Kico Ta Berdadero Repentimento?

Loke ta pone cu hende mester repenti ta pica, esta, keda sin cumpli cu Dios su rekisitonan husto. (1 Juan 5:17) Door cu Adam a laga un herencia di pica pa humanidad completo, tur su desendientenan tawatin mester di repentimento. (Salmo 51:5; Romanonan 3:23; 5:12) Repentimento (sigui pa combertimento) ta un rekisito pa un hende por reconsilia cu Dios.

Kisas un hende tin cu repenti pa motibo cu el a hiba henter su bida contrario cu e proposito y boluntad di Dios. El a cumpli mas bien cu e deseo di mundo bou di control di Dios su Adversario. (1 Pedro 4:3; 1 Juan 2:15-17; 5:19) Of kisas un hende tin cu repenti pa motibo di un aspecto particular di su bida, esta, un practica robes cu a daña y mancha un curso di bida cu di otro forma lo tawata aceptabel; repentimento por ta pa un solo malecho of asta pa un tendencia, inclinacion of actitud robes. (Salmo 141:3, 4; Proverbionan 6:16-19; Santiago 2:9; 4:13-17; 1 Juan 2:1) Pesei, fayonan cu hende por comete ta masha hopi of basta spesifico.

Logicamente tambe, na e grado cu un persona desvia for di e caminda di husticia, sea door di un fayo grandi of uno chikito, na e mesun grado ei e tin cu repenti. E Israelitanan a ‘rebeldia hopi contra Yehova’ y nan tawata “caba na nada” den nan transgresionnan. (Isaias 31:6; 64:5, 6; Ezekiel 33:10) Di otro banda, apostel Pablo ta papia di e “hende [cu] wordo sorprendi den cualkier delito”, y e ta conseha pa esnan cu tin cualificacionnan spiritual, purba “restaura un hende asina den un spirito di mansedumbre.” (Galationan 6:1) Sirbidonan di Dios no tin nodi keda cu remordimento pa motibo di erornan cometi debi na imperfeccion hereda, pasobra den su misericordia Yehova ta tene cuenta cu nan debilidadnan di carni. (Salmo 103:8-14; 130:3) Nan por ta gososo si concientemente nan ta cana den e camindanan di Dios.—Filipencenan 4:4-6; 1 Juan 3:19-22.

Arepentimento por bini di parti di hende cu ya caba tawatin un bon relacion cu Dios pero cu a desvia y a perde e aprobacion y bendicion di Dios. (1 Pedro 2:25) Israel tawata den un pacto cu Dios, nan tawata “un pueblo santo” scohi for di entre tur e nacionnan. (Deuteronomio 7:6; Exodo 19:5, 6) Cristiannan tambe a haya un posicion husto dilanti Dios via un pacto nobo cu Cristo como mediador. (1 Corintionan 11:25; 1 Pedro 2:9, 10) Den e caso di esnan cu a desvia, ora nan a repenti esei a drecha nan relacion cu Dios y a pone cu nan a ricibi e beneficio y bendicionnan cu e relacion ei ta trece cu ne. (Jeremias 15:19-21; Santiago 4:8-10) Repentimento ta e paso primordial y importante cu ta hiba na un posicion husto dilanti Dios cu bida eterno na bista pa esnan cu no tawatin un relacion cu Dios anteriormente. Esakinan por ta hendenan pagano di e nacionnan no-Israelita durante e tempo cu Dios su pacto cu Israel tawata na vigor (Efesionan 2:11, 12), y tambe tur e personanan di cualkier rasa of nacionalidad cu ta pafo di e congregacion Cristian.—Echonan 11:18; 17:30; 20:21.

Repentimento ta envolve tanto mente como curason. E persona mester reconoce cu su curso of acto tawata robes, y pa haci esaki e mester acepta cu Dios su boluntad y normanan ta husto. Ta imposibel pa un persona cu ta ignora of lubida Dios su boluntad y normanan, repenti. (2 Reinan 22:10,  11, 18, 19; Jonas 1:1, 2; 4:11; Romanonan 10:2, 3) Pesei, misericordiosamente, Yehova a manda su profeta y predicadonan pa haci un yamada na e hendenan pa nan repenti. (Jeremias 7:13; 25:4-6; Marco 1:14, 15; 6:12; Lucas 24:27) Via e bon nobo cu e congregacion Cristian ta predica, y specialmente desde e tempo cu Cornelio a comberti, Dios ta “declara na hende cu tur hende na tur caminda mester repenti.” (Echonan 17:22, 23, 29-31; 13:38, 39) E Palabra di Dios—sea skirbi of papia—ta e medio pa ‘combence’ nan cu e caminda di Dios ta recto y cu ta nan camindanan ta robes. (Compara cu Lucas 16:30, 31; 1 Corintionan 14:24, 25; Hebreonan 4:12, 13.) Dios su lei ta “perfecto, e ta restaura alma.”—Salmo 19:7.

Rei David ta papia di ‘siña transgresornan e camindanan di Dios pa por comberti na Dje.’ (Salmo 51:13) Aki sin duda e tawata referi na compañeronan Israelita. Timoteo a haya instruccion pa no pleita ora el a trata cu Cristiannan den e congregacionnan cu el a bishita. Mas bien, e mester a ‘corigi cu suavidad esnan cu a opon’e’ ya cu kisas Dios por a duna nan ‘repentimento cu ta hiba na conocemento di e berdad, y nan por bin na nan sano huicio y scapa for di e trampa di Diabel.’ (2 Timoteo 2:23-26) Pesei, e yamada pa hende repenti por ser haci den e congregacion di e pueblo di Dios y tambe pafo di dje.

E persona mester comprende cu el a peca contra Dios. (Salmo 51:3, 4; Jeremias 3:25) Esaki lo por ta claramente bisto ora ta trata di blasfemia abierto of directo, uzo incorecto di e nomber di Dios of adoracion di otro diosnan y tambe door di uzo di imagennan di idolo. (Exodo 20:2-7) Asta ora ta trata di un “asunto priva” of algo entre e persona y un otro, mester considera malechonan como pica contra Dios, un falta di respet pa cu Yehova. (Compara cu 2 Samuel 12:7-14; Salmo 51:4; Lucas 15:21.) Asta cosnan robes cu nos haci door di ignorancia of door di fayo mester ser reconoce como erornan cu ta haci un persona culpabel den bista di e Gobernante Soberano, Yehova Dios.—Compara cu Levitico 5:17-19; Salmo 51:5, 6; 119:67; 1 Timoteo 1:13-16.