lo no bin cerca boso; ma si mi bai, lo mi mand’e cerca boso. . . . Ora cu e, e spirito di berdad, bin, e lo guia boso den tur berdad.”—Juan 16:4, 5, 7, 13.

3. (a) Ki dia e prome Cristiannan a ricibi “e spirito di e berdad”? (b) Den ki manera importante e spirito tawata un “ayudante” pa nan?

³ E promesa aki a cumpli na Pentecoste di aña 33 Era Comun, y apostel Pedro a duna testimonio di esaki: “E Hesus aki Dios a lanta, di locual nos tur ta testigo. Pesei, siendo halsa na man drechi di Dios y despues di a ricibi for di e Tata e promesa di spirito santo, el a drama esaki, locual boso ta mira y tende.” (Echonan 2:32, 33) Manera nos lo sigui mira, e spirito santo drama na Pentecoste a logra hopi pa e prome Cristiannan. Pero Hesus a priminti cu “e spirito di e berdad” lo a ‘haci nan recorda tur loke el a bisa nan.’ (Juan 14:26) E spirito lo a yuda nan corda Hesus su ministerio, su siñansanan, y asta e palabranan exacto cu el a papia, pa nan por a pone nan por escrito. Specialmente pa apostel Juan, cu ya tawata grandi na fin di prome siglo ora el a cuminsa skirbi su relato di Evangelio, e spirito aki lo tawata hopi util. Den su relato nos ta haya e conseho valioso cu Hesus a duna ora el a institui e Conmemoracion di su morto.—Juan, capitulo 13-17.

4. Con “e spirito di e berdad” a yuda e prome Cristiannan ungi?

⁴ Tambe Hesus a priminti e prome disipelnan ei cu e spirito lo a ‘siña nan tur cos’ y  ‘guia nan den tur berdad.’ E spirito lo a yuda nan comprende e cosnan mas profundo di Bijbel, y yuda nan keda uni den pensamento, comprendemento y proposito. (1 Corintionan 2:10; Efesionan 4:3) Asina spirito santo a duna e prome Cristiannan, como grupo, poder pa nan actua manera un “esclabo fiel y discreto” cu ta duna Cristiannan individual “alimento na e debido tempo.”—Mateo 24:45, NW.

E Spirito Ta Duna Testimonio

5. (a) Ki speransa nobo Hesus a revela na su disipelnan riba e anochi di 14 di nisan di 33 E.C.? (b) Ki papel spirito santo lo a hunga den cumplimento di Hesus su promesa?

⁵ Riba e anochi di 14 di nisan di aña 33 Era Comun, Hesus a revela na su disipelnan cu despues e lo a ricibi nan, pa nan bai biba cerca dje y su Tata den shelo. El a bisa nan: “Den cas di mi Tata tin hopi luga di biba; si no tawata asina, lo mi a bisa boso; pasobra mi ta bai pa prepara un luga pa boso. Y ora mi bai y prepara un luga pa boso, lo mi bin atrobe y ricibi boso cerca mi, pa caminda ami ta, boso tambe por ta.” (Juan 13:36; 14:2, 3) Nan lo a bai reina cu ne den su Reino. (Lucas 22:28-30) Pa nan por tawatin e speransa celestial aki, nan mester a “nace di e spirito” como yiu spiritual di Dios, y ser ungi pa sirbi como rei y sacerdote cu Cristo den shelo.—Juan 3:5-8; 2 Corintionan 1:21, 22; Tito 3:5-7; 1 Pedro 1:3, 4; Revelacion 20:6.

6. (a) Na ki tempo e yamada pa shelo a cuminsa, y cuanto hende ta ricibi e yamada aki? (b) Esnan yama a ser batisa pa bira parti di kico?

⁶ E “yamada celestial” aki a cuminsa na Pentecoste di aña 33 Era Comun, y ta parce cu pa meimei di añanan 30 di siglo 20, el a termina. (Hebreonan 3:1) E cantidad di persona seya cu spirito santo pa bira parti di Israel spiritual ta 144.000, “cumpra for di entre hende.” (Revelacion 7:4; 14:1-4) Nan a ser batisa pa bira parti di e curpa spiritual di Cristo, di su congregacion, y di su morto. (Romanonan 6:3; 1 Corintionan 12:12, 13, 27; Efesionan 1:22, 23) Despues cu nan a batisa den awa y a ser ungi cu spirito santo, nan a drenta un proceso di sacrificio, esta, nan a cuminsa un bida di integridad cu ta dura te ora nan muri.—Romanonan 6:4, 5.

