Martirnan di Tempo Moderno Ta Duna Testimonio na Suecia
Informe di Proclamadonan di Reino
Martirnan di Tempo Moderno Ta Duna Testimonio na Suecia
E PALABRA Griego pa “testigo” ta martir. Ta di einan e palabra na Papiamento “martir” a bini, cu ta nifica “un hende cu ta duna testimonio door di muri.” Hopi Cristian di prome siglo a duna testimonio di Yehova door di muri pa nan fe.
Mescos, den siglo 20 miles di Testigo di Yehova a muri na man di Hitler su compinchinan door cu nan a mantene nan neutralidad den asuntonan politico y nacionalista. E martirnan aki di tempo moderno tambe ta sirbi como un excelente testimonio. Esei ta loke a tuma luga resientemente na Suecia.
En coneccion cu e di 50 aniversario di fin di Segunda Guera Mundial, gobierno di Suecia a cuminsa un campaña di educacion na nivel nacional tocante Holocausto. Nan a yama e proyecto Historia Bibo. Testigonan di Yehova a keda invita pa participa y comparti nan experencianan.
E Testigonan a responde door di aregla un exhibicion titula E Victimanan Lubida di Holocausto. A inaugura e exhibicion na e Salon di Asamblea di Testigonan di Yehova na Strängnäs. Tawatin Testigonan sobreviviente di Holocausto presente pa comparti nan experencianan cu e mas di 8.400 bishitantenan cu a bini riba e prome dia! Pa fin di 1999, e exhibicion a aparece na mas cu 100 museo y biblioteca publico rond Suecia, y mas o menos 150.000 hende a mir’e. Entre e bishitantenan tawatin funcionarionan di gobierno cu a duna comentarionan positivo tocante loke nan a mira.
Niun otro evento relaciona cu actividadnan di Testigonan di Yehova na Suecia a yega di haya un cobertura publico asina extenso, ni no a ricibi asina tanto publicidad positivo. Hopi di e bishitantenan a puntra: “Dicon nunca prome boso no a conta nos loke boso a pasa aden durante Holocausto?”
Despues cu e exhibicion a aparece den nan area, un congregacion a informa un aumento di 30 porshento den studionan di Bijbel na cas! Un Testigo a invita un colega di trabou pa bai wak e exhibicion. E colega a acepta cu gusto, y el a bai cu un amiga. Despues, e amiga a bisa cu e no por caba di comprende con hende por tin fe asina fuerte cu nan ta prefera di ser ehecuta na luga di firma un documento pa nenga nan fe. Esei a hiba na mas combersacion, y a cuminsa un studio di Bijbel cu ne.
Mescos cu e martirnan di prome siglo, e martirnan fiel aki di siglo 20 a duna testimonio cu curashi di cu Yehova ta e unico Dios berdadero, merecedor di nos fe y lealtad total.—Revelacion 4:11.
[Reconocemento pa Potret na pagina 13]
Preso den un campamento: Państwowe Muzeum Oświęcim-Brzezinka, cortesia di USHMM Photo Archives