Luchando Cu “un Sumpiña den Carni”

“Mi gracia ta basta pa bo.”—2 CORINTIONAN 12:9.

1, 2. (a) Pakico nos no mester laga e echo cu nos ta enfrenta problema y prueba tolondra nos? (b) Pakico nos por ta trankil apesar di prueba?

“TUR hende cu ta desea di hiba un bida santo den Cristo Hesus lo wordo persigui.” (2 Timoteo 3:12) Pakico esei ta e caso? Pasobra Satanas ta pretende cu hende ta sirbi Dios solamente pa motibonan egoista, y e ta desespera den su intento pa proba su argumento. Un biaha Hesus a spierta su disipelnan fiel: “Satanas a pidi permit pa sefta boso manera trigo.” (Lucas 22:31) Hesus tawata bon conciente cu Dios ta permiti Satanas pone nos na prueba cu problemanan penoso. Claro cu esei no ta nifica cu tur dificultad cu nos ta enfrenta den bida ta origina directamente for di Satanas of su demoñonan. (Eclesiastes 9:11) Pero Satanas ta ansioso pa uza cualkier medio na su disposicion pa kibra nos integridad.

² Bijbel ta bisa cu nos no mester laga prueba tolondra nos. Nada cu bini riba nos ta algo straño of inespera. (1 Pedro 4:12) De echo, “[nos] rumannan den henter mundo ta pasando door di e mesun experencianan di sufrimento.” (1 Pedro 5:9) Awe, Satanas ta poniendo masha presion riba tur sirbido di Dios. Mas tanto problema posibel manera sumpiña tormenta nos, mas Diabel ta gosa. Pa logra esei, e ta uza su sistema di cosnan den un manera cu lo por hinca mas ‘sumpiña den nos carni’ of haci esnan cu nos tin caba piyo. (2 Corintionan 12:7) No obstante, e atakenan di Satanas no tin nodi kibra nos integridad. Mescos cu Yehova lo “provee salida” pa nos wanta tentacion, asina tambe lo e haci ora nos ta enfrenta problemanan cu ta manera sumpiña den nos carni.—1 Corintionan 10:13.

Con pa Enfrenta un Sumpiña

3. Ora Pablo a pidi Yehova pa kita e sumpiña den su carni, kico Yehova a contest’e?

³ Apostel Pablo a roga Dios pa kita e sumpiña for di su carni. “En cuanto e cos aki mi a roga Señor tres biaha pa esaki por kita for di mi.” Con Yehova a contesta Pablo su peticion ferviente? “Mi gracia [bondad inmereci, NW] ta basta pa bo, pasobra mi poder ta wordo haci perfecto den debilidad.” (2 Corintionan 12:8, 9) Laga nos analisa e contesta aki y mira con e  por yuda nos lucha cu cualkier problema cu ta hinca nos manera sumpiña.

4. Den ki maneranan Pablo a beneficia di Yehova su bondad inmereci?

⁴ Ripara cu Dios a anima Pablo pa e keda gradicido pa e bondad inmereci cu ya caba a ser mustra na dje mediante Cristo. Si, Pablo a ser bendiciona ricamente den varios manera. Yehova a extende su amor na Pablo door di dun’e e privilegio di ta un disipel di Hesus, aunke e tawata un opositor fanatico di Hesus su siguidonan. (Echonan 7:58; 8:3; 9:1-4) Despues di esei Yehova tawatin e bondad di duna Pablo hopi asignacion y privilegio emocionante. Nos ta saca un les masha cla. Asta ora nos no ta pasando den e miho momentonan, ainda nos tin hopi bendicion pa cua nos mester ta gradicido. Nunca nos pruebanan mester pone nos lubida e gran bondad cu Yehova a mustra na nos.—Salmo 31:19.

5, 6. (a) Con Yehova a siña Pablo cu poder dibino “ta wordo haci perfecto den debilidad”? (b) Con e ehempel di Pablo a proba cu Satanas ta un mentiroso?

⁵ E bondad inmereci di Yehova ta suficiente den un otro manera tambe. E poder di Dios ta mas cu suficiente pa yuda nos pasa door di nos pruebanan. (Efesionan 3:20) Yehova a siña Pablo cu poder dibino “ta wordo haci perfecto den debilidad.” Con asina? Amorosamente el a duna Pablo tur e forsa cu e tawatin mester pa por a lucha cu su prueba. Na su turno, Pablo su aguante y confiansa absoluto den Yehova a revela na tur Cristian cu e poder di Dios a triunfa den e caso di e homber debil y pecaminoso aki. Awor considera ki efecto esaki tawatin riba Diabel, kende ta pretende cu hende ta sirbi Dios solamente ora nan bida ta comodo y liber di problema. Pablo su integridad tawata manera un bofta den cara di e calumniado ei!

