“Esaki Si Por Haci Dolo”

BO A yega di tende e palabranan ei? Kisas un docter of un verpleegster a yega di bisa bo asina prome cu e duna bo un tratamento cu ta ser recomenda.

Probablemente bo no a nenga di acepta e tratamento djis pa bo no sinti e dolo cu nan a spierta bo di dje. Mas bien, bo ta wanta e dolo pa despues bo por bira bon. Den casonan extremo, acepta of rechasa un tratamento doloroso por ta un asunto di bida of morto.

Maske no ta semper nos tin mester di atencion medico, nos tur ta hende imperfecto y nos tin mester di disiplina of coreccion, asta ora e por ta un poco doloroso. (Jeremias 10:23) Enfatisando e necesidad cu muchanan tin di esaki, Bijbel ta bisa: “Locura ta mara den curason di un mucha; bara di coreccion lo aleha esaki for di dje.”—Proverbionan 22:15.

Den e caso aki, bara ta un simbolo di e autoridad cu mayornan tin. Ta cierto cu masha poco mucha ta gusta disiplina. Si e ta encera cierto castigo, kisas nan por resistie. Sinembargo, mayornan sabi y amoroso ta wak mas aya di e sintimentonan ofendi di nan yiunan. Nan ta concentra riba e beneficionan cu ta bin den futuro. Mayornan Cristian sa cu e Palabra di Dios tin rason ora e ta bisa: “Na e momento mes ningun disiplina no ta parce di ta causa di goso, sino di dolo; ma pa esnan cu a wordo entrena door di dje, despues e ta duna e fruta pacifico di husticia.”—Hebreonan 12:11; Proverbionan 13:24.

Claro cu no ta mucha so tin mester di disiplina. Adultonan tambe tin mester di dje. Ta cu nan Bijbel ta papia ora e ta bisa: “Gara instruccion [disiplina, NW]; no lag’e bai. Cuid’e, pasobra e ta bo bida.” (Proverbionan 4:13) Si, hende sabi—hoben y bieu—ta acepta disiplina basa riba e Palabra di Dios, Bijbel, pasobra ora nan haci esei, cu tempo lo e proteha nan bida.