Completamente Ekipa Como Siñadonan di e Palabra di Dios

“Dios . . . a haci nos competente pa ta sirbidonan.”—2 CORINTIONAN 3:5, 6.

1, 2. Ki esfuerso hende a yega di haci pa predica, pero dicon generalmente nan esfuersonan ta fracasa?

CON lo bo sinti bo si nan duna bo un trabou cu bo no ta capasita pa haci? Imagina bo lo siguiente. E material cu bo tin mester ta poni bo dilanti, y e hermentnan ta na bo disposicion. Pero bo no tin e minimo idea con pa cumpli cu e tarea. Piyo ainda, e trabou en particular aki, ta un trabou urgente. Hende ta depende riba bo. Esei lo ta hopi frustrante!

² Un dilema asina no ta completamente imaginario. Considera un ehempel. A yega di sosode cu un di e iglesianan di Cristiandad a purba organisa y efectua un ministerio di cas pa cas. Generalmente nan esfuersonan a fracasa. Denter di un par di siman of luna nan a caba na nada. Dicon? Debi cu Cristiandad no a yuda su siguidonan pa nan ta capasita pa e trabou. Ni e miembronan di clero mes no ta capasita pa e obra di predica ei, apesar di añanan largo di educacion cu nan a ricibi na scol y na seminario. Dicon nos por bisa un cos asina?

3. Ki expresion ta ser uza tres bes na 2 Corintionan 3:5 y 6, y kico e ta nifica?

³ E Palabra di Dios ta splica kico ta loke ta capasita un berdadero predicado di e bon nobo Cristian. Dios a inspira apostel Pablo pa skirbi: “No cu di nos mes nos ta adecuadamente capasita pa considera cu algo ta bini di nos mes, mas bien e echo cu nos ta adecuadamente capasita ta bini di Dios, kende en berdad a capasita nos adecuadamente pa ta ministernan.” (2 Corintionan 3:5, 6, NW) Paga tino riba e expresion cu ta aparece tres biaha den e texto aki: “adecuadamente capasita.” Kico e kier men? E Diccionario di Palabranan Biblico di Vine (Vine’s Expository Dictionary of Biblical Words) ta bisa: “Ora e ser uza relaciona cu obheto [e palabra Griego original aki] ta nifica ‘suficiente’ . . . ; ora e ser uza relaciona cu persona, e kier men ‘competente’, ‘digno.’” Pues, un hende cu ta “adecuadamente capasita” ta un hende competente y digno di efectua e tarea cu el a haya. Si, ministernan berdadero di e bon nobo ta capasita pa haci e trabou aki. Nan ta competente, bon prepara, of digno pa predica.

4. (a) Con e ehempel di Pablo ta mustra cu no ta un grupito privilegia so por cualifica pa e ministerio Cristian? (b) Cua ta tres medio cu Yehova ta uza pa capasita nos como minister?

⁴ Pero con bini nan ta capasita? Door di nan talentonan? Superioridad intelectual? Educacion specialisa na scolnan prestigioso? Ta bisto cu apostel Pablo tawatin tur e cosnan ei. (Echonan 22:3; Filipencenan 3:4, 5) Sinembargo, el a reconoce humildemente cu su capasitacion como minister no a bini di scol of siñansa avansa, sino di Yehova Dios. E capasitacion ei ta pa un grupito privilegia so? Pablo a skirbi e congregacion  di Corintio tocante e echo cu ‘nos ta competente.’ Esei sigur ta indica cu Yehova ta percura pa tur su fiel sirbidonan ta competente, capas pa haci e trabou cu el a asigna nan. Con Yehova ta capasita Cristiannan berdadero awe? Laga nos papia riba tres medio cu e ta uza: (1) su Palabra, (2) su spirito santo, y (3) su organisacion riba tera.

E Palabra di Yehova Ta Capasita Nos

5, 6. Ki efecto e Scritura Santo tin riba Cristiannan berdadero?

