Con Precioso e Berdad Ta pa Abo?
Con Precioso e Berdad Ta pa Abo?
“Boso lo conoce e berdad, y e berdad lo haci boso liber.”—JUAN 8:32.
1. Aparentemente, con Pilato a uza e palabra “berdad” diferente for di e manera cu Hesus a uz’e?
“KICO ta berdad?” Parce cu ora Pilato a haci e pregunta aki, e tawata kiermen berdad en general. Pero di otro banda, Hesus a caba di bisa: “Pa esaki mi a nace y pa esaki mi a bini den mundo, pa duna testimonio di e berdad.” (Juan 18:37, 38) Contrario cu Pilato, Hesus si a uza e articulo defini. El a bisa “e berdad.” E tawata papia di e berdad di Dios.
E Actitud Cu Mundo Tin pa e Berdad
2. Cua expresion di Hesus ta mustra cuanto balor e berdad tin?
2 Pablo a bisa: “No ta tur [hende] tin fe.” (2 Tesalonicencenan 3:2) Mescos nos lo por bisa tocante e berdad. Tin hopi hende cu ta ignora e berdad basa riba Bijbel asta ora nan haya chens di siñ’e. Y sinembargo, e ta algo asina precioso! Hesus a bisa: “Boso lo conoce e berdad, y e berdad lo haci boso liber.”—Juan 8:32.
3. Ki spiertamento tocante siñansa falso nos tin cu tuma na pecho?
3 Apostel Pablo a bisa cu bo no por haya e berdad den filosofia y tradicion di hende. (Colosencenan 2:8) Y esei ta berdad, pasobra e tipo di siñansanan ei ta gaña hende. Pablo a spierta e Cristiannan di Efeso cu si nan a pone fe den e cosnan ei, nan lo tawata manera baby spiritual “tira p’aki p’aya door di olanan, y hiba door di tur biento di doctrina, door di triki di hende, door di astucia den trahamento di plan engañoso.” (Efesionan 4:14) Awendia, hende cu ta opone e berdad di Dios ta promove e ‘trikinan di hende’ aki. Nan ta bon den troce berdad y promove mentira bou di capa di berdad. Pa nos por haya e berdad apesar di e presionnan sutil ei, nos tin cu investiga Bijbel diligentemente.
Cristiannan y Mundo
4. Pa ken e berdad ta disponibel, y ki obligacion esnan cu ricibie tin?
4 Den oracion, Hesucristo a referi na esnan cu a bira su disipelnan y a pidi Yehova: “Santifica nan den e berdad; Bo palabra ta berdad.” (Juan 17:17) Nan mester a ser santifica, esta, aparta, pa sirbi Yehova y siña hende tocante su nomber y su Reino. (Mateo 6:9, 10; 24:14) Aunke no ta tur hende tin e berdad di Yehova, e ta disponibel si como un regalo gratis na tur hende cu busc’e, sin importa nan nacionalidad, nan rasa of nan cultura. Apostel Pedro a bisa: “Mi ta comprende awor cu Dios no ta haci distincion di persona, ma den tur nacion e hende cu ta tem’e y cu ta haci husticia ta aceptabel p’e.”—Echonan 10:34, 35.
5. Dicon hopi bes hende ta persigui Cristiannan?
5 Cristiannan ta comparti e berdad di Bijbel cu otro hende, pero no ta tur caminda nan ta bon bini. Hesus a spierta nan: “Nan lo entrega boso na tribulacion y lo mata boso, y tur nacion lo odia boso pa causa di mi nomber.” (Mateo 24:9) Comentando riba e versiculo aki, John R. Cotter, un religioso Irlandes, a skirbi na 1817: “Na luga di gradici [Cristiannan] pa e esfuersonan cu nan ta haci pa drecha bida di hende pa medio di nan predicacion, hende lo a odia y persigui e disipelnan door cu nan ta expone nan mal custumbernan.” E persiguidonan ei no ta “acepta e amor pa e berdad, pa nan por wordo salba.” Pesei “Dios lo manda riba nan un influencia di eror, pa nan kere mentira, pa nan tur wordo husga, kendenan no a kere e berdad, ma a hiba gusto den maldad.”—2 Tesalonicencenan 2:10-12.
6. Ki deseo Cristiannan no mag cultiva?
6 Como cu Cristiannan ta biba den un mundo enemigo, apostel Juan ta spierta nan: “No stima mundo, ni e cosnan cu tin den mundo. . . . Tur loke cu tin den mundo, e deseo di carni y e deseo di wowo y e orguyo di bida, no ta bin di e Tata, sino di e mundo.” (1 Juan 2:15, 16) Juan ta papia di “tur loke tin den mundo.” E no ta laga nada afo. Pesei nos lo no mag cultiva un deseo pa nada cu e mundo aki tin di ofrece, cu por kita nos atencion for di e berdad. Juan su conseho lo ta un influencia poderoso den nos bida si nos scuch’e. Kico e influencia aki lo ta?
