Un Stad Riba Sero

DEN su famoso Sermon Riba Sero, Hesus a bisa su disipelnan: “Boso ta e lus di mundo. Un stad situa riba un sero no por keda scondi.”—Mateo 5:14.

Tawatin hopi mas stad di Hudea y Galilea situa den sero cu den e vayenan abou. Siguridad tawata e motibo principal pakico hende a scohe sitionan den sero. Ademas di ehersitonan invasor, tawatin bandanan di atracado cu sa causa destruccion na pueblonan Israelita. (2 Reinan 5:2; 24:2) Tawata mas facil pa ciudadanonan balente defende un grupo di cas pega cu otro riba un sero, cu un stad riba un tereno plat cu tawatin mester di murayanan mas halto pa proteha nan.

Door cu hopi bes e casnan Hudiu tawata blancha cu calki, tawata facil pa for di kilometernan leu mira henter un grupo di cas pega cu otro riba top di un sero. (Echonan 23:3) Debi na e briyo di e solo di Palestina, e stadnan den sero aki tawata briya manera un lus di ‘vuurtoren’, mescos cu e stadnan na costa Mediteraneo ta briya te awe.

Hesus a uza e aspecto notabel aki di e cunucunan di Galilea y Hudea pa siña su siguidonan e papel di un berdadero Cristian. El a bisa nan: “[Di igual manera] laga boso lus briya dilanti di hende di tal manera cu nan por mira boso bon obranan y glorifica boso Tata cu ta den shelo.” (Mateo 5:16) Maske Cristiannan no ta haci bon obra djis pa haya elogio di hende, hende no ta keda sin ripara nan bon conducta.—Mateo 6:1.

Tal bon conducta ta bisto specialmente durante congresonan di districto di Testigonan di Yehova. Un corant na Spaña cu a referi na un congreso resien, a informa: “Otro religionnan ta perdiendo interes den temanan religioso, pero esaki no ta e caso cerca Testigonan di Yehova. Nan no kier pa Bijbel perde su balor, pesei nan ta practica loke e Palabra di Dios ta bisa.”

Thomas, e ‘beheerder’ di un stadion na nortost di Spaña cu Testigonan ta uza regularmente, gusta di ta den compania di hende cu ta practica loke e Palabra di Dios ta bisa. El a pospone e dia pa e baha cu pension cu varios siman pa e por tawata presente na un congreso di districto di Testigonan di Yehova. Ora cu hopi di e delegadonan, inclusivo e hobennan, a acerc’e despues di e congreso pa gradicie pa su coperacion atrabes di añanan y pa dese’e tur cos bon durante su pension, lagrima a basha for di su wowo. El a bisa: “E miho experencia den mi bida ta di por a conoce boso.”

Un stad riba un sero ta capta atencion di observadonan pasobra e ta forma un contraste skerpi cu horizonte y pasobra tur cas blanco den e stad aki ta refleha e lus di solo. Asina tambe, Cristiannan berdadero ta sobresali como diferente pasobra nan ta haci esfuerso pa sigui normanan biblico eleva di honestidad, moralidad y compasion.

Ademas, Cristiannan ta refleha e lus di e berdad via nan actividad di predica. Apostel Pablo a bisa di e Cristiannan di prome siglo: “Como cu nos tin e ministerio aki, segun e misericordia cu nos a ricibi, nos no ta perde animo . . . ma pa medio di e manifestacion di berdad nos ta recomenda nos mes na e consenshi di tur hende den bista di Dios.” (2 Corintionan  4:1, 2) Aunke nan a haya nan cu persecucion tur caminda cu nan a predica, Yehova a bendiciona nan ministerio. Pesei pa rond di aña 60 Era Comun, Pablo por a skirbi cu e bon nobo a ser predica “den henter creacion bou di shelo.”—Colosencenan 1:23.

Awe Testigonan di Yehova tambe ta tuma na serio nan responsabilidad di ‘laga nan lus briya dilanti di hende’, manera Hesus a manda. Predicando y tambe cu yudansa di material imprimi, Testigonan di Yehova ta plama e bon nobo di Reino den 235 pais rond mundo. Pa e lus di berdad di Bijbel alcansa mas tanto hende posibel, nan a haci nan publicacionnan basa riba Bijbel disponibel den rond di 370 idioma.—Mateo 24:14; Revelacion 14:6, 7.

Na hopi pais Testigonan a acepta e reto di siña idioma di e hendenan cu a emigra for di otro paisnan caminda e trabou di predica tawata prohibi of ta prohibi ainda. Por ehempel, un cantidad di e ciudadnan mas grandi na Nort America a haya nan cu un fluho di hende for di China y Rusia. Testigonan local a haci esfuerso pa siña Chines, Ruso y otro idiomanan pa nan por predica e bon nobo na esnan cu a caba di yega. Es mas, Testigonan ta siña diferente idioma via cursonan acelera di manera cu nan por predica na otronan tanten cu e teritorio ta “blanco pa wordo cosecha.”—Juan 4:35.

Profeta Isaias a profetisa: “Lo sosode den e ultimo dianan cu e sero di e cas di SEÑOR lo wordo estableci como e sero principal, y lo wordo halsa mas halto cu e seritonan; y tur nacion lo basha bai na dje.” Mediante nan conducta y tambe nan ministerio, Testigonan di Yehova ta yuda hende tur caminda pa bini na “e sero di e cas di SEÑOR” pa nan ser instrui tocante e camindanan di Dios y pa nan siña cana den e berea di Dios. (Isaias 2:2, 3) Manera Hesus a señala, e resultado felis ta cu hunto nan ‘ta glorifica nan Tata celestial’, Yehova Dios.—Mateo 5:16; 1 Pedro 2:12.