Kico Limpiesa Ta Nifica Realmente?

DEBI cu durante siglo 18 y 19 e situacion di higiena na Merca y Europa tawata asina teribel, misioneronan di e tempo ei a cuminsa predica loke nos lo por yama “un doctrina di limpiesa.” Segun e doctrina aki, sushedad ta mescos cu pica, y limpiesa ta trece hende mas cerca Dios. Kisas ta pesei tin un dicho na Ingles cu ta bisa cu despues di debocion, limpiesa ta e cos mas importante.

Na Merca, Salvation Army [Leger des Heils], funda door di William cu Catherine Booth, a sigui e mesun pensamento aki. Segun e buki Health and Medicine in the Evangelical Tradition (Salu y Medicina den Tradicion Evangelico), un di nan prome lemanan tawata: “Habon, Sopi y Salbacion.” Despues, ora cu Louis Pasteur y otronan a demostra sin luga na duda cu bacteria tin di aber cu malesa, esaki a duna mas motivacion pa bini cu miho programanan pa salu publico. El a establece un base cientifico tambe pa e programanan aki.

Algun di e medidanan cu nan a tuma mesora ta di no exigi mas pa un testigo den corte sunchi Bijbel, y stop di uza un solo cup na scol y stacionnan di trein pa tur hende bebe for di dje. Nan a asta purba di stop uzo di un solo calis di biña durante sirbishinan religioso, y laga cada  ken haya nan mes cup. Si, ta parce cu e prome pioneronan ei tawatin basta exito den cambia hende su actitud tocante limpiesa. Un escritor a asta bisa cu, door di nan trabou, hende a “namora di limpiesa.”

Pero parce cu e “namoracion” aki tawata algo superficial so. Den poco tempo, comerciantenan dinamico a cohe un simpel habon y hacie un producto di beyesa. Propagandanan bon pensa a pone e consumido kere cu door di uza cierto productonan di higiena personal, lo e haya mas status cu otro hende. Television ta sigui promove e fantasia aki. Rara bes bo ta mira e hendenan exitoso y glamoroso na television ta limpia cas, limpia cura, piki sushi di cas of lanta sushi di nan cacho cu pushi.

Ademas, tin hende ta rasona cu door di bai trabou bo ta haya placa, pero cu trabou di cas y otro trabounan di limpiesa no. Y pakico nan lo precupa nan mes cu medio ambiente si nan no ta ser paga p’e? Un di e cosnan cu e manera di pensa aki ta hiba na dje ta cu awendia hende ta kere cu limpiesa ta encera higiena personal so, y nada mas.

Dios Su Punto di Bista di Limpiesa

No tin duda cu e esfuersonan di antes ei pa siña hende biba limpi a yuda mehora nan condicionnan di bida. Y esei ta logico tambe, pasobra limpiesa ta un cualidad cu ta pertenece na e Dios santo y limpi, Yehova. Limpiesa a origina cu ne. E ta siña nos beneficia nos mes door di bira santo y limpi den tur loke nos haci.—Isaias 48:17; 1 Pedro 1:15.

Yehova Dios ta ehemplar den tur sentido. Mescos cu t’e caso cu tur su otro cualidadnan invisibel, bo por mira limpiesa tambe den su creacion visibel. (Romanonan 1:20) Ta bisto cu creacion mes no ta causa ningun polucion permanente. Tera, cu tur su ciclonan ecologico, ta masha bon den tene su mes limpi. E ta diseña pa nos por biba limpi y salu riba dje. Un creacion limpi asina mester ta di un Diseñado cu ta interesa den limpiesa. Pesei nos por conclui cu adoradonan di Dios mester ta limpi den tur aspecto di nan bida.

Cuater Aspecto di Limpiesa

Bijbel ta identifica cuater aspecto di limpiesa cu adoradonan di Dios mester traha pa cumpli cu ne. Laga nos trata cada un di nan.

Limpiesa spiritual. Mester considera esaki e forma mas importante di limpiesa, pasobra hende su speransa di bida eterno ta depende di dje. Toch, hopi bes e ta e aspecto di limpiesa cu hende ta neglisha mas. Den poco palabra, ser spiritualmente limpi kier men cu nunca nos no ta crusa e liña cu Dios a hala entre adoracion berdadero y adoracion falso, pasobra den Dios su bista tur tipo di adoracion falso ta impuro. Apostel Pablo a skirbi: “Sali for di meimei di nan y separa boso mes, SEÑOR ta bisa. Y no mishi cu loke ta impuro; y lo mi ricibi boso.” (2 Corintionan 6:17) Disipel Santiago tambe tawata hopi spesifico riba e asunto aki: “Esaki ta e religion puro y sin mancha den bista di nos Dios y Tata: . . . conserva bo mes liber di mancha di mundo.”—Santiago 1:27.

Dios a mustra bon cla cu E ta desaproba mesclamento di adoracion falso cu su adoracion berdadero. Hopi bes adoracion falso ta inclui practicanan impuro, idolo y diosnan detestabel. (Jeremias 32:35) Pesei Bijbel ta urgi Cristiannan berdadero pa nan no tin nada di aber cu adoracion impuro.—1 Corintionan 10:20, 21; Revelacion 18:4.

