Storia di Bida

Yehova A Siña Nos Aguante y Perseverancia

SEGUN E RELATO DI ARISTOTELIS APOSTOLIDIS

E stad Ruso Pyatigorsk ta situa na pia di e Seronan di Caucasus. E ta famoso pa su fuentenan di mineral y clima suave. Mi a nace einan na 1929. Mi mayornan tawata refugiadonan Griego. Dies aña despues di e teribel experencia di limpiesa, teror y purificacion etnico bou di e sistema di Stalin, nan a obliga nos muda bai Grecia. Asina nos a bira refugiado atrobe.

DESPUES cu nos a muda bai Piraiévs, Grecia, e palabra “refugiado” a haya henteramente un otro nificacion pa nos. Nos a sinti nos completamente manera stranhero. Maske ami cu mi ruman homber tawatin nomber di dos filosofo Griego famoso, esta, Socrates y Aristoteles, casi ningun hende no tawata uza nos nomber. Tur hende tawata yama nos Ruso chikito.

Djis despues cu Segunda Guera Mundial a dal aden, mi mama stima a muri. E tawata curason di nos famia, pues su morto tawata un golpi devastador. Door cu e tawatin un par di tempo malo, el a siña mi haci hopi trabou di cas. E entrenamento aki a resulta util pa mi mas despues.

Guera y Liberacion

Debi na guera, ocupacion door di Nazinan y e bombardeo sin misericordia door di forsanan Alia, cada dia a parce di ta e ultimo. Tawatin hopi pobresa, hamber y morto. For di mi 11 aña mi mester a traha duro hunto cu mi tata pa percura pa nos tres. Guera hunto cu su efectonan y tambe mi poco conocemento di Griego a stroba mi di haya educacion na scol.

 E ocupacion Aleman riba Grecia a termina na october 1944. Djis despues di esei, mi a haya contacto cu Testigonan di Yehova. Meimei di e desesperacion y miseria di e tempo ei, e speransa cu Bijbel ta duna di un futuro briyante bou di e Reino di Dios a conmove mi curason. (Salmo 37:29) Dios su promesanan di bida sin fin bou di condicionnan pacifico aki riba tera tawata un berdadero remedi pa mi heridanan. (Isaias 9:7) Na 1946 ami cu mi tata a batisa como simbolo di nos dedicacion na Yehova.

E siguiente aña mi tawatin e goso di ricibi mi prome asignacion como e sirbido di publicidad (yama despues sirbido di revista) den e di dos congregacion cu a ser forma na Piraiévs. Nos teritorio tawata di Piraiévs te cu Eleusis, un distancia di mas o menos 50 kilometer. E tempo ei tawatin hopi Cristian ungi den e congregacion. Mi tawatin e privilegio di traha hunto cu nan y siña for di nan. Mi a gusta asocia cu nan pasobra nan tawatin masha hopi experencia pa conta di esfuersonan tenaz cu nan mester a haci pa cumpli cu e trabou di predica. E manera cu nan a hiba nan bida a mustra bon cla cu pa un hende sirbi Yehova fielmente e tin mester di hopi pasenshi y perseverancia. (Echonan 14:22) Mi ta masha contento cu awendia tin mas cu 50 congregacion di Testigonan di Yehova den e area ei!

Un Problema Inespera

Algun tempo despues mi a bin conoce Eleni, un lief mucha mohe Cristian yen di celo den e stad di Patras. Nos a compromete na fin di aña 1952. Sinembargo, despues di un par di luna, Eleni a bira hopi malo. Docternan a descubri cu e tawatin un tumor celebral, y su condicion tawata critico. Mester a oper’e mesora. Despues di hopi esfuerso nos a logra haya un docter na Atenas cu—apesar di e echo cu e tempo ei no tawatin e medionan adecua disponibel—tawata dispuesto pa tene cuenta cu nos creencianan religioso y haci e operacion sin sanger. (Levitico 17:10-14; Echonan 15:28, 29) Despues di e operacion e docternan tawata optimista tocante e recuperacion di mi comprometida, pero toch cauteloso y nan no a exclui e posibilidad cu e tumor por a bini bek.

