Bautismo di Clovis—1.500 Aña di Catolicismo na Francia

“NA NOMBER di Papa, bum.” Esei tawata e mensahe cu tawatin hunto cu un bom improvisa cu nan a descubri den un misa na Francia cu Papa Juan Pablo II mester a bishita na september 1996. Esaki tawata un ehempel extremo di e oposicion cu a caracterisa su di cinco bishita na tera firme di Francia. Apesar di esei, rond di 200.000 hende a bini e stad Frances Reims e aña ei pa conmemora hunto cu papa e di 1.500 aniversario di e echo cu e Rei Franco Clovis a comberti bira Catolico. E rei aki, su bautismo a ser yama e bautismo di Francia. Pero ken e rei aki tawata? Y dicon conmemoracion di e bautismo aki a causa hopi controversia?

E Imperio Ta Disparciendo

Clovis a nace rond di aña 466 di Era Comun. E tawata yiu di Childeric I, rei di Franconan di Salia. Despues cu e Romanonan a domina e tribu Germano aki na 358 Era Comun, a permiti nan establece nan mes na loke awe ta Belgica bou di e condicion cu nan lo defende e frontera y duna e ehersito Romano solda. E contacto estrecho cu e Franconan a bin haya cu e poblacion Galo-Romano, a pone cu gradualmente nan a adopta e cultura Romano. Childeric I tawata un aliado di e Romanonan cu a lucha contra invasion di otro tribunan Germano manera e Visigodonan y e Saxonan. Esei a pone cu e pueblo Galo-Romano tawata masha gradicido na dje.

E provincia Romano di Galia a extende for di Riu Rijn, na nort, te na e seronan Pirineo den e parti sur. Sinembargo, despues di morto di e general Romano Aetio na 454 Era Comun, no tawatin autoridad gubernamental mas den e pais. Ademas, e caida di Romulo Augustulo, e ultimo emperador na Roma, na 476 Era Comun, y e fin di e parti west di e Imperio Romano, a causa hopi instabilidad politico den e region. Consecuentemente, Galia tawata manera un figo hecho cla pa un di e tribunan estableci denter di su fronteranan piki. Nada straño anto cu Clovis a cuminsa purba expande fronteranan di su reino despues cu el a sigui su tata riba trono. Na 486 Era Comun den un bataya banda di e stad di Soissons, el a derota e ultimo representante Romano na Galia. E victoria aki a dun’e dominio riba henter e teritorio entre Riu Somme na e parti nort y Riu Loire den Galia central y occidental.

E Homber Cu Lo A Bira Rei

Distinto for di e otro tribunan Germano, e Franconan si a keda pagano. Sinembargo,  Clovis su matrimonio cu un princes di Borgonia, Clotilde, tawatin un influencia profundo riba su bida. Como un Catolico ferviente, na un manera incansabel Clotilde a purba comberti su esposo. Di acuerdo cu e historia cu Gregorio di e stad Tours a skirbi den siglo 6, ta na 496 Era Comun durante e bataya di Tolbiac (Zülpich, Alemania) contra e tribu Alemani (hende cu ta papia dialecto Aleman), Clovis a priminti di bandona paganismo si e Dios di Clotilde por a garantis’e un victoria. Maske e trupanan di Clovis tawata na rand di nan derota, nan a asesina e rei Alemani y su ehersito a entrega. Pa Clovis, ta e Dios di Clotilde a dun’e e victoria. Segun tradicion, “San” Remigio a batisa Clovis den e catedral di Reims dia 25 di december 496 Era Comun. Sinembargo, tin hende ta kere cu ta mas probabel cu el a batisa mas despues, esta, entre aña 498 y 499 Era Comun.

E intentonan cu Clovis a haci pa captura e reino di Borgonia na e parti suitost a fracasa. Pero su campaña contra e Visigodonan a ser corona cu exito ora cu na 507 Era Comun el a derota nan na Vouillé banda di Poitiers. E victoria aki a dun’e dominio riba mayoria parti di suitwest Galia. Como reconocemento pa Clovis su victoria, e emperador di e Imperio Romano Oriental, Anastasio, a nombr’e consul honorario. Asina e tawatin un status mas halto cu tur e otro reinan occidental, y pa e poblacion Galo-Romano, su gobernacion tawata legal.