⁵ Di prome, con e Palabra di Dios ta yuda nos bira competente como minister? Pablo a skirbi: “Tur Scritura ta inspira pa Dios y ta util pa siñansa, pa reprendemento, pa coreccion, pa educa den husticia, pa e hende di Dios por ta perfecto [plenamente competente, completamente, NW] ekipa pa tur bon obra.” (2 Timoteo 3:16, 17) Pues, e Scritura Santo ta yuda haci nos “plenamente competente, completamente ekipa” pa efectua e “bon obra” di siña hende tocante e Palabra di Dios. Pero con ta para cu tur e hendenan cu ta afilia na iglesianan di Cristiandad? Nan tin acceso na Bijbel. Con por ta cu e mesun buki cu ta yuda cierto hende bira minister competente no ta yuda otronan? E contesta ta sinta den e actitud cu nos tin pa cu Bijbel.

⁶ Lamentablemente, hopi hende cu ta bai misa no ta acepta e mensahe di Bijbel como “loke e ta berdaderamente, e palabra di Dios.” (1 Tesalonicencenan 2:13) Cristiandad a forma un historia bergonsoso pa su mes den e aspecto aki. Miembronan di clero ta ekipa como maestro di e Palabra di Dios despues cu nan pasa varios aña ta studia den institucionnan teologico? Eigenlijk, no. Asta tin studiante ta cuminsa nan estudio na seminario como creyente di Bijbel, y pa tempo cu nan gradua, nan a bira skeptico! Despues, na luga di predica e Palabra di Dios—cu hopi di nan no ta kere aden mas—nan ta dirigi nan ministerio den otro direccion: nan ta tuma parti den cuestionnan politico, promove evangelio social, of hala atencion na filosofianan humano den nan sermonnan. (2 Timoteo 4:3) Na contraste, Cristiannan berdadero ta sigui e ehempel di Hesucristo.

7, 8. Den ki manera Hesus su actitud pa cu e Palabra di Dios tawata diferente for di esun di e lidernan religioso di su tempo?

⁷ Hesus no a permiti e lidernan religioso di su tempo moldea su manera di pensa. Sea cu e tawata siña un grupo chikito di hende, por ehempel su apostelnan, of un multitud enorme, semper Hesus a haci bon uzo di e scrituranan santo. (Mateo 13:10-17; 15:1-11) Esaki ta algo cu a  distinguie for di e lidernan religioso di su tempo. Nan tawata descurasha e pueblo comun fuertemente di investiga e cosnan profundo di Dios. De echo, tawata normal pa un maestro den e tempo ei opina cu algun pasashi di Bijbel tawata simplemente mucho profundo pa trata cu personanan cu no ta su alumno di mas pega. Anto asta cu e alumno ei, nan lo a hacie unicamente cu stem abou, y cu cabes tapa. E lidernan religioso ei tawata casi mes supersticioso tocante trata cierto partinan di Bijbel, cu nan tawata pa pronuncia e nomber dibino!

⁸ Cristo no tawata asina. El a kere cu no ta djis un grupito selecto, sino hende en general mester a considera “tur palabra cu ta sali for di boca di Dios.” Hesus no tawata interesa pa otorga ningun yabi di conocemento na un grupito privilegia di erudito. El a bisa su disipelnan: “Loke mi bisa boso den scuridad, papia esei den claridad; y loke boso tende papia keto keto den horea, proclama esei for di riba dak di cas.” (Mateo 4:4; 10:27) Hesus tawatin un deseo intenso pa comparti e conocemento di Dios cu mas tanto hende posibel.

9. Con Cristiannan berdadero ta uza Bijbel?

⁹ E Palabra di Dios mester ta e enfoke di nos siñansa. Por ehempel, ora nos ta duna un discurso na Salon di Reino di Testigonan di Yehova, generalmente no ta basta pa nos djis lesa cierto versiculonan selecta for di Bijbel. Kisas nos mester splica, ilustra y duna aplicacion na e texto den su contexto. Na moda di papia, nos meta ta pa hisa e mensahe di Bijbel for di e papel y inkt, anto hinc’e den curason di nos scuchadonan. (Nehemias 8:8, 12) Tambe mester uza Bijbel ora ta necesario pa duna conseho of duna disiplina como coreccion. Maske Yehova su pueblo ta papia diferente idioma y ta bini di un variedad di antecedencia, nan tur ta respeta e Buki di tur buki: Bijbel.