7. Con conocemento di e berdad ta motiva hende cu tin e actitud di curason corecto?
7 Durante aña 2001, Testigonan di Yehova rond mundo a conduci mas cu cuater miyon y mei studio di Bijbel pa luna, instruyendo hende individual y gruponan tocante e manera cu Dios ta spera pa nos hiba nos bida. E resultado tawata cu 263.431 hende a batisa. E lus di e berdad a bira precioso pa e disipelnan nobo aki, y nan a rechasa mal asociacion y e custumbernan inmoral asina comun den mundo, y cu ta deshonra Dios. For di dia cu nan a batisa, nan a keda cumpli cu e normanan cu Yehova ta pone pa tur Cristian. (Efesionan 5:5) E berdad ta asina precioso pa bo?
Yehova Ta Cuida Nos
8. Con Yehova ta responde na nos dedicacion, y pakico ta sabi pa “busca prome e reino”?
8 Apesar di nos imperfeccionnan, den su misericordia Yehova ta acepta nos dedicacion. Ta como si fuera e ta baha na nos nivel pa e atrae nos na dje. E ta siña nos eleva nos metanan y nos deseonan. (Salmo 113:6-8) Na mes momento Yehova ta permiti nos tin un relacion personal cu ne, y e ta priminti di cuida nos si nos “busca prome e reino di Dios y su husticia.” E ta priminti cu si nos haci esaki y cuida nos spiritualidad, ‘tur e cosnan aki lo wordo añadi na nos.’—Mateo 6:33.
9. Ken ta “e esclabo fiel y discreto”, y con Yehova ta cuida nos pa medio di e “esclabo” aki?
9 Hesucristo a scohe su 12 apostelnan, y a pone e fundeshi pa e congregacion di Cristiannan ungi cu a haya e nomber: “e Israel di Dios.” (Galationan 6:16; Revelacion 21:9, 14) Despues e congregacion aki a ser describi como “e iglesia di e Dios bibo, e pilar y sosten di e berdad.” (1 Timoteo 3:15) Hesus a bisa cu miembronan di e congregacion ei ta “e esclabo fiel y discreto” y “e fiel mayordomo, esun discreto.” Hesus a bisa cu e sirbido fiel ei lo tin e responsabilidad di duna Cristiannan nan “alimento na e debido tempo.” (Mateo 24:3, 45-47; Lucas 12:42, NW) Si nos no tin cuminda, nos ta muri di hamber. Mescos, si nos no tuma alimento spiritual, nos ta bira suak y muri den sentido spiritual. Pesei, e echo cu tin un “esclabo fiel y discreto” ta otro prueba mas di cu Yehova ta cuida nos. Laga nos semper sinti un gran aprecio pa e percuracionnan spiritual precioso cu nos ta ricibi pa medio di e “esclabo” ei.—Mateo 5:3.
10. Pakico ta vital pa nos t’ei presente na nos reunionnan regularmente?
10 Pa nos alimenta nos mes den sentido spiritual nos mester tin un studio personal. Ademas nos tin cu asocia cu otro Cristiannan y asisti na reunionnan di congregacion. Bo por corda precis kico bo a come seis luna pasa, of asta seis siman pasa? Casi sigur cu no. Toch, loke sea cu bo a come a duna bo e nutricion cu bo tawatin mester. Y casi sigur, entre tanto bo a bolbe come e mesun tipo di cuminda ei. Mescos ta cu e alimento spiritual cu nos ta ricibi na nos reunionnan Cristian. Nos por laga di corda delaster un detaye di loke nos ta tende na e reunionnan. Y casi sigur nos a tende informacion similar na mas cu un ocasion. Sinembargo, ta alimento spiritual e ta; vital pa nos bienestar. Semper nos reunionnan ta duna nos bon nutricion spiritual na e debido tempo.
11. Ki obligacionnan nos tin ora nos asisti na reunionnan Cristian?
11 Asisti na reunion Cristian ta pone un responsabilidad tambe riba nos. Cristiannan ta ser anima pa nan “curasha otro”, y stimula otro miembronan di congregacion “pa stima y haci bon obra.” Door di prepara, asisti y participa na tur reunion Cristian, nos ta fortalece nos propio fe, y nos ta anima otronan. (Hebreonan 10:23-25) Algun di nos por tin mester di animacion constante pa keda come spiritualmente, mescos cu mucha cu no gusta come tur cos. (Efesionan 4:13) Ta amoroso di nos parti pa duna e animacion ei ora ta necesario, pa hende asina por desaroya bira Cristian maduro, manera esnan cu apostel Pablo a papia di dje ora el a skirbi: “Cuminda solido ta pa hende madura, kendenan, pa motibo di practica, tin nan mente entrena pa dicerni loke ta bon y loke ta malo.”—Hebreonan 5:14.