7. Dicon ta Cristiannan ungi so por participa corectamente di e emblemanan di Memorial?

⁷ Como Israelitanan spiritual, e Cristiannan ungi aki ta den e pacto nobo entre Yehova y “e Israel di Dios.” (Galationan 6:16; Jeremias 31:31-34) E pacto nobo aki a drenta na vigor a base di Cristo su sanger drama. Hesus a menciona esaki ora el a institui e Conmemoracion di su morto. Lucas ta conta: “El a cohe pan y a duna gradicimento, el a kibr’e, y a duna nan esaki, bisando: ‘Esaki ta mi curpa cu ta duna pa boso; haci esaki na mi recuerdo.’ Y di e mesun manera el a cohe e copa despues cu nan a caba di come, bisando: ‘E copa aki, cu a wordo drama pa boso, ta e aliansa nobo den mi sanger.’” (Lucas 22:19, 20) E resto, esta, esnan cu a keda riba tera ainda di e grupo di 144.000, ta esnan cu corectamente por participa di e pan y e biña cu ta sirbi como emblema na e Conmemoracion di e morto di Cristo.

8. Con e unginan sa cu nan a ricibi e yamada pa shelo?

⁸ Con Cristiannan ungi sa cu nan a ricibi e yamada celestial? Spirito santo ta duna nan un testimonio inekibocabel. Apostel Pablo a skirbi algun di nan: “Tur esnan cu ta wordo guia door di e spirito di Dios, esakinan ta yiunan di Dios. . . . E spirito mes ta duna testimonio hunto cu nos spirito cu nos ta yiu di Dios, y si nos ta yiu, nos ta heredero tambe, heredero di Dios y coheredero cu Cristo, si di berdad nos ta sufri hunto cu ne, pa nos wordo glorifica tambe hunto cu ne.” (Romanonan 8:14-17) E testimonio cu e spirito ta duna ta asina poderoso, cu si un hende tin e minimo duda cu el a ricibi e yamada pa shelo, e  por conclui rasonablemente cu e no a ricibie, y pesei lo no participa di e emblemanan di Memorial.

E Spirito y e Otro Carnenan

9. Cua dos diferente grupo e Evangelionan y e buki di Revelacion ta menciona?

⁹ Teniendo na mente cu ta un cantidad limita di Cristian ta yama pa forma parti di Israel spiritual, Hesus a yama nan e “tou chikito.” Nan ta ser admiti den e “cura” di e pacto nobo. Ademas di nan, tin e cantidad sin limite di ‘otro carne’ cu tambe Hesus mester recohe, manera el a bisa. (Lucas 12:32; Juan 10:16) E otro carnenan cu ser recohe durante e tempo di fin lo forma e “multitud grandi” cu tin cu sobrevivi e “gran tribulacion”, cu speransa di biba pa semper den paradijs riba tera. Ta interesante cu e vision cu Juan a ricibi na fin di prome siglo di Era Comun ta haci un distincion entre dos grupo: e multitud grandi aki, y e 144.000 miembronan di Israel spiritual. (Revelacion 7:4, 9, 14) E otro carnenan tambe ta ricibi spirito santo? Y si ta asina, ki efecto e tin riba nan bida?

10. Con e otro carnenan ta batisa “den nomber di e Tata y di e Yiu y di e spirito santo”?

¹⁰ En berdad spirito santo ta hunga un papel importante den bida di e otro carnenan. Nan ta simbolisa nan dedicacion na Yehova door di batisa “den nomber di e Tata y di e Yiu y di e spirito santo.” (Mateo 28:19) Nan ta reconoce Yehova su soberania, ta somete nan mes na Cristo como nan Rei y Rescatador, y ta permiti Dios su spirito, su forsa activo, obra den nan bida. Tur dia nan ta purba cultiva e “fruta di e spirito”, esta, “amor, goso, pas, pasenshi, cariño, bondad, fieldad, mansedumbre, dominio propio.”—Galationan 5:22, 23.

11, 12. (a) Den ki sentido special e unginan ta ser santifica? (b) Con e otro carnenan ta ser santifica?