Despues cu Clovis a podera di e teritorio di e Franconan cu tawata yega te na costa oost di Riu Rijn, el a haci Paris su capital. Durante e ultimo añanan di su bida el a fortalece su reino. El a dun’e un codigo legal skirbi, e Lex Salica, y a convoca un consilio di iglesia na Orléans pa defini e relacionnan entre iglesia y estado. Ora el a muri, probablemente dia 27 di november 511 Era Comun, e tawata e unico gobernante di e tres districtonan di Galia.

The New Encyclopædia Britannica ta califica e combertimento di Clovis na fe Catolico como “un momento crucial den historia di Europa Occidental.” Dicon combertimento di e rei pagano aki tawata asina importante? E importancia ta sinta den e echo cu Clovis a scohe Catolicismo y no Arianismo.

Controversia den Arianismo

Rond di aña 320 Era Comun, Ario, un pastor na Alehandria, Egipto, a cuminsa plama ideanan radical tocante Trinidad. Ario a rechasa e idea di cu e Yiu tawata igual cu e Tata. E Yiu no  por tawata Dios of igual cu e Tata pasobra e si tawatin un principio. (Colosencenan 1:15) Pa loke ta e spirito santo, segun Ario e ta un persona pero inferior na tanto e Tata como e Yiu. E siñansa aki a bira hopi popular y a proboca oposicion severo den e religion. Na 325 Era Comun durante e Consilio di Nicea, nan a exilia Ario y condena su siñansanan. *

Sinembargo, esaki no a pone un fin na e controversia. E crisis en cuanto doctrina a sigui pa mas o menos 60 aña. Durante e añanan aki, e emperadornan cu a sigui otro cada bes a scohe un di e dos doctrinanan. Finalmente na 392 Era Comun, Emperador Teodosio I a haci Catolicismo Ortodox y su doctrina di Trinidad e religion di estado di e Imperio Romano. Mientras tanto, Ulfilas, un obispo Germano a comberti e Goticonan na Arianismo. No a tarda masha cu e otro tribunan Germano a adopta e forma di “Cristianismo” aki. *

Rond di tempo di Clovis, Iglesia Catolico na Galia tawata den crisis. E Visigodonan Ariano a purba suprimi e influencia di Catolicismo door di no permiti pa remplasa obisponan cu a muri. Ademas, den iglesia tawatin un lucha entre dos division papal, y sacerdotenan di sectanan opositor tawata mata otro na Roma. Pa haci e confusion mas piyo, algun escritor Catolico a lansa e idea di cu fin di mundo lo ta na aña 500 Era Comun. Pesei, nan a considera e combertimento di e conkistado Franco na Catolicismo como un suceso faborabel cu ta anuncia “e milenio nobo di e santonan.”

Pero ta kico a motiva Clovis? Maske no por exclui motibonan religioso completamente, loke e sigur tawatin na mente ta metanan politico. Door di scohe Catolicismo, Clovis a gana fabor di e pueblo Catolico Galo-Romano predominante y tambe e apoyo di e herarkia di iglesia cu tawatin hopi influencia. Esaki a dun’e un bentaha incuestionabel riba su rivalnan politico. Segun The New Encyclopædia Britannica “su conkista di Galia a bira un guera pa libertad for di e yugo di e herehenan Ariano cu hende tawata odia.”

Ken Clovis Tawata Realmente?

Den un introduccion pa e conmemoracion na 1996, e arsobispo di Reims, Gérard Defois, a describi Clovis como “e simbolo di un combertimento responsabel y bon plania.” Sinembargo, e historiado Frances, Ernest Lavisse,  a remarca: “Di ningun manera e combertimento di Clovis no a cambia su caracter, e moral bondadoso y pacifico di e Evangelio no a touch su curason.” Un otro historiado a declara: “En bes di inboca Odin [un dios Scandinavo], el a inboca Cristo y a keda mescos.” Reflehando e conducta di Constantino despues di su supuesto combertimento na Cristianismo, Clovis a cuminsa fortalece su gobernacion door di mata sistematicamente tur rival di su trono. El a extermina “tur su famianan te na e di seis grado.”