10. Ki efecto e mensahe inspira di Bijbel por tin riba nos?

¹⁰ Ora Bijbel ser uza cu un respet asina, su mensahe tin poder. (Hebreonan 4:12) E ta motiva hende pa haci cambio den nan bida, manera bandona e practicanan no-biblico di fornicacion, adulterio, idolatria, buracheria y ladronicia. El a yuda masha hopi hende kita “e hende bieu”, esta e personalidad bieu, y bisti esun nobo. (Efesionan 4:20-24) Si, si nos respet’e mas cu cualkier opinion of tradicion di hende y uz’e fielmente, Bijbel por yuda nos bira berdaderamente competente, completamente ekipa como maestro di e Palabra di Dios.

E Spirito di Yehova Ta Capasita Nos

11. Pakico ta na su luga cu Hesus a referi na Yehova su spirito santo como “e ayudante”?

¹¹ Di dos, laga nos trata e papel cu Yehova su spirito santo, esta, su forsa activo, ta hunga den haci nos completamente ekipa. Nos no mester lubida nunca cu Yehova su spirito ta e forsa di mas poderoso cu ta existi. Yehova a autorisa su Yiu stima pa eherce e poder inmenso aki na fabor di tur Cristian berdadero. Pesei, ta na su luga cu Hesus a referi na e spirito santo como “e ayudante.” (Juan 16:7, NW) El a urgi su siguidonan pa nan pidi Yehova pa e spirito ei, y el a sigura nan cu Yehova lo duna nan e generosamente.—Lucas 11:10-13; Santiago 1:17.

12, 13. (a) Pakico ta importante pa nos resa pidi Dios pa su spirito santo yuda nos den nos ministerio? (b) Con e Farizeonan a mustra cu spirito santo no tawata obra den nan?

¹² Nos mester resa pidi Dios pa su spirito santo tur dia, specialmente pa e yuda nos den nos ministerio. Ki efecto e forsa activo ei por tin riba nos? E por traha riba nos mente y nos curason pa yuda nos haci cambio, crece spiritualmente y remplasa e hende bieu cu esun nobo. (Colosencenan 3:9, 10) E por yuda nos cultiva cualidadnan precioso, manera esnan cu Cristo a desplega. Hopi di nos por ripiti Galationan 5:22 y 23 fo’i cabes. E versiculonan ei ta menciona fruta di e spirito di Dios. E prome ta amor. E cualidad ei ta esencial den nos ministerio. Dicon?

¹³ Amor ta e fuente principal di motivacion. Amor pa Yehova y pa prohimo ta motiva Cristiannan berdadero pa comparti e bon nobo cu hende. (Marco 12:28-31) Sin tal amor nos lo no por bira echt capasita como siñado di e Palabra  di Dios. Wak e diferencia cu tawatin entre Hesus y e Farizeonan. Mateo 9:36 ta bisa di Hesus: “Ora cu el a mira e multitudnan, el a sinti compasion pa nan, pasobra nan tawata cansa y plama, manera carne sin wardado.” Ki actitud e Farizeonan tawatin pa cu e pueblo comun? Nan a bisa: “E multitud aki, cu no conoce e Lei, ta maldiciona.” (Juan 7:49) E Farizeonan ei no a sinti ningun tiki amor pa e pueblo, mas bien desprecio. Claramente Yehova su spirito no a obra den nan.