¹¹ Tambe e otro carnenan mester laga e Palabra di Dios y su spirito santo purifica nan, santifica nan. E unginan ta santifica caba den un sentido masha special. Nan a ser declara husto y santo como e bruid di Cristo. (Juan 17:17; 1 Corintionan 6:11; Efesionan 5:23-27) Profeta Daniel ta yama nan “e santonan di e Haltisimo”, cu ta ricibi e Reino bou di e “yiu di hende” Cristo Hesus. (Daniel 7:13, 14, 18, 27) Mas prome, via Moises cu Aron, Yehova a declara na e nacion di Israel: “Ami ta SEÑOR boso Dios. Consagra boso mes anto y sea santo, pasobra ami ta santo.”—Levitico 11:44.

¹² Basicamente e palabra “santifica” ta nifica “haci santo, separa of aparta pa sirbi Yehova Dios of ser uza door di dje; bira santo of puro.” For di 1938 E Toren di Vigilancia a declara cu e Yonadabnan, esta, e otro carnenan, “mester siña cu consagracion [dedicacion] y santificacion ta un rekisito pa tur hende cu kier bira parti di e multitud grandi y biba riba tera.” E vision di e multitud grandi registra den e buki di Revelacion ta bisa cu nan a “laba nan pañanan y a haci nan blanco den e sanger di e Lamchi” y ta rindi sirbishi sagrado na Yehova “di dia y anochi den su tempel.” (Revelacion 7:9, 14, 15) Cu yudansa di spirito santo, e otro carnenan ta haci tur loke nan por pa cumpli cu Yehova su rekisitonan di santidad.—2 Corintionan 7:1.

 Haci Bon pa e Rumannan di Cristo

13, 14. (a) Segun Hesus su comparacion di carne y cabrito, di kico salbacion di e otro carnenan ta depende? (b) Awor den e tempo di fin, con e otro carnenan a yega di haci bon pa e rumannan di Cristo?

¹³ Hesus a hala atencion na e relacion intimo cu ta existi entre e otro carnenan y e tou chikito den su comparacion di carne y cabrito cu a forma parti di su profecia tocante “e fin.” Den e comparacion ei, Cristo a mustra bon cla cu salbacion di e otro carnenan ta estrechamente liga cu e manera cu nan ta trata e unginan, kendenan el a yama ‘rumannan di mi.’ El a bisa: “E rei lo bisa esnan na su man drechi: ‘Bin, boso cu ta bendiciona di mi Tata, hereda e reino cu ta prepara pa boso desde e fundacion di mundo. . . . Di berdad mi ta bisa boso, tur loke boso a haci pa un di esnan di mas chikito di e rumannan aki di mi, ta pa mi boso a hacie.’”—Mateo 24:3; 25:31-34, 40.

¹⁴ E expresion “tur loke boso a haci” ta referi na e apoyo amoroso cu nan ta duna e rumannan di Cristo engendra pa spirito. E mundo di Satanas a trata nan como stranhero. Algun di nan asta a ser tira den prizon. Nan a yega di falta cuminda, paña apropiado y cuido medico. (Mateo 25:35, 36, NW, nota na pia di pagina) Awor den e tempo di fin, for di aña 1914, hopi di e unginan a yega di haya nan mes den situacionnan asina. Historia moderno di Testigonan di Yehova ta comproba cu nan compañeronan leal, e otro carnenan, motiva door di spirito santo, a sali na nan yudansa.

15, 16. (a) Principalmente den ki actividad e otro carnenan a yuda e rumannan ungi di Cristo riba tera? (b) Con e unginan a expresa nan aprecio pa e otro carnenan?

¹⁵ E rumannan ungi di Cristo a ricibi apoyo activo di e otro carnenan, principalmente pa cumpli cu e encargo cu Dios a duna nan di ‘predica e evangelio den henter mundo como un testimonio na tur nacion.’ (Mateo 24:14; Juan 14:12) Segun cu e cantidad di unginan riba tera a bin ta baha atrabes di añanan, e otro carnenan si a aumenta na cantidad, te cu awor literalmente tin miyones di nan. Miles di nan a sirbi como evangelisado di tempo completo—pionero y misionero—plamado e bon nobo di Reino “te na e parti mas aleha di mundo.” (Echonan 1:8) Otronan ta participa den e trabou di duna testimonio te caminda nan por, y ta apoya e obra importante aki financieramente.