Cuida Nos Mes den Sentido Spiritual
12. Na fin di cuenta, ta ken ta responsabel pa nos keda den e berdad? Splica.
12 Nos casa of nos mayornan por stimula nos riba e caminda di e berdad. Ancianonan di congregacion tambe por pastoria nos como parti di e tou den nan cuido. (Echonan 20:28) Pero na fin di cuenta, ta ken ta responsabel pa nos persevera y sigui biba na harmonia cu e berdad? Ta cada un di nos mes ta carga e responsabilidad ei, y ta asina, tanto den tempo bon como den tempo dificil. Tuma e siguiente suceso como ehempel.
13, 14. Manera loke a pasa cu e lamchi ta mustra, con nos por haya e yudansa spiritual necesario?
13 Na Escocia un par di lamchi tawata come yerba riba un veld na halto. Un di nan a dual bai na rand di e sero y lora bai cai riba un rand di e sero un poco mas abou. Nada no a pas’e, pero e tawatin miedo, y e no por a subi bek. El a cuminsa grita pa yudansa. Su mama a tend’e, y e tambe a cuminsa grita te ora e wardado di carne a bin scapa e lamchi.
14 Paga tino con e cos a desaroya. E lamchi a grita pa yudansa, e mama tambe a cuminsa grita hunto cu ne, y ora e wardado a tende, el a drenta accion mesora pa scapa e lamchi. Si un bestia asina chikito y su mama mes por reconoce peliger y pidi yudansa mesora, nos no mester haci mescos ora nos trompica spiritualmente of enfrenta peliger inespera di e mundo di Satanas? (Santiago 5:14, 15; 1 Pedro 5:8) Esei ta loke nos mester haci, y mas ainda si nos falta experencia, sea pasobra nos ta hoben of pasobra nos ta relativamente nobo den e berdad.
Sigui Dios Su Guia Ta Trece Bendicion
15. Con un señora a sinti ora el a cuminsa asocia cu e congregacion Cristian?
15 Comprendemento di Bijbel y e pas mental cu e ta trece pa hende cu ta sirbi e Dios di e berdad tin gran balor. Wak un ehempel aki: Un señora di 70 aña cu a bai Iglesia Anglicano henter su bida a acepta un studio di Bijbel cu un Testigo di Yehova. Den poco tempo el a siña cu Dios su nomber ta Yehova, y e tambe a cuminsa bisa “amen” na final di e oracionnan publico sinsero na e Salon di Reino local. Yen di emocion el a bisa: “Na luga di haci como si fuera Dios ta inalcansablemente halto pa hende, ta manera cos cu boso ta trec’e te meimei di nos manera un amigo stima. Nunca mi a yega di mira algo asina.” Probablemente nunca e kerido señora interesa ei lo lubida e prome impresion cu e berdad a haci riba dje. Laga nos tampoco no lubida nunca kico e berdad a nifica pa nos ora nos a acept’e inicialmente.
16. (a) Kico por sosode si nos haci ganamento di placa nos meta principal? (b) Con nos por haya berdadero felicidad?
16 Hopi hende ta pensa cu si nan tawatin mas placa nan lo tawata mas felis. Pero si nos haci ganamento di placa nos meta principal den bida, nos lo por ‘causa nos mes tur sorto di dolo di curason.’ (1 Timoteo 6:10, Beibel na papiamentu koriente) Pensa cuanto hende ta cumpra biyechi, gasta placa den casino, of specula pa loco riba bolsa di balor, soñando cu gana un fortuna. Masha masha poco di nan ta logra e fortuna cu nan ta spera. Y hopi bes, asta esnan cu logra ta mira cu e rikesa cu nan a haya diripiente no a duna nan felicidad. Mas bien, felicidad duradero ta bini door di haci Yehova su boluntad, traha cu e congregacion Cristian cu guia di e spirito santo di Yehova y yudansa di su angelnan. (Salmo 1:1-3; 84:4, 5; 89:15) Ora nos haci esaki, nos por haya bendicionnan cu nos no ta ni spera. E berdad ta suficiente precioso pa bo pa e trece bendicionnan asina den bo bida?
