Dicon e Mundo Antiguo Aya A Caba?

E DILUBIO mundial no tawata un desaster natural. E tawata Dios su huicio. El a duna spiertamento, pero casi tur hende a ignor’e. Con bin? Hesus a splica cu “den e dianan ei prome cu e dilubio, [hende tawata] comiendo y bebiendo, hombernan casando y mohenan siendo duna den matrimonio, te na e dia cu Noe a drenta den e arca; y nan no a haci caso te cu e dilubio a bini y a bari nan tur.”—Mateo 24:38, 39, NW.

Un Civilisacion Avansa

Den algun sentido, e civilisacion cu a existi prome cu Dilubio a gosa di cierto bentahanan cu nos djawe no tin. Por ehempel, tur hende tawata papia e mesun idioma. (Genesis 11:1) Esei lo a yuda nan alcansa logronan den arte y ciencia cu ta rekeri esfuerso combina di hopi hende cu diferente habilidad. Ademas, door cu mayoria hende e tempo ei tawata biba hopi largo, nan por a keda acumula conocemento y habilidad pa siglonan largo.

Tin hende ta pretende cu no ta berdad cu bida di hende tawata asina largo den e tempo aya. Nan ta bisa cu loke Bijbel ta yama aña, kiermen luna. Esei ta berdad? Wel, tuma Mahalaleel como un ehempel. Bijbel ta bisa: “Tempo cu Mahalaleel tawatin 65 aña, el a engendra Jared. . . . Tur e dianan di Mahalaleel tawata 895 aña, y el a muri.” (Genesis 5:15-17) Si un aña ta nifica un luna, Mahalaleel a bira tata ora e tawatin cinco aña di edad! No, e tempo ei hende tawata mas cerca di e vigor perfecto di  e prome homber Adam. Di berdad nan tawata biba cientos di aña. Kico nan a logra?

Hopi siglo prome cu Dilubio, poblacion di tera a crece asina tanto cu Cain yiu di Adam por a traha un stad y yam’e Enoc. (Genesis 4:17) Durante e siglonan prome cu Dilubio, hende a desaroya varios tipo di ofishi. Nan tawata traha “tur herment di brons y hero.” (Genesis 4:22) Sin duda, nan tawata uza e hermentnan aki den construccion, carpinteria, agricultura y cosemento di paña. Tur e diferente ofishinan aki ta bini padilanti den e relatonan tocante e prome hendenan riba tera.

E conocemento cu nan a acumula lo a permiti un generacion tras di otro desaroya habilidadnan spesifico manera trahamento cu metal, criamento di baca y bestia chikito, skirbimento y arte. Yubal por ehempel, tawata “tata di tur esnan cu ta toca harpa y fluit.” (Genesis 4:21) Nan civilisacion a desaroya ampliamente. Sinembargo, tur cos a caba diripiente. Ta kico a pasa?

Ta Kico A Bai Robes?

Maske e sociedad prome cu Dilubio tawatin hopi bentaha, el a cuminsa malo si. Su fundado Adam tawata un rebelde contra Dios. Cain, cu a traha e prome stad registra den historia, a mata su mes ruman. Nada straño cu maldad a bai di malo pa piyo! E consecuencianan di e herencia mancaron cu Adam a bai laga pa su yiunan a acumula y bira mas y mas serio.—Romanonan 5:12.

Claramente, e situacion tawata birando explosivo na momento cu Yehova a dicidi cu ta pa 120 aña so mas lo E lag’e sigui. (Genesis 6:3) Bijbel ta bisa: ‘Maldad di hende tawata grandi riba tera, y tur intencion di e pensamentonan di su curason tawata continuamente maldad so. Tera tawata yen di violencia.’—Genesis 6:5, 11.

Cu tempo, Dios a bisa Noe spesificamente cu e tawata bai destrui tur carni cu un dilubio. (Genesis 6:13, 17) Apesar cu Noe a bira “un predicado di husticia”, parce cu e hendenan no por a caba di kere cu tur cos cu tawatin rond di nan tawata bai caba. (2 Pedro 2:5) Ocho hende so a scucha e spiertamento y scapa. (1 Pedro 3:20) Dicon esaki ta importante pa nos awe?

Kico E Ta Nifica pa Nos?