¹⁶ E rumannan ungi di Cristo tin un gran aprecio pa e apoyo leal di nan compañeronan, e otro carnenan! Nan sintimentonan ta bon expresa den e buki Siguridad mundial bao di “Prinz di Paz”, cu e esclabo fiel a percura na 1986. E ta bisa: “Desde Guera Mundial II, cumplimento di e profecia di Hesus pa e ‘conclusion di e sistema di cosnan’ ta debi principalmente na e papel cu e ‘multitud grandi’ di ‘otro carne’ ta hunga. . . . Pues, masha danki mes ta ser duna na e ‘multitud grandi’ internacional di hopi idioma pa e papel grandi cu nan ta hunga cumpliendo cu e profecia [di Hesus] den Mateo 24:14!”

‘Nan No Ta Wordo Haci Perfecto sin Nos’

17. Den ki manera esnan fiel di pasado cu lo resusita riba tera lo “no wordo haci perfecto sin” e unginan?

¹⁷ Apostel Pablo, papiando como un di e  unginan, a skirbi lo siguiente tocante e homber y mohenan fiel cu a biba prome cu Cristo: “Tur esakinan cu a haya aprobacion pa medio di nan fe no a ricibi loke a wordo priminti, pasobra Dios a provee algo miho pa nos [e unginan], pa nan no wordo haci perfecto sin nos.” (Hebreonan 11:35, 39, 40) Durante e Milenio, Cristo y su 144.000 rumannan ungi den shelo lo actua como rei y sacerdote, y lo trece e beneficionan di Cristo su sacrificio di rescate riba tera. Asina, e otro carnenan lo “wordo haci perfecto” den mente y curpa.—Revelacion 22:1, 2.

18. (a) Kico echonan biblico mester yuda e otro carnenan comprende? (b) Cu ki speransa e otro carnenan ta warda riba “e revelacion di e yiunan di Dios”?

¹⁸ Tur esaki mester pone e otro carnenan mira dicon e Scritura Griego Cristian ta hala asina tanto atencion na Cristo y su rumannan ungi den e papel central cu nan ta hunga den cumplimento di Yehova su proposito. Pesei, pa e otro carnenan ta un privilegio di por apoya e clase di Cristiannan ungi den tur manera cu nan por, mientras cu nan ta spera riba “e revelacion di e yiunan di Dios” na Armagedon y durante e Milenio. Nan tin e speransa di ‘wordo libra for di sclabitud na corupcion pa drenta den e libertad glorioso di e yiunan di Dios.’—Romanonan 8:19-21.

Uni den e Spirito na e Conmemoracion

19. Kico “e spirito di e berdad” a haci pa e unginan y nan compañeronan, y con nan lo ta specialmente uni durante e anochi di 28 di maart?

¹⁹ Den su oracion final riba e anochi di 14 di nisan di aña 33 E.C., Hesus a bisa: “Mi ta haci peticion . . . pa nan tur por ta un, mescos cu abo, Tata, ta den union cu mi y ami ta den union cu bo, pa nan tambe por ta den union cu nos, pa e mundo por kere cu ta abo a manda mi.” (Juan 17:20, 21, NW) Motiva pa amor, Dios a manda su Yiu pa duna su bida pa salbacion di e unginan y e mundo, esta, humanidad obediente. (1 Juan 2:2) “E spirito di e berdad” a uni e rumannan di Cristo y nan compañeronan. Dia 28 di maart, despues cu solo baha, tur dos grupo lo reuni hunto pa conmemora e morto di Cristo y corda tur loke Yehova a haci pa nan, pa medio di e sacrificio di su Yiu stima, Cristo Hesus. Laga nan presencia na e ocasion importante ei fortalece nan unidad y renoba nan determinacion pa sigui haci e boluntad di Dios, y asina mustra cu ta un goso pa nan ta entre esnan cu Yehova ta stima.

Como Repaso

• Na ki tempo “e spirito di e berdad” a ser manda riba e prome Cristiannan, y con el a resulta di ta un “ayudante”?

• Con e unginan por sa cu nan a ricibi e yamada pa shelo?

• Den ki maneranan e spirito di Dios ta obra den e otro carnenan?

• Con e otro carnenan a haci bon pa e rumannan di Cristo, y dicon Bijbel ta bisa cu nan lo “no wordo haci perfecto sin” e unginan?

[Preguntanan di Estudio]

[Plachi na pagina 21]

“E spirito di e berdad” a ser drama riba e disipelnan na Pentecoste di aña 33 Era Comun.

[Plachi na pagina 23]

E otro carnenan a haci bon pa e rumannan di Cristo door di apoya nan pa cumpli cu e comision di predica cu Dios a duna nan