Kico lo mi mester a haci den e situacion aki? En bista di e sircunstancianan cu a cambia, lo mi no mester a kibra e compromiso y libra mi mes di problema? No! Ora mi a compromete mi mes, mi a haci un promesa y mi tawata kier pa mi si, keda si. (Mateo 5:37) Ningun rato so mi no a permiti mi mes pensa otro. Despues cu Eleni a recupera parcialmente bou di cuido di su ruman mohe mas grandi, nos a casa na december 1954.

Tres aña despues Eleni a haya un recaida, y e mesun docter a bolbe oper’e. E biaha aki e docter a bai mas profundo den e celebro pa e por a saca e tumor completo. Resultado di esei tawata cu mi casa a keda parcialmente paralisa y e parti di e celebro cu ta cordina su abla a keda gravemente afecta. Awor nos tur dos a haya nos cu un serie nobo di problema complica. Asta e tarea di mas simpel a bira un obstaculo grandi pa mi casa stima. Su  situacion cu a keda bai atras a pone cu nos mester a haci cambionan drastico den nos rutina diario. Y mas cu tur cos e situacion a rekeri hopi aguante y perseverancia.

Ta e ora ei e entrenamento cu mi a ricibi di mi mama a resulta di balor incalculabel. Tur mainta trempan, mi tawata prepara tur e ingredientenan pa cushina y Eleni tawata cushina. Hopi bes nos tawata invita hende na cas. Entre nos bishitanan tawatin ministernan di tempo completo, hende cu nos a studia Bijbel cu ne y compañeronan Cristian di nos congregacion den necesidad. Nan tur tawata haya cu e cumindanan aki tawata masha dushi mes! Ami cu Eleni tambe a copera pa haci otro trabounan di cas di tal forma cu nos cas tawata limpi limpi. E situacion aki cu a exigi masha hopi di nos a dura 30 aña largo.

Celo Apesar di Enfermedad

Pa ami y otro hende tawata masha emocionante pa mira cu nada no por a mengua mi casa su amor pa Yehova ni su celo pa su sirbishi. Cu tempo y esfuerso persistente, Eleni a logra siña papia uzando masha poco palabra. E tawata gusta acerca hende riba caya cu e bon nobo di Bijbel. Ora mi mester a sali pa haci negoshi, mi tawata bai cu ne y mi tawata parker e auto cerca di un acera druk. E tawata habri e bentana di auto y ofrece e peatonnan E Toren di Vigilancia y Spierta! Un dia el a laga 80 revista den dos ora. Hopi bes e tawata caba cu tur e revistanan mas bieu di e congregacion. Eleni tawata regular den e otro formanan di predicacion tambe.

Durante tur e añanan cu mi casa tawata incapasita, semper e tawata hunto cu mi na e reunionnan. Nunca e no a falta un congreso ni asamblea, ni sikiera ora nos mester a biaha bai den exterior pa motibo di persecucion contra Testigonan di Yehova na Grecia. Apesar di su limitacionnan, contento di dje el a asisti na congresonan na Austria, Alemania, Chipre y otro paisnan. Nunca Eleni no a keha ni bira exigente, ni ora mi a haya mas responsabilidad den e sirbishi di Yehova cu de bes en cuando a haci e situacion fastioso p’e.

Pa loke ta ami, e situacion aki a sirbi como un entrenamento largo den aguante y perseverancia. Hopi bes mi a experencia Yehova su man di yudansa. Rumannan a haci berdadero sacrificio pa yuda nos den tur manera posibel, y e docternan a apoya nos bondadosamente. Maske nos sircunstancia cu a exigi hopi di nos no a permiti mi traha full time, nunca durante tur e añanan dificil aki, nos no a falta e cosnan necesario pa bida. Semper nos a duna maximo prioridad na e interesnan y sirbishi di Yehova.—Mateo 6:33.

