Sabi na Nan Manera

UN PROVERBIO Nigeriano ta bisa: “Hende grandi tin sabiduria, pero mucha ta sabi na nan manera.” Y Edwin, un anciano Cristian na Nigeria, a descubri cu esaki ta berdad.

Un dia Edwin a haya un caha di metal bou di su lessenaar na cas.

“Di ken e cos aki ta?” Edwin a puntra su tres yiunan.

“Di mi”, Emmanuel di ocho aña a contesta. Mesora el a agrega cu e caha di hero tur na frusto aki di 12 centimeter cu un gleuf fini ariba tawata pa contribucion pa e obra mundial di Testigonan di Yehova. El a splica: “Door cu no ta tur dia mi ta bai Salon di Reino, m’a dicidi di traha un caha pa ora mi no uza mi cen di cuminda, mi por tir’e den e caha.”

Na cas e tata di Emmanuel tawatin un sparpot den cua nan tawata spar pa bai congreso di districto. Pero door cu e famia a haya nan den preta, nan a uza e placa aki. Pa haci sigur cu no ta uza e placa cu e ta spar pa contribucion pa nada otro, Emmanuel a cohe un bleki bieu y a hib’e pa un lasdo sey’e. Ora e lasdo a haya sa kico Emmanuel kier a haci cu e bleki, el a uza hero bieu pa traha un caha pa Emmanuel. Su ruman homber di cinco aña, Michael, tambe a pidi un caha.

Sorprendi pa loke e muchanan a haci, Edwin a puntra nan dicon nan a laga traha e cahanan. Michael a contesta: “Mi kier contribui!”

Sin cu nan mayornan tawata sa, Emmanuel, Michael y Uchei, nan ruman mohe di nuebe aña, tawata spar parti di nan cen pa cumpra cuminda y tir’e den e cahanan. Di unda nan a haya e idea? Asina cu e muchanan tawata suficiente grandi pa tene placa den nan man, nan mayornan a siña nan pa tira algo den caha di contribucion na Salon di Reino. Sin duda, e muchanan a siña nan les bon.

Ora e cahanan a yena, nan a habri nan. Na tur nan a spar un montante di 5,63 florin. Esei no ta un suma chikito pa e chikitinnan aki cu ta biba den un pais caminda e entrada anual ta djis un par di shen florin. Donacionnan boluntario asina ta sostene e obra di predica cu Testigonan di Yehova ta haci awor den 235 pais rond mundo.