14. Con Hesus su ehempel di mustra amor den su ministerio mester motiva nos?

¹⁴ Hesus tawatin empatia pa hende. E tawata conciente di nan dolo. E tawata sa cu hende a abusa di nan, soya nan y plama nan manera carne sin wardado. Juan 2:25 ta bisa nos cu Hesus “tawata sa kico tawatin den hende.” Debi cu e tawata Yehova su Obrero Maestro durante creacion, Hesus tawatin un comprendemento profundo di naturalesa humano. (Proverbionan 8:30, 31) E comprendemento ei a profundisa su amor. Laga cu semper e amor ei por ta e forsa motivador tras di nos actividad di predica! Si nos ta sinti cu nos tin caminda pa mehora den e area aki, laga nos pidi Yehova pa su spirito santo, anto obra na harmonia cu nos oracionnan. Yehova lo contesta nos. Lo E manda e forsa iresistibel aki pa yuda nos pa nos por ta mas manera Cristo, kende tawata completamente capasita pa predica e bon nobo.

15. Con e palabranan di Isaias 61:1-3 ta aplica na Hesus y na mesun momento ta desenmascara e escriba y Farizeonan?

¹⁵ Di unda e capasitacion di Hesus a bini? “E spirito di SEÑOR ta riba mi”, el a bisa. (Lucas 4:17-21) Si, Yehova mes a nombra Hesus pa medio di su spirito santo. Hesus no tawatin mester di mas cualificacion. Ta spirito santo a nombra e lidernan religioso di su tempo? No. Ni nan no tawata ekipa pa cumpli cu e profecia di Isaias 61:1-3 cu Hesus a lesa na bos halto y a aplica na su mes. Por fabor, lesa e versiculonan ei y mira pa bo mes cu e escribanan y Farizeonan hipocrita no tawata cualifica. Nan no tawatin bon nobo pa declara na hende pober. Anto con nan por a predica liberacion na hende preso y recobramento di bista na hende ciego? Den sentido spiritual, nan mes tawata ciego y catibo di tradicion di hende! Na contraste cu e hendenan ei, nos si ta capasita pa siña pueblo?

16. Ki confiansa e pueblo di Yehova awe por tin pa cu nan cualificacion como minister?

¹⁶ Ta berdad cu nos no a studia na scolnan di siñansa avansa di Cristiandad. Ningun seminario teologico no a nombra nos como maestro. Esei kier men cu nos no ta capasita? Claro cu no! Nos nombramento como su Testigonan ta bini di Yehova. (Isaias 43:10-12) Si nos pidie su spirito santo den oracion y obra na harmonia cu ne, nos tin e cualificacion di mas halto. Claro cu nos ta imperfecto y ta leu di logra sigui e ehempel cu e Gran Maestro Hesus a pone pa nos, den un sentido completo. Pero apesar di esei, nos no ta gradicido na Yehova cu E ta uza su spirito pa capasita nos y ekipa nos como siñado di su Palabra?

E Organisacion di Yehova Ta Capasita Nos

17-19. Con e cinco reunionnan semanal cu Yehova su organisacion ta percura ta yuda capasita nos como minister?

¹⁷ Awor laga nos trata un di tres manera cu Yehova ta ekipa nos como siñado di su Palabra: su congregacion, of organisacion riba tera cu ta entrena nos pa ta minister. Con? Djis pensa riba e programa di instruccion cu nos ta gosa di dje! Normalmente den un siman nos ta asisti na cinco reunion Cristian. (Hebreonan 10:24, 25) Nos ta reuni den grupo chikito na e Studio di Buki di Congregacion pa disfruta di un studio di Bijbel profundo mediante un buki cu Yehova su organisacion a percura. Door di scucha y duna comentario nos ta siña di otro y ta curasha otro. Ademas nos ta ricibi instruccion y atencion personal cerca e superintendente di studio di buki. Na e Reunion Publico y e Studio di Toren di Vigilancia, nos ta ricibi mas cuminda spiritual nutritivo.