Hopi hende a puntra nan mes kico a sostene nos durante e añanan dificil ei. Segun cu mi ta wak atras awor, mi ta realisa cu loke a fortalece nos aguante y perseverancia ta studio personal di Bijbel, oracion sinsero na Dios, asistencia regular na reunionnan Cristian y participacion celoso den e trabou di predica. Semper e palabranan animante di  Salmo 37:3-5 a corda nos: “Confia den SEÑOR y haci loke ta bon; . . . Deleita bo mes den SEÑOR, . . . Encomenda bo caminda na SEÑOR, confia tambe den dje, y e lo hacie.” Un otro versiculo cu tawatin balor pa nos tawata Salmo 55:22: “Tira bo carga riba SEÑOR, y E lo sostene bo.” Manera un yiu cu tin pleno confiansa den su tata, nos no solamente a tira nos carga riba Yehova, sino tambe a lag’e cu ne.—Santiago 1:6.

Dia 12 di april 1987, ora mi casa tawata predica dilanti nos cas, un porta di hero pisa a dal cera su tras, y a bent’e riba acera y herid’e gravemente. Esei a pone cu el a bai den coma y keda den e condicion ei pa tres aña largo. Y na principio di 1990, el a muri.

Sirbiendo Yehova Lo Miho Cu Mi Por

Na 1960 mi a ser nombra como sirbido di congregacion na Nikaia, Piraiévs. Desde e tempo ei mi tawatin e privilegio di sirbi den un cantidad di otro congregacion na Piraiévs. Maske nunca mi mes no tawatin yiu, mi tawatin e goso di yuda hopi yiu spiritual bira stabil den e berdad. Algun di nan ta sirbi awor como anciano di congregacion, sirbido ministerial, pionero y miembro di e famia di Betel.

Despues cu Grecia a bira un pais democratico atrobe na 1975, Testigonan di Yehova por a tene nan congresonan libremente sin cu nan tawatin cu sigui sconde den mondi. E experencia cu algun di nos a haya door di a organisa congreso den exterior a resulta di gran balor. Pesei, mi tawatin e goso y privilegio di sirbi pa hopi aña den varios comite di congreso.

Anto na 1979 a traha plan pa construi e prome Salon di Asamblea na Grecia, parti pafo di Atenas. Mi a haya e asignacion pa organisa y ehecuta e proyecto di construccion inmenso aki. E trabou aki tambe a exigi hopi aguante y perseverancia. Traha tres aña hunto cu cientos di ruman homber y mohe cu tawatin un spirito di sacrificio propio a crea un banchi fuerte di amor y unidad entre nos. E recuerdonan di e proyecto aki lo keda graba den mi curason pa semper.

Satisfaciendo e Necesidad Spiritual di Presonan

Un par di aña despues un porta nobo di oportunidad a habri. Un di e prizonnan di mas grandi di Grecia ta situa banda di e teritorio di mi congregacion na Korydallos. Desde april 1991, mi a haya asignacion pa bishita e prizon aki tur siman como un minister di Testigonan di Yehova. Einan mi tin permit pa conduci studio di Bijbel y reunionnan Cristian cu e presonan cu ta interesa. Hopi di nan a haci cambio grandi, y esei ta duna prueba di e poder inmenso cu e Palabra di Dios tin. (Hebreonan 4:12) Esaki a impresiona tanto e staf di prizon como e otro presonan. Algun di e presonan cu mi a studia Bijbel cu ne a haya nan libertad y awor nan ta publicador di e bon nobo.

Pa algun tempo mi a studia cu tres notorio traficante di droga. Ora nan a progresa spiritualmente, nan tawata asisti na nan studio di Bijbel, feita, cabei nechi peña, bisti cu camisa y dashi den augustus, un di e lunanan mas cayente na Grecia! E director di prizon, e hefe di wardado di preso y algun trahado a core sali for di nan oficina pa mira e fenomeno aki. Nan no por a kere nan wowo!

