Pregunta di Lector

Kico ta nificacion di e comentario na Hebreonan 12:4 cu ta bisa: “Boso no a resisti ainda te na e punto di drama sanger”?

E expresion ‘resisti te na e punto di drama sanger’ ta indica bai te na e extremo di muri, literalmente dramando bo sanger cu ta vital pa bida.

Apostel Pablo tawata sa cu debi na nan fe, tawatin algun Cristian Hebreo cu ya caba “a soporta un gran lucha di sufrimento.” (Hebreonan 10:32, 33) Ora Pablo a indica esaki, ta parce cu el a uza un comparacion di un lucha den un competencia atletico Griego den cua tawatin coremento, lucha libre, boxeo y tiramento di disco y speer. Di acuerdo cu Hebreonan 12:1, el a urgi compañeronan Cristian: “Laga nos tambe pone un banda tur strobacion, y e pica cu ta mara nos asina facil, y cu perseverancia laga nos core e careda cu ta poni nos dilanti.”

Tres versiculo mas despues, na Hebreonan 12:4, kisas Pablo a pasa for di e ilustracion di un careda di coremento pa un competencia di boxeo. (1 Corintionan 9:26 ta menciona tanto e boxdo como e coredo.) Boxdonan di antiguedad tawata lora nan mokete y pols den banchinan di cuero. Podise tawatin asta algun cu tawata haci e banchinan aki mas pisa cu “pidanan di chumbo, hero of metal. Y esakinan a herida e boxdonan gravemente.” E weganan bruto ei tawata causa sangramento, y tin bes asta morto.

En todo caso, e Cristiannan Hebreo tawatin bon ehempel di sirbidonan fiel di Dios cu a sufri persecucion y maltrato serio, asta te na morto, “te na punto di drama sanger.” Tuma nota di e contexto den cua Pablo a hala atencion na loke fiel sirbidonan di antiguedad a experencia:

“Nan a wordo piedra, nan a wordo di zag na dos, nan a wordo tenta, nan a wordo mata cu spada; nan a cana rond, bisti na cuero di carne, na cuero di cabrito, siendo bashi, aflihi, maltrata.” Despues di esei, Pablo a resalta e Perfeccionador di nos fe, Hesus: “[El] a soporta e sufrimento di [staca, NW], sin haci caso di berguensa, y a sinta na man drechi di e trono di Dios.”—Hebreonan 11:37; 12:2.

Si, hopi Cristian a ‘resisti te na e punto di drama sanger’, esta, te na morto. Nan resistencia tawata mas cu un lucha interno contra e pica di falta di fe. Nan tawata leal bou di maltrato fisico brutal, y a mantene nan fieldad te na morto.

Esnan mas resien den e congregacion na Jerusalem kisas a bira Cristian despues cu e persecucion severo di pasado a caba na nada, y nunca no a enfrenta e pruebanan extremo ei. (Echonan 7:54-60; 12:1, 2; Hebreonan 13:7) Toch, asta pruebanan menos severo tawata desanima algun di nan pa sigui den e lucha; nan a “cansa y perde animo.” (Hebreonan 12:3) Nan mester a progresa pa alcansa madures. Esaki lo a aumenta nan resistencia pa wanta kico cu lo a bini, asta si esei lo a encera maltrato fisico te na e punto cu nan mester a drama nan sanger.—Hebreonan 6:1; 12:7-11.

Hopi Cristian di tempo moderno a ‘resisti te na e punto di drama sanger’, door cu nan a ser ehecuta pasobra na no kier a compromete nan principionan Cristian. En bes di laga e palabranan di Pablo na Hebreonan 12:4 terorisa nos, nos por considera nan como un indicacion di te con leu nos ta dicidido pa keda leal na Dios. Mas despues den e mesun carta na e Hebreonan, Pablo a skirbi: “Laga nos mustra gratitud, pa medio di cual nos por ofrece na Dios un sirbishi aceptabel cu reverencia y temor.”—Hebreonan 12:28.