⁶ Pablo mes tawata un aliado di Satanas den su lucha contra Dios, un persiguido orguyoso di Cristiannan, un Farizeo celoso kende un tempo sin duda a biba den luho debi cu el a nace den un clase privilegia. Awor Pablo tawata sirbi Yehova y Cristo como “esun di mas menos di e apostelnan.” (1 Corintionan 15:9) Como tal, el a somete su mes humildemente na e autoridad di e cuerpo gobernante Cristian di e prome siglo. Y el a wanta fielmente apesar di su sumpiña den carni. Pa Satanas su sorpresa desagradabel, e pruebanan cu Pablo a topa den su bida no a mengua su fe. Nunca Pablo a perde speransa cu un dia lo e forma parti di e Reino celestial di Cristo. (2 Timoteo 2:12; 4:18) Ningun sumpiña, pa con doloroso cu e tawata, por a mengua su celo. Mescos tambe, laga nos celo sigui fuerte! Door di sostene nos atrabes di nos pruebanan, Yehova ta honra nos cu e privilegio di yuda proba cu Satanas ta un mentiroso.—Proverbionan 27:11.

Yehova Su Percuracionnan Vital

7, 8. (a) Ki medio Yehova ta uza pa duna su sirbidonan poder awe? (b) Pakico studia y lesa Bijbel tur dia ta asina vital pa nos por lucha cu un sumpiña den carni?

⁷ Awe, Yehova ta duna poder na Cristiannan fiel pa medio di su spirito santo, su Palabra y un hermandad Cristian. Mescos cu apostel Pablo, nos por tira nos carga riba Yehova den oracion. (Salmo 55:22) Aunke kisas Dios no ta kita nos pruebanan, E por duna nos si e sabiduria pa lucha cu nan, asta esnan cu ta hopi dificil pa soporta. Tambe Yehova por duna nos forsa, esta, “poder mas aya di loke ta normal”, pa yuda nos soporta.—2 Corintionan 4:7, NW.

⁸ Con nos ta ricibi tal yudansa? Nos mester studia e Palabra di Dios diligentemente, pasobra den dje nos lo haya su consuelo sigur. (Salmo 94:19) Den Bijbel nos ta lesa e palabranan conmovedor di Dios su sirbidonan ora nan tawata roga Dios pa su yudansa. Ta bon pa nos medita riba e manera cu Yehova a contesta nan, hopi bes cu palabranan di consuelo. Un estudio di e Palabra di Dios lo fortifica nos “p’e poder mas aya di loke ta normal sea di  Dios y no loke ta bini di nos mes.” Mescos cu nos tin cu come tur dia pa alimenta nos curpa y haya energia, asina nos tin cu alimenta nos mente cu e palabranan di Dios regularmente. Nos ta haci esaki? Si ta asina, e ora ei nos lo mira con e “poder mas aya di loke ta normal” cu nos ta ricibi ta yuda nos wanta cualkier sumpiña figurativo cu por ta molestiando nos awor.

9. Con ancianonan por sostene esnan cu ta lucha cu problema?

⁹ Ancianonan Cristian cu ta teme Dios por “ta manera un refugio contra biento” di angustia, “un proteccion contra tempestad” di problema. Ancianonan cu kier cuadra cu e descripcion inspira ei, ta pidi Yehova humildemente y sinceramente pa duna nan “un lenga cu a wordo siña” pa asina nan por sa con pa contesta esnan cu ta sufri, cu e palabranan corecto. E palabranan di anciano por ta manera un yobida suave cu ta refresca nos y trankilisa nos estado di animo durante dificultad den bida. Door di “encurasha esnan cu ta falta animo”, ancianonan ta echt sostene nan rumannan spiritual cu lo por ta cansa of kibra pa motibo di un ke otro sumpiña den carni.—Isaias 32:2; 50:4; 1 Tesalonicencenan 5:14.

10, 11. Con Dios su sirbidonan por anima otronan cu ta pasando den pruebanan severo?

¹⁰ Tur sirbido di Yehova ta parti di su famia Cristian uni. Si, nos ta “miembro” cu ta pertenece na otro y nos “mester stima otro.” (Romanonan 12:5; 1 Juan 4:11) Con nos ta cumpli cu e obligacion di stima otro? Segun 1 Pedro 3:8, nos ta haci esei door di ‘tene compasion cu otro, stima manera ruman, y sea misericordioso’ cu tur esnan cu ta relaciona cu nos den fe. Pa loke ta esnan cu ta lucha cu un sumpiña particularmente doloroso den carni, sea hoben of bieu, nos tur por mustra un interes special den nan. Con asina?

