Principionan di Dios Por Beneficia Bo

SIN duda bo ta na haltura cu bestia tin un instinto cu ta dirigi nan. Hopi mashin a ser traha pa sigui instruccion y funciona na un cierto manera. Pero hende a ser crea pa sigui principio. Con bo por ta sigur di esei? Wel, ora Yehova, e Originador di tur principio husto, a crea e prome hendenan, El a anuncia: “Laga nos traha hende segun nos imagen, conforme nos semehansa.” E Creador ta un spirito; E no tin un curpa fisico manera nos. Pues nos ta den su “imagen” den sentido cu nos por refleha su personalidad y manifesta su excelente cualidadnan te na cierto grado. Hende tin e capasidad pa laga principio guia nan bida, esta, biba segun loke nan ta kere ta regla di bon conducta. Yehova a laga registra hopi di e principionan aki den su Palabra.—Genesis 1:26; Juan 4:24; 17:17.

Un hende lo por bisa: ‘Pero Bijbel ta contene cientos di principio. Ta con mi ta haci conoce nan tur?’ E por tin rason, pero pensa riba esaki: Aunke tur principio di Dios ta beneficioso,  algun ta hopi mas importante cu otro. Bo por mira esei for di Mateo 22:37-39, caminda Hesus a mustra cu entre e mandamentonan den e Lei di Moises y e principionan cu tawatin tras di esakinan, algun tawata mas importante cu otro.

Cua ta e principionan cu tin mas peso? E principionan clave di Bijbel ta esnan cu tin di aber directamente cu nos relacion cu Yehova. Si nos tuma esakinan na pecho, e Creador ta bira e influencia principal riba nos compas moral. Ademas di eseinan, tin principionan cu ta mustra con nos tin cu trata cu otro hende. Si nos aplica esakinan, nan lo yuda nos resisti e spirito di ‘ami prome’, of con cu bo kier yam’e.

Laga nos cuminsa cu un di e berdadnan mas importante den Bijbel. Kico e berdad ei ta, y ki influencia e tin riba nos?

“E Haltisimo Riba Henter Tera”

E Scritura Santo ta mustra bon cla cu Yehova ta nos Magnifico Creador, Dios Todopoderoso. Hamas E por ser iguala of remplasa. Esaki ta un berdad clave registra den Bijbel.—Genesis 17:1; Eclesiastes 12:1.

Un di e escritornan di e buki di Salmo a bisa di Yehova: “Abo so . . . ta e Haltisimo riba henter tera.” Rei David di antiguedad a bisa: “E dominio ta di Bo, o SEÑOR, y Abo ta halsa bo mes como cabes riba tur cos.” Y e profeta renombra Jeremias a sinti su mes conmovi pa skirbi: “No tin ningun manera Bo, o SEÑOR; grandi Bo ta, y bo nomber ta grandi den poder.”—Salmo 83:18; 1 Cronicanan 29:11; Jeremias 10:6.

Con nos mester aplica e berdadnan ei tocante Dios den nos bida di tur dia?

No tin duda ken realmente mester ta esun mas importante den nos bida: nos Creador y Dunador di Bida. Pesei anto, no ta na su luga pa resisti cualkier tendencia pa hala atencion na nos mes, un tendencia cu kisas ta mas fuerte den algun hende cu den otro? Un principio sabi cu por guia nos ta pa “haci tur [cos] pa e gloria di Dios.” (1 Corintionan 10:31) Profeta Daniel a pone un ehempel excelente relaciona cu esaki.

Historia ta mustra nos cu un biaha Rei Nabucodonosor di Babilonia a haya un soño cu a molesti’e y el a exigi pa e haya sa su nificacion. Aunke tur otro hende a keda confundi, Daniel si por a conta e rei exactamente loke e kier a sa. Daniel a tuma e merito pa esaki? No, el a duna gloria na “Dios den shelo cu ta revela misterio.” Daniel a sigui bisa: “E misterio aki no a wordo revela na mi pa motibo cu tin mas sabiduria den mi cu den cualkier otro hende bibo.” Daniel tawata un homber di principio. Nada straño cu den e buki di Daniel, e ta ser describi tres bes como “masha stima” den bista di Dios.—Daniel 2:28, 30; 9:23; 10:11, 19.

Si bo imita Daniel, esei lo beneficia bo. Pa sigui Daniel su ehempel, e factor decisivo ta motivacion. Ken mester haya e honor pa loke bo ta haci? Sea cual sea bo situacion, bo ta den e posicion pa actua na harmonia cu e principio biblico di vital importancia aki: Yehova ta e Soberano Señor. Si bo haci esei, lo bo bira “masha stima” den su bista.

 Awor, laga nos considera dos principio basico cu por guia nos riba e tereno di relacionnan humano. Apesar di e hopi enfasis cu hende ta pone riba nan mes, e area di bida aki ta specialmente dificil.

‘Cu Humildad di Mente’

Masha poco bes hende cu ta pone nan mes na prome luga ta sinti nan satisfecho. Mayoria kier un miho bida, y nan kier e awor. Pa nan, modestia ta un indicacion di debilidad. Nan ta haya cu ta otro hende so mester tin pasenshi. Ora ta toca nan actitud di ‘ami prome’, tur cos ta permiti. Bo ta kere cu abo si por tin un otro punto di bista y tambe comporta bo na un manera diferente?

