Pregunta di Lector

Te na ki grado e restriccionnan pa matrimonio entre miembronan di famia cu e Lei di Moises ta papia di dje ta conta pa Cristiannan awe?

E Lei cu Yehova a duna e pueblo di Israel no ta duna masha detaye en cuanto ceremonia y proceduranan di casamento. Sinembargo, loke si e ta describi ta prohibicion contra cierto relacionnan di matrimonio. Por ehempel na Levitico 18:6-20, nos ta haya un lista di relacion prohibi cu tin di aber cu “famia yega.” E pasashi aki di Bijbel ta describi en detaye cua miembronan di famia no mester tene relacion sexual cu otro. Claro cu Cristiannan no ta cai bou di e Lei di Moises ni nan no ta mara na su decretonan. (Efesionan 2:15; Colosencenan 2:14) Pero, esaki no ta nifica cu Cristiannan por simplemente ignora esaki ora nan ta scohe un persona pa casa cu ne. Tin hopi motibo pa esei.

Pa cuminsa, tin hopi lei di gobierno cu ta regula matrimonio entre miembronan di famia pega, y basicamente Cristiannan ta bou di obligacion pa obedece e leinan di e pais caminda nan ta biba. (Mateo 22:21; Romanonan 13:1) Claro cu e leinan ei ta varia di un luga pa otro. Mayoria di e leinan moderno aki ta basa primeramente riba factornan genetico. Ta bon conoci cu matrimonio entre miembronan di famia hopi pega tin hopi chens di hiba na yiunan cu ta nace cu defecto genetico y malesa. Pa e motibo ei y pasobra nan ta “somete nan mes na e autoridadnan cu ta goberna”, Cristiannan ta obedece leinan local pa matrimonio ora nan ta casa.

Ademas, tin e asunto di kico ta aceptabel y kico no ta aceptabel den e comunidad caminda un persona ta biba. Casi tur cultura tin regla y custumbernan cu ta censura matrimonio entre hendenan cu ta famia hopi pega di otro. Hopi bes nan ta considera e unionnan aki como incesto y pesei algo prohibi. Maske e relacionnan prohibi por varia hopi den diferente cultura, “generalmente, mas cerca e relacion genetico entre e dos personanan ta, mas fuerte y hopi mas vigoroso e prohibicion y desaprobacion pa nan tene relacion sexual ta bira”, segun The Encyclopædia Britannica. Pues, asta ora no ta trata di relacion di incesto, Cristiannan no kier actua sin tene cuenta cu custumbernan estableci of cu sintimentonan rasonabel di e comunidad. Asina nan ta evita di trece reproche riba e congregacion Cristian of riba e nomber di Dios.—2 Corintionan 6:3.

Nos no mester pasa por halto di e consenshi cu Dios a duna nos. Tur hende a nace cu un sentido di loke ta corecto y incorecto, di bon y malo. (Romanonan 2:15) A menos cu nan consenshi a bira sin heful y a cria cayo door di practicanan perverso, e ta bisa nan kico ta normal y corecto, y kico ta abnormal y ofensivo. Yehova a referi na e echo aki ora el a duna e Israelitanan su lei contra matrimonio entre famia pega. Nos ta lesa: “Boso no mester haci manera nan ta haci na tera di Egipto, caminda boso tawata biba, ni haci loke nan ta haci na tera di Canan, caminda mi ta hiba boso; boso no mester cana den nan statuutnan.” (Levitico 18:3) Cristiannan ta duna balor na nan consenshi basa riba Bijbel y nan no ta permiti e sentido troci di loke ta bon y malo cu e nacionnan tin, corumpi nan consenshi.—Efesionan 4:17-19.

Na ki conclusion nos por yega anto? Maske Cristiannan no ta bou di e Lei di Moises, nan consenshi si ta bisa nan bon cla cu matrimonio entre famia pega—manera tata cu yiu mohe, mama cu yiu homber, ruman cu ruman—ta totalmente inaceptabel den e comunidad Cristian. * Segun cu e circulo di famia ta expande, Cristiannan ta reconoce cu tin lei y statuutnan cu ta regla matrimonio legal y cu tin normanan cu socialmente y culturalmente ta aceptabel. Nos mester tene debido cuenta cu esakinan pa asina nos por cumpli cu e mandamento di Bijbel: “Laga matrimonio wordo honra pa tur hende.”—Hebreonan 13:4.

[Nota]