Nos ta biba den un tempo cu parce e tempo di Noe. Regularmente nos ta tende di teribel actonan terorista, genocidio, hende arma cu ta cana mata un cantidad di hende aparentemente sin motibo, y violencia den famia na un escala spantoso. Un biaha mas, mundo ta yen di violencia. Y mescos cu prome, Dios a pone mundo na haltura cu tin un huicio na caminda. Hesus mes a bisa cu lo e bini como Dios su Hues nombra y separa hende manera un wardado ta separa carne for di cabrito. Segun Hesus, esnan cu ser considera indigno “lo bai pa cortamento eterno.” (Mateo 25:31-33, 46, NW) Pero Bijbel ta bisa cu e biaha aki si lo tin miyones di hende cu lo sobrevivi; un multitud grandi cu ta adora e unico Dios berdadero. Den e mundo cu lo bini, nan ta bai gosa di bida den pas y siguridad permanente manera nunca prome.—Mikeas 4:3, 4; Revelacion 7:9-17.

Hopi hende ta hari e declaracionnan di Bijbel ei, y e advertencianan tocante e ehecucion di huicio cu ta bai proba cu e declaracionnan ei ta berdad. Pero apostel Pedro a splica cu e tipo di hende ei cu no kier kere, ta ignora cierto echonan. El a skirbi: “Den e ultimo dianan bofonadonan lo bin . . . bisando: ‘Unda e promesa di su binida ta?’ . . . Pasobra di nan mes boluntad nan no kier acepta e echo aki, cu pa medio di e palabra di Dios e shelonan a existi di hopi tempo pasa y e tera a wordo forma for di awa y pa medio di awa, door di cua e mundo di e tempo ei a wordo destrui, siendo inunda cu awa. Ma e shelonan y e tera actual pa medio di su palabra  ta wordo reserva pa candela, warda pa e dia di huicio y destruccion di hendenan impio.”—2 Pedro 3:3-7.

Awe, obedeciendo e mandamento profetico di Hesus, predicadonan celoso ta proclama un advertencia mundial tocante e dia di huicio cu ta na caminda, y tambe un mensahe di bon nobo tocante e pas cu lo bini despues di esei. (Mateo 24:14) No mester balota e importancia di e advertencia aki. Dios Todopoderoso ta cumpli cu loke E priminti.

E Mundo Cu Ta na Caminda

Si tin un cambio asina grandi na caminda, con humanidad su futuro lo bai ta? Den e introduccion di Hesus su famoso Sermon Riba Sero, el a priminti: “Bendiciona ta esnan humilde, pasobra nan lo hereda e tera.” Despues el a siña su disipelnan resa pidi Dios: “Cu bo boluntad sosode na tera mescos cu den shelo.” (Mateo 5:5; 6:10) Si, Hesus mes a siña cu tin un futuro maravioso aki mes riba tera ta spera humanidad obediente. El a yama esaki “e regeneracion” of recreacion.—Mateo 19:28.

Pues, segun cu bo ta medita tocante futuro, no laga bofonadonan pone bo duda den Dios su spiertamento. Ta berdad cu mundo rond di nos ta parce stabil, y cu el a existi pa hopi tempo caba. Pero nos no mester pone nos confiansa den dje. Mundo di humanidad a ser condena. Pesei, tuma curashi for di loke apostel Pedro ta bisa na final di su carta:

“Como cu tur e cosnan aki lo wordo destrui di e manera aki, ki sorto di hende boso mester ta den un conducta santo y deboto, sperando y purando e binida di e dia di Dios . . . Como cu boso ta spera e cosnan aki, sea diligente pa e haya boso den pas. . . . Crece den e gracia y conocemento di nos Señor y Salbador Hesucristo.” (2 Pedro 3:11, 12, 14, 18) Pesei, saca un les for di loke a tuma luga den tempo di Noe. Hala cerca Dios. Crece den conocemento di Hesucristo. Desaroya debocion na Dios, y sea entre e miyones di hendenan cu ta scohe pa sobrevivi e fin di e mundo aki, pa drenta den e pacifico mundo nobo cu ta na caminda.

[Plachi na pagina 5]

For di prome cu Dilubio hende por a traha cu metal

[Plachi na pagina 7]

Un futuro maravioso ta na caminda