¹¹ Nos mester haci esfuerso pa biba cu nan den nan sufrimento. Si nos no ta sinti pa nan of si nos ta indeferente, sin cu nos sa nos por ta haciendo nan sufrimento piyo. E echo cu nos ta conciente di nan pruebanan ta yuda nos tene cuidou kico nos ta papia, con nos ta papia y con nos ta actua. E echo cu nos ta optimista y positivo por yuda fria algo di e dolo intenso di cualkier sumpiña cu por ta hincando nan. Asina nos lo por ta un fuente di estimulo pa nan.—Colosencenan 4:11.

Con Algun a Vence den e Lucha

12-14. (a) Kico un Cristian a haci pa lucha cu su malesa di cancer? (b) Con e rumannan spiritual di e señora aki a sosten’e y anim’e?

¹² Segun cu nos ta acerca e fin di e ultimo dianan aki, e ‘dolonan di angustia’ ta aumentando tur dia. (Mateo 24:8, NW) Pues, tur  hende riba tera tin chens di haya nan cu prueba, specialmente Yehova su fiel sirbidonan cu ta haci esfuerso pa cumpli cu su boluntad. Tuma por ehempel un Cristian cu ta sirbiendo den e ministerio di tempo completo. Docter a diagnostica cu e tawatin cancer y cu e mester a laga saca klier di scupi y linfatico for di su curpa. Ora e cu su casa a haya sa cu e tawatin e malesa aki, mesora nan a acudi na Yehova den un oracion largo den forma di ruego. Mas despues el a bisa cu nan a sinti un pas increibel bini riba nan. Toch el a soporta bastante dificultad, specialmente ora el a haya su mes cu e efectonan secundario di su tratamento.

¹³ Pa e por a trata cu su situacion, e ruman mohe aki a purba haya mas tanto informacion posibel tocante cancer. El a consulta cu su docternan. Den E Toren di Vigilancia, Spierta! y otro publicacionnan Cristian, el a haya experencianan di bida real cu ta mustra con otronan a lucha emocionalmente cu e enfermedad aki. Tambe el a lesa pasashinan relevante di Bijbel cu ta mustra con Yehova por sostene su pueblo den tempo dificil, y otro informacion balioso.

¹⁴ Un articulo cu a papia tocante e problema di desesperacion a cita e palabranan sabi aki: “Esun cu isola su mes ta busca su mes deseo.” (Proverbionan 18:1) Pesei e articulo a duna e conseho aki: “No isola bo mes.” * E ruman mohe ta conta: “Hopi ruman a bisa mi cu nan ta haci oracion pa mi; otronan tawata yama mi na telefon. Dos anciano tawata yama mi regularmente pa wak con ta bai cu mi. Mi tawata ricibi flor y hopi tarheta. Algun asta tawata cushina pa mi. Tambe, hopi ruman a ofrece pa hiba mi docter.”

15-17. (a) Con un Cristian a lucha cu e dificultadnan cu a presenta despues di accidente di auto? (b) Con e rumannan den congregacion a apoy’e?

¹⁵ Un sirbido di Yehova pa hopi aña na New Mexico, Merca, a haya dos accidente di auto. El a fractura su garganta y scouder. Door di esei, e artritis cu e tawata lucha cu ne pa mas cu 25 aña a bira piyo. E ta conta: “Mi tawatin hopi dificultad pa hisa mi cabes y carga un cos cu ta pisa mas cu dos kilo. Pero oracion ferviente na Yehova a sostene mi masha tanto. E articulonan den E Toren di Vigilancia cu nos tawata studia tambe a yuda mi hopi. Un di nan a papia di Mikeas 6:8, y a mustra cu ser modesto den cana cu Dios ta nifica conoce bo limitacionnan. Esaki a yuda mi realisa cu apesar di mi condicion, mi no mester perde animo, aunke e tempo cu mi tawata dedica den e ministerio tawata menos cu mi a desea. Loke ta conta na prome luga ta sirbi Yehova cu motibonan puro.”

¹⁶ El a sigui bisa: “Semper e ancianonan ta elogia mi pa e esfuersonan cu mi ta haci pa asisti na reunion y sali den sirbishi di veld. E hobennan ta cuminda mi cu un brasa. E pioneronan tin hopi pasenshi cu mi y hopi bes nan ta adapta nan orario riba e dianan cu mi enfermedad no ta permiti mi sali cu nan. Ora weer ta malo, nan ta bai rebishita cu mi of invita mi pa compaña nan na nan studionan di Bijbel. Y door cu mi no por carga tas cu buki, otro publicadornan ta pone mi literatura den nan tas ora mi ta sali predica.”

¹⁷ Ripara con e ancianonan di congregacion y otro compañeronan di creencia a yuda e dos ruman mohenan aki enfrenta nan enfermedadnan cu ta manera sumpiña den carni. Nan a ofrece yudansa practico y bondadoso cu e proposito di satisface necesidadnan spesifico riba tereno spiritual, fisico y emocional. Esei no ta anima bo pa duna yudansa na otro rumannan cu ta pasando den problema? Hobennan, boso tambe por yuda e rumannan den boso congregacion cu ta luchando cu sumpiña den carni.—Proverbionan 20:29.