Sirbidonan di Dios ta haya nan tur dia cu e actitud ei, pero e no mester afecta nan. Cristiannan maduro ta acepta e principio cu “no ta esun cu ta recomenda su mes ta keda aproba, ma esun cu Señor ta recomenda.”—2 Corintionan 10:18.

Ta bon pa aplica e principio na Filipencenan 2:3 y 4. E ta yuda sigur. E texto ei ta anima bo pa “no haci nada cu un actitud di egoismo of orguyo, ma cu humildad [di mente, NW] laga cada un di boso considera e otro mas importante cu e mes.” Asina lo bo ‘no busca bo interes personal so, ma . . . tambe interes di otronan.’

Un hende cu tawatin un bon actitud y cu no tawatin un opinion exagera di su balor como persona, tawata Gideon, un hues di e Hebreonan di antiguedad. E no a busca pa ta lider di Israel. Sinembargo, ora el a ser nombra  pa cumpli cu e papel ei, Gideon a mustra cu e no ta sinti su mes digno pa esei. El a splica: “Mi famia ta esun di mas menos den Manases, y ami ta esun di mas chikito den e cas di mi tata.”—Huesnan 6:12-16.

Ademas, despues cu Yehova a duna Gideon victoria, hombernan di Efraim a cuminsa pleita cu ne. Con Gideon a reacciona? E triunfo a pon’e sinti su mes mas importante cu otro hende? No. El a evita desaster door di duna un contesta suave. “Kico mi por a haci compara cu boso?” Gideon tawata humilde.—Huesnan 8:1-3.

Ta berdad cu e sucesonan cu a envolve Gideon a tuma luga hopi tempo pasa. Toch, ta importante pa considera e relato aki. Bo por mira cu Gideon tawatin un actitud basta diferente for di loke ta asina comun awe, y el a biba na harmonia cu esei, pa su beneficio.

E actitud prevalente di corda riba bo so por laga bo kere cu bo ta mas cu otro hende. Principionan di Bijbel ta corigi e pensamento incorecto ei. Esakinan ta mustra bo kico ta bo berdadero balor en relacion cu e Creador y otro personanan.

Door di tuma principionan di Bijbel na pecho, nos ta halsa nos mes riba e actitud di ‘ami prome’ cu ta na moda. Nos no ta laga sintimento of personalidad dirigi nos mas. Mas nos siña tocante principionan husto, miho nos ta siña conoce Esun cu a establece nan. Si, ta bale la pena pa nos tuma nota special di principionan di Dios ora nos ta lesa Bijbel.—Mira e cuadro.

Yehova a traha hende mas halto cu bestia. Bestia ta move principalmente riba instinto. Pa nos por cumpli cu Dios su boluntad, nos tin cu aplica principionan dibino. Asina nos por mantene nos compas moral den bon condicion, un compas cu lo dirigi nos den un sistema nobo cu Dios lo traha. Bijbel ta duna nos motibo pa spera masha pronto un sistema nobo rond mundo den cua ‘husticia ta biba.’—2 Pedro 3:13.

[Cuadro/Plachi na pagina 6]

Algun Principio Biblico Probechoso

Den famia:

“No laga ningun hende busca su mes interes, sino esun di su prohimo.”—1 Corintionan 10:24.

“Amor . . . no ta busca su propio interes.”—1 Corintionan 13:4, 5.

“Laga cada un di boso tambe stima su esposa manera su mes.”—Efesionan 5:33.

“Esposanan, sea sumiso na boso esposonan.”—Colosencenan 3:18.

“Scucha na bo tata cu a engendra bo, y no desprecia bo mama ora cu e bira bieu.”—Proverbionan 23:22.

Na scol, na trabou of den negoshi:

“Un balansa engañoso ta abominacion . . . E malbado ta ricibi pago engañoso.”—Proverbionan 11:1, 18.

“Laga esun cu ta horta, no horta mas; ma mas bien, lag’e traha.”—Efesionan 4:28.

“Si un hende no kier traha, no lag’e come tampoco.”—2 Tesalonicencenan 3:10.

“Tur loke boso haci, haci boso trabou di curason, como pa SEÑOR y no pa hende.”—Colosencenan 3:23.

“Cu deseo pa comporta nos mes den tur cos na un manera honorabel.”—Hebreonan 13:18.

Actitud pa cu rikesa:

“Esun cu ta pura pa bira rico lo no keda sin castigo.”—Proverbionan 28:20.

“Esun cu ta stima placa lo no keda satisfecho cu placa.”—Eclesiastes 5:10.

Con bo ta mira bo mes:

“Ora hende ta cana busca nan mes gloria, esei ta gloria?”—Proverbionan 25:27, NW.

“Laga un otro gaba bo, y no bo mes boca.”—Proverbionan 27:2.

“Mi ta bisa cada un di boso pa no pensa mas halto di su mes cu e mester pensa.”—Romanonan 12:3.

“Si un hende pensa cu e ta algo, siendo cu e no ta nada, e ta gaña su mes.”—Galationan 6:3.

[Plachi na pagina 5]

Daniel a duna e merito na Dios

[Plachi na pagina 7]

Ora bo ta trata otro hende na harmonia cu e principionan di Dios, esei ta contribui na felicidad y relacionnan placentero

[Reconocemento pa Potret na pagina 7]

U.S. Fish & Wildlife Service, Washington, D.C./Robert Bridges