17. E echo cu Pedro a keda cerca Simon, un curtido di cuero, ta revela kico tocante e actitud di e apostel?
17 Pensa riba e experencia di apostel Pedro. Na aña 36 Era Comun el a biaha bai Yanura di Saron como misionero. El a haci un parada na Lida y a cura Eneas, cu tawata lam. Despues el a sigui pa e haf di Yope. Ei el a resucita Dorcas. Echonan 9:43 ta conta nos: “El a keda hopi dia na Yope cerca un tal Simon, curtido di cuero.” E referencia casual aki ta mustra cu Pedro no tawatin prehuicio contra e hendenan di e stad caminda e tawata predica. Con asina? Un erudito di Bijbel, Frederic W. Farrar ta skirbi: “Ningun siguido stricto y inflexibel di e Lei Oral [di Moises] lo kier a bai keda na cas di un curtido di cuero. Door cu e ofishi a implica contacto diario cu cuero y cadaver di varios bestia, y door di e materialnan cu tawata necesario pa e trabou, tur legalista stricto tawata hay’e algo impuro y fis.” Ni maske Simon su cas “pega cu lama” no tawata cerca di su tayer, toch Simon tawatin ‘un ofishi despreciabel cu lo por baha e respet propio di tur hende cu tawatin un ofishi asina’, segun Farrar.—Echonan 10:6.
18, 19. (a) Dicon e vision cu Pedro a ricibi a lag’e confundi? (b) Ki bendicion inespera a toca Pedro?
18 Sin prehuicio, Pedro a acepta Simon su hospitalidad, y ei, sin cu el a spera, Dios a duna Pedro un guia. El a mira un vision caminda Dios a mand’e come bestia impuro segun lei Hudiu. Pedro a protesta cu nunca el a “come nada profano ni impuro.” Pero Dios a bis’e tres bes: “Loke Dios a haci limpi, no considera esei profano.” Manera ta di comprende, “Pedro tawata masha confundi tocante di kico e vision cu el a mira por ta nifica.”—Echonan 10:5-17; 11:7-10.
19 Pedro no tawata sa cu e dia prome na Cesarea, un 50 kilometer leu, un homber gentil yama Cornelio tambe a haya un vision. E angel di Yehova a bisa Cornelio manda algun sirbido pa busca Pedro den cas di Simon e curtido di cuero. Cornelio a manda su sirbidonan na cas di Simon, y Pedro a bini cu nan bek Cesarea. Despues cu el a yega el a predica na Cornelio, su famia y su amigonan. Como resultado nan a bira e prome creyentenan gentil no-circuncida cu a ricibi spirito santo como heredero di e Reino. Apesar cu e hombernan no tawata circuncida, tur esnan cu a tende Pedro su mensahe a batisa. Esaki a habri e posibilidad pa hende di e nacionnan—cu for di e punto di bista Hudiu tawata impuro—por a bira miembro di e congregacion Cristian. (Echonan 10:1-48; 11:18) Pedro tawatin un privilegio masha grandi, y el a hay’e debi cu e berdad tawata precioso p’e y a pon’e sigui Yehova su guia y actua cu fe!
20. Ki yudansa nos ta ricibi di Dios ora nos pone e berdad na prome luga den nos bida?
20 Pablo ta urgi nos: “Papiando e berdad den amor, nos tin di crece den tur aspecto den dje, kende ta e cabes, esta, Cristo.” (Efesionan 4:15) Si, e berdad lo duna nos felicidad incomparabel for di awor si nos pon’e na prome luga den nos bida y permiti Yehova guia nos pasonan cu su spirito santo. Corda tambe cu nos ta conta cu apoyo di spirito santo y angel den nos trabou di evangelisa. (Revelacion 14:6, 7; 22:6) Nos ta hopi privilegia di por tin tal apoyo pa e trabou cu Yehova a encarga nos cu ne! Door di keda integro nos lo por alaba Yehova, e Dios di e berdad, pa henter eternidad. Kico por ta mas precioso cu esei?—Juan 17:3.
Kico Nos A Siña?
• Dicon hopi hende no ta acepta e berdad?
• Con Cristiannan mester considera cosnan di e mundo di Satanas?
• Ki actitud nos mester tin tocante nos reunionnan, y pakico?
• Ki responsabilidad nos tin pa loke ta trata nos bienestar spiritual?
[Preguntanan di Estudio]
[Mapa/Plachi na pagina 18]
(Pa texto den su formato completo, wak publicacion)
LAMA GRANDI
Cesarea
YANURA DI SARON
Yope
Lida
Jerusalem
[Plachi]
Pedro a sigui Dios su guia y a haya bendicion inespera
[Reconocemento]
Mapa: Mountain High Maps® Copyright © 1997 Digital Wisdom, Inc.
[Plachi na pagina 13]
Hesus a duna testimonio di e berdad
[Plachi na pagina 15]
Mescos cu alimento fisico, alimento spiritual ta esencial pa nos bienestar