18. Ki animacion nos por haya den e experencianan di bida real publica den e revistanan Toren di Vigilancia y Spierta!?

¹⁸ E revistanan Toren di Vigilancia y Spierta!  a publica hopi storia di bida y experencia di Testigonan cu a lucha, y cu ainda ta luchando, cu problema den bida. Segun cu bo ta lesa e articulonan ei regularmente, lo bo mira cu hopi di bo rumannan spiritual rond mundo a wanta dificultad economico, perdida di ser keri den desaster y condicionnan peligroso den tempo di guera. Otronan ta biba cu enfermedadnan cu ta stroba nan di move. Hopi no por haci ni algun di e cosnan simpel den bida cu pa hende salu ta masha hewon. Nan enfermedadnan ta un prueba severo pa nan, specialmente ora nan no por participa den actividadnan Cristian manera nan lo a desea. Nan ta aprecia masha e yudansa y sosten cu nan rumannan, hoben y bieu, ta duna nan!

Aguante Ta Trece Felicidad

19. Con bin Pablo tawata capas pa alegra apesar di su pruebanan y debilidadnan semehante na sumpiña?

¹⁹ Pablo a alegra ora el a mira con Dios a fortalec’e. El a bisa: “Gustosamente lo mi prefera di gaba den mi debilidadnan, pa e poder di Cristo por biba den mi. Pesei, pa causa di Cristo mi tin placer den debilidad, den insulto, den sufrimento, den persecucion, den problema; pasobra ora mi ta debil, e ora ei mi ta fuerte.” (2 Corintionan 12:9, 10) Pablo su experencianan personal a pone cu e por a declara cu confiansa: “No cu mi ta papia pasobra mi tin necesidad; pasobra mi a siña di ta contento den ki sircunstancia cu mi haya mi aden. Mi sa di biba humilde, y mi sa tambe di biba den prosperidad; den cualkier y den tur sircunstancia mi a siña e secreto di ta bariga yen y di pasa hamber, tanto di tin abundancia como di pasa necesidad. Tur cos mi por den [esun, NW], kende ta duna mi fortalesa.”—Filipencenan 4:11-13.

20, 21. (a) Pakico nos por haya goso ora nos medita riba e ‘cosnan cu no ta wordo mira’? (b) Kico ta algun di e ‘cosnan cu no ta wordo mira’ cu bo ta spera di mira den e Paradijs terenal?

²⁰ Pues anto, door di wanta cualkier sumpiña figurativo den nos carni, nos por haya hopi felicidad den mustra tur hende cu Yehova su poder ta ser haci perfecto den nos debilidad. Pablo a skirbi: “Nos no ta perde animo . . . Nos hende interior ta wordo renoba dia pa dia. Pasobra nos afliccion leve, cu ta pa un momento so, ta obra pa nos un peso di gloria mucho mas grandi y eterno, mientras cu nos . . . ta wak e cosnan . . . cu no ta wordo mira. Pasobra e cosnan . . . cu no ta wordo mira ta eterno.”—2 Corintionan 4:16-18.

²¹ Mayoria sirbido di Yehova awe ta spera di biba den su Paradijs terenal y disfruta di e bendicionnan cu el a priminti. Nos por considera e bendicionnan como ‘cosnan cu nos no ta mira’ awe. Sinembargo, e tempo ta acercando rapidamente ora nos lo mira e bendicionnan ei cu nos propio bista, si, y disfruta di nan pa semper. Un di e bendicionnan ei ta cu nos lo ser alivia pa semper di cualkier problema cu ta manera sumpiña! E Yiu di Dios lo “destrui e obranan di Diabel” y “destrui esun cu tawatin poder riba morto.”—1 Juan 3:8; Hebreonan 2:14.

22. Ki confiansa y determinacion nos mester tin?

²² Pesei, sea cual sea e sumpiña cu por ta hincando nos awe, laga nos sigui lucha cu ne. Yehova lo duna nos e forsa pa haci esei mescos cu el a duna Pablo pa e lucha cu su sumpiña. Ora nos ta bibando den e Paradijs terenal, nos lo bendiciona Yehova nos Dios tur dia pa tur e cosnan maravioso cu E ta haci na nos fabor.—Salmo 103:2.

[Nota]

Con Lo Bo Contesta?

• Pakico y con Diabel ta purba kibra e integridad di Cristiannan berdadero?

• Con Yehova su poder ta ser “haci perfecto den debilidad”?

• Con ancianonan y otro rumannan por anima esnan cu ta lucha cu problema?

[Preguntanan di Estudio]

[Plachi na pagina 18]

Tres biaha Pablo a pidi Dios p’e kita e sumpiña den su carni