Despues di morto di Clovis, nan a cuminsa traha mitonan cu lo a elev’e di un guerero cruel te na un santo cu un bon reputacion. E relato cu Gregorio di Tours a skirbi casi un siglo despues ta ser considera como un esfuerso conciente pa asocia Clovis cu Constantino, e prome emperador Romano cu a acepta “Cristianismo.” Y door di pretende cu Clovis tawatin 30 aña ora el a batisa, ta parce cu Gregorio a purba establece un similaridad entre Clovis cu Cristo.—Lucas 3:23.

Den siglo 9, Hincmar, obispo di Reims, a sigui cu e mitonan aki. Tempo cu e catedralnan tawata competi pa haya peregrino, el a skirbi un biografia tocante su predecesor, “San” Remigio, probablemente cu e intencion di aumenta e fama di su iglesia y hacie mas rico. Su relato ta bisa cu un paloma blanco a trece un boter di azeta pa ungi Clovis na su bautismo. Aki claramente e ta referi na e echo cu Hesus a ser ungi cu spirito santo. (Mateo 3:16) Asina Hincmar a establece un relacion entre Clovis, Reims y e monarkia, y a duna credito na e idea di cu Clovis tawata e ungi di Señor. *

Un Conmemoracion Controversial

Expresidente di Francia, Charles de Gaulle, a yega di bisa: “Pa ami, e historia di Francia ta cuminsa cu Clovis, kende a ser scohi como rei di Francia door di e tribunan Franco cu a duna Francia nan nomber.” Sinembargo, no ta tur hende ta pensa asina. E conmemoracion di e di 1.500 aniversario di e bautismo di Clovis tawata controversial. Den un nacion caminda iglesia y estado tawata oficialmente separa desde 1905, hopi hende a critica e participacion di Estado den loke nan a considera un conmemoracion religioso. Ora e comision di e stad Reims a anuncia cu nan tin plan di financia e podio cu lo ser uza durante e bishita di papa, un asociacion a logra combence corte pa anula e decision ei. Otronan a sinti cu iglesia a bolbe purba impone su autoridad moral y civil riba Francia. Loke tambe a complica e conmemoracion tawata e mal uzo cu nan a haci di Clovis como un simbolo di e grupo ultra derechista Frente Nacional y di gruponan Catolico fundamentalista.

Otronan a critica e conmemoracion desde e punto di bista historico. Nan a bisa cu e bautismo di Clovis no a comberti Francia na Catolicismo pasobra e religion aki tawata firmemente establece caba den e pueblo Galo-Romano. Nan no a haya tampoco cu su bautismo a marca e nacemento di Francia como nacion. Nan a pensa cu ta mas apropiado pa pone e nacemento di Francia como nacion durante e division di e reinado di Karel e Grandi na 843 Era Comun, y esaki ta haci Karel e Calvo e prome Rei di Francia y no Clovis.

 1.500 Aña di Catolicismo

Con ta bai cu Catolicismo awe na Francia, despues di 1.500 aña como “e yiu mohe mayo di Iglesia”? Na 1938 Francia tawatin e cantidad mas grandi di Catolico batisa na mundo. Awor e ta na di seis luga, despues di paisnan manera Filipinas y Merca. Y maske tin 45 miyon Catolico na Francia, ta solamente 6 miyon ta bai misa regularmente. Un encuesta resien entre e Francesnan Catolico a revela cu 65 porshento di nan “no ta precupa cu loke Iglesia ta siña en cuanto asuntonan sexual”, y pa 5 porshento, Hesus no ta nifica “net nada.” Ta e tendencianan negativo ei a pone cu durante su bishita na Francia na 1980, papa a puntra: “Francia, kico bo a haci cu e promesanan di bo bautismo?”

[Nota]

[Mapa na pagina 27]

(Pa texto den su formato completo, wak publicacion)

SAXO

Riu Rijn

Riu Somme

Soissons

Reims

Paris

GALIA

Riu Loire

Vouillé

Poitiers

PIRENEO

VISIGODO

Roma

[Plachi na pagina 26]

Pintura di Clovis su bautismo den un manuscrito di siglo 14

[Reconcemento]

© Cliché Bibliothèque nationale de France, Paris

[Plachi na pagina 28]

Escultura di e bautismo di Clovis (e figura meimei) pafo di e catedral di Reims, Francia

[Plachi na pagina 29]

Juan Pablo II su bishita na Francia pa conmemora e bautismo di Clovis a causa controversia