Limpiesa moral. Aki tambe Dios a hala un liña bon cla entre loke ta limpi y loke ta impuro. En general, mundo a para bira manera loke Efesionan 4:17-19 ta describi: “Tapa cu scuridad den nan comprendemento, exclui di e bida di Dios . . . Perdiendo tur heful, [nan] a entrega nan mes na sensualidad pa, cu golosidad, nan practica tur clase di impuresa.” E moda di pensa inmoral ei ta manifesta su mes den hopi manera; tin bes abiertamente, y  tin bes den formanan sutil. Pesei Cristiannan mester paga tino.

Hende cu ta stima Dios sa cu prostitucion, homosexualidad, sex prome cu casa y pornografia ta cosnan cu ta bai contra Yehova su norma di limpiesa moral. Sinembargo, den mundo di entretenimento y moda, e practicanan aki ta cos di tur dia. Pesei, Cristiannan mester paga tino contra e tipo di tendencianan ei. Si un hende bai un reunion Cristian of un encuentro social bisti cu paña cortico of cu ta saca mucho di su curpa, e ta hala mucho atencion na su curpa, y e ta un falta di decencia. Bisti asina ta trece pensamento mundano den e asociacion Cristian, y e por lanta pensamento impuro den otro hende tambe. Riba e area aki Cristiannan tin cu traha duro pa mustra “e sabiduria di ariba.”—Santiago 3:17.

Limpiesa mental. Nos mente no mester ta manera un cashi di pensamento impuro. Hesus a spierta nos tocante pensamento impuro ora el a bisa: “Ken cu wak un mohe pa dese’e, ya caba el a comete adulterio cu ne den su curason.” (Mateo 5:28; Marco 7:20-23) Mescos ta conta pa wakmento di potret y pelicula pornografico, lesa relato di actividadnan sexual indecente y scucha cantica cu letra inmoral of dobel sentido. Pues, Cristiannan mester evita di contamina nan mes door di pensa riba cos impuro cu por produci palabra y accion impuro den nan.—Mateo 12:34; 15:18.

Limpiesa fisico. Den Bijbel, santidad y limpiesa fisico tin hopi di aber cu otro. Por ehempel, Pablo a skirbi: “Stimanan, laga nos purifica nos mes di tur impuresa di carni y spirito, y asina perfecciona nos santidad den e temor di Dios.” (2 Corintionan 7:1) Pesei, Cristiannan berdadero mester haci nan best pa tene nan curpa, nan cas y nan ambiente di biba limpi y na ordo, te caminda cu sircunstancia ta permiti. Asta caminda cu awa pa laba cos y pa baña cu ne ta scars, Cristiannan mester haci nan best pa ta limpi y representabel.

Ademas, limpiesa fisico no ta pas cu ningun forma di uzo di tabaco, ni bebemento di mas, ni uzo di droga, pasobra e cosnan aki ta susha y daña nos curpa. E wardado di carne describi den Cantica di Salomon a aprecia e dushi fragancia di e bisti di e mucha mohe Sulamita. (Cantica di Salomon 4:11) Ta amoroso di nos parti pa presta atencion na nos higiena personal, pasobra nos kier evita di manda holo desagradabel riba hende rond di nos. Perfume y colonia por ta agradabel, pero nan no por tuma e luga di baño regular y paña limpi.

Tene un Punto di Bista Balansa

Den loke ta toca limpiesa fisico, hende sa bai na extremo. Di un banda, ser fanatico tocante  limpiesa por stroba nos di gosa di bida. Ademas e por exigi hopi tempo balioso. Di otro banda, un cas sushi y mal teni por sali caro pa drecha. Meimei di e dos extremonan aki tin e manera practico y balansa di tene nos cas limpi y representabel.

Tene cos simpel. Un cas of camber yen di potoshi ta dificil pa limpia, y por ta mas dificil pa detecta sushedad ora tin yen di cos tur caminda. Un cas simpel y na ordo ta mas facil pa limpia. Bijbel ta recomenda nos masha pa hiba un estilo di bida simpel: “Teniendo cuminda, paña y dak, nos lo keda contento cu esakinan.”—1 Timoteo 6:8; NW.

Tene cos na ordo. Un cas limpi ta responsabilidad di tur hende cu ta biba aden. Hopi bes un cas ta bira bruha debi cu e cambernan ta bruha. Den un cas na ordo, tur cos ta na nan luga. Por ehempel, paña sushi no mester ta riba flur di camber. Piyo ainda, co’i hunga y herment cu keda benta abou por ta peligroso. Hopi accidente na cas ta bini door di e mal custumber di no pone cos na nan luga.

Claramente, limpiesa y bida Cristian ta dos cos inseparabel. Profeta Isaias a yama bida deboto “e Caminda Grandi di Santidad.” Y e ta menciona un asunto serio tambe: “Hende impuro lo no pasa riba dje.” (Isaias 35:8) Si, door di desaroya bon custumber di limpiesa awor, nos ta duna evidencia fuerte di cu nos tin fe den Dios su promesa cu pronto lo E haci tera bira un paradijs limpi. E ora ei, tur caminda riba e bunita planeta aki, tur hende lo glorifica Yehova Dios door di cumpli completamente cu su normanan perfecto di limpiesa.—Revelacion 7:9.

[Plachi na pagina 6]

Un cas limpi ta responsabilidad di tur hende cu ta biba aden

[Plachi na pagina 7]

Tera ta masha bon den tene su mes limpi