Un otro experencia animante a tuma luga den e departamento di hende mohe den prizon. Mi a cuminsa un studio di Bijbel cu un señora cu tawata sinta un castigo di bida largo pa motibo di asesinato. E tawata conoci pa su conducta rebelde. Sinembargo, no a dura masha cu e berdad biblico cu e tawata siñando a cuminsa haci cambionan asina notabel den dje cu algun hende a bisa cu e ta manera un leon cu ta birando un lamchi! (Isaias 11:6, 7) Denter di poco tempo el a gana respet y confiansa di e director di prizon. Mir’e  progresa bon spiritualmente y alcansa e punto di dedica su mes na Yehova a haci mi felis.

Yudando Hende Enfermo y di Edad

Door cu mi a mira mi esposa su lucha largo contra malesa, esaki a haci mi mas sensibel pa necesidad di hende malo y di edad entre nos. Cada bes cu nos publicacionnan tawata trata articulonan cu a anima nos pa haci esfuerso y duna yudansa amoroso na e personanan ei, mi interes tawata lanta. Mi tawata aprecia y colecciona e articulonan ei. Despues di algun aña, mi tawatin un map di mas cu shen pagina. E prome articulo tawata “Consideracion cu Personanan di Edad y Esnan Aflihi”, cu a aparece den E Toren di Vigilancia na Ingles di 15 di juli 1962. Hopi di e articulonan aki a mustra cu ta bon pa cada congregacion duna yudansa di un manera organisa na hende malo y di edad.—1 Juan 3:17, 18.

E ancianonan a forma un grupo di ruman homber y mohe cu a pone nan mes disponibel pa percura pa e necesidadnan di hende malo y di edad den nos congregacion. Nos a organisa e boluntarionan den varios team. Tawatin team di esnan cu por a yuda durante dia, otronan cu por a yuda durante anochi, esnan cu por a percura pa transporte y esnan cu tawata disponibel 24 ora pa dia. E ultimonan aki ta forma un grupo cu ta semper cla pa tuma accion.

E resultadonan di e esfuersonan ei tawata animante. Por ehempel, durante un di e bishitanan diario cerca un ruman mohe cu tawata malo y tawata biba su so, nan a hay’e inconciente riba flur. Nos a avisa un ruman mohe cu ta biba eibanda y cu tawatin auto. El a hiba e ruman mohe malo e hospital mas cerca eibanda den un tempo record: solamente dies minuut! Docternan a bisa cu esei a salba e ruman su bida.

E gratitud cu e hendenan malo y di edad ta mustra na e miembronan di e grupo ta duna nan hopi satisfaccion. E echo cu nos tin speransa pa biba cu e rumannan ei den e sistema nobo di Dios bou di sircunstancianan diferente ta masha emocionante. Y sabiendo cu e apoyo cu nan a ricibi durante nan sufrimento a yuda nan wanta, ta un otro recompensa.

Perseverancia A Trece Recompensa

Awor mi ta sirbi como anciano den un di e congregacionnan di Piraiévs. Apesar di mi edad avansa y problemanan cu salu, mi ta contento cu ainda mi por participa activamente den e actividadnan di congregacion.

Pa trata cu sircunstancianan dificil, desafionan grandi y sucesonan imprevisto atrabes di añanan, mi tawatin mester di un cantidad extraordinario di determinacion y perseverancia. Sinembargo, semper Yehova a duna mi e fortalesa necesario pa vence e problemanan aki. Bes tras bes mi a experencia e veracidad di e palabranan di e salmista: “Si mi lo a bisa: ‘Mi pia ta slip’, bo misericordia, o SEÑOR, lo sostene mi. Den e multitud di mi precupacionnan den mi, bo consuelonan ta alegra mi alma.”—Salmo 94:18, 19.

[Plachi na pagina 25]

Hunto cu mi casa, Eleni, despues di su segundo operacion na 1957

[Plachi na pagina 26]

Na un congreso na Nuremberg, Alemania, na 1969

[Plachi na pagina 28]

E grupo di rumannan cu a yuda esnan enfermo y di edad