 ¹⁸ Nos Scol di Ministerio Teocratico ta diseña pa instrui nos con pa siña hende. Door di prepara e partinan pa studiante, nos ta siña con pa uza e Palabra di Dios pa siña hende un variedad amplio di tema. (1 Pedro 3:15) Bo a yega di haya un asignacion pa duna un parti riba un tema cu a parce bo bon conoci, anto descubri cu bo a siña algo nobo tocante dje? E experencia ei ta comun. No tin nada cu ta mehora nos conocemento di un tema mas cu si nos siña otro hende tocante dje. Asta si no ta nos mes tin cu duna un presentacion, toch nos por siña pa bira miho maestro. Nos ta nota bon cualidad di cada studiante, y por pensa con nos por imita e cualidadnan ei.

¹⁹ E Reunion di Sirbishi tambe ta diseña pa ekipa nos como maestro di e Palabra di Dios. Tur siman nos ta disfruta di discurso, consideracion, y demostracionnan anima, diseña pa yuda nos den nos ministerio. Ki presentacion nos lo uza? Con nos por trata cu e retonan particular di nos ministerio publico? Ki rasgonan di predicacion ta posibel pa nos explora mas ainda? Kico lo yuda haci nos maestronan mas eficas ora di haci rebishita y conduci studio di Bijbel? (1 Corintionan 9:19-22) E tipo di preguntanan ei ta ser trata detayadamente den e Reunion di Sirbishi. Hopi parti di e reunion ta basa riba articulonan di Nos Ministerio di Reino, un otro herment cu Yehova su organisacion ta percura pa ekipa nos pa nos trabou vital.

20. Con nos por beneficia plenamente di e reunionnan y asambleanan?

²⁰ Door di prepara pa nos reunionnan, asisti na nan, anto pone loke nos a siña na practica den nos trabou como maestro, nos ta ricibi entrenamento extenso. Pero esei no ta tur. Nos tin reunionnan mas grandi tambe—asamblea- y congresonan—cu ta ser prepara pa ekipa nos como maestronan di e Palabra di Dios. Y nos ta anhela masha pa scucha cu atencion y pone e consehonan ei na practica!—Lucas 8:18.

21. Ki evidencia ta mustra cu nos entrenamento ta efectivo, y pa ken e merito ta bai?

²¹ E entrenamento cu Yehova a percura a resulta di ta eficas? Laga e echonan papia pa nan mes. Tur aña, nos ta yuda cientos di miles di hende siña doctrinanan biblico basico y biba na harmonia cu loke Dios ta rekeri di nan. Nos ta aumenta na cantidad, pero ningun di nos no por tuma e merito pa e aumento ei. Nos mester mira e asuntonan di manera realistico, mescos cu Hesus. El a bisa: “Ni un hende no por bin cerca mi, si no ta e Tata cu a manda mi a hal’e.” Manera e apostelnan di antes, mayoria di nos ta hende comun y sin hopi educacion. (Juan 6:44; Echonan 4:13) Nos exito ta depende di Yehova, cu ta atrae hende sinsero na e berdad. Pablo a expresa e asunto bon: “Ami a planta, Apolos a muha, ma ta Dios a duna crecemento.”—1 Corintionan 3:6.

22. Pakico nos nunca mester bira demasiado descurasha tocante participa plenamente den e ministerio Cristian?

²² Si, Yehova Dios ta activamente envolvi den nos trabou como maestro di su Palabra. Kisas no ta semper nos ta sinti nos mes capasita como maestro. Pero corda, ta Yehova ta atrae hende na su mes y na su Yiu. Ta Yehova ta capasita nos como minister pa yuda esnan nobo pa medio di su Palabra, su spirito santo y su organisacion riba tera. Laga nos responde na Yehova su entrenamento door di aplica e bon cosnan cu e ta percura awor aki pa haci nos completamente ekipa como siñadonan di e Palabra di Dios!

Con Lo Bo Contesta?

• Con Bijbel ta ekipa nos pa e trabou di predica?

• Ki papel spirito santo ta hunga den capasita nos como minister?

• Den ki maneranan e organisacion terenal di Yehova a yuda bo bira capasita como predicado di e bon nobo?

• Pakico nos por tin confiansa ora di participa den e ministerio?

[Preguntanan di Estudio]

[Plachi na pagina 25]

Como siñado di e Palabra di Dios, Hesus a demostra amor pa hende