Henter un Mundo A Ser Destrui!

Tira un bista riba mundo rond di bo, cu su stadnan, su cultura, su logronan cientifico y e miles di miyones di hendenan riba dje. Facilmente bo por kere cu e ta masha solido, no ta berdad? Bo ta kere cu un dia henter e mundo aki por disparce? Por ta dificil pa imagina algo asina. Pero bo tawata sa cu segun un fuente hopi confiabel, a existi un mundo prome cu esun aki, cu a ser destrui completamente?

NOS no ta papiando di un mundo di tribunan primitivo. E mundo cu a bai perdi tawata civilisa, cu stad, logro artistico y conocemento cientifico. Sinembargo, historia di Bijbel ta bisa cu diripiente, riba e di 17 dia di e di dos luna, 352 aña prome cu e patriarca Abraham a nace, a cuminsa un dilubio cu a caba cu henter un mundo. *

 E historia aki ta corecto? Di berdad e cos ei a pasa? A existi un mundo antiguo floreciente prome cu esun actual, anto el a ser destrui? Si ta asina, pakico e mester a caba? Kico tawata e problema? Y nos por siña un les for di su destruccion?

Di Berdad un Mundo Antiguo A Ser Destrui?

Si un cataclismo spantoso asina a sosode di berdad, nunca hende lo no a lubid’e por completo. Pesei mes, hopi nacion tin cos cu ta corda hende di e destruccion ei. Tuma por ehempel, e fecha exacto registra den Bijbel. Riba e kalender di e tempo ei, e di dos luna tawata core entre loke awe nos conoce como meimei di october, y meimei di november. Pues, e di 17 dia lo a cai mas o menos riba dia prome di november. Kisas no ta pa casualidad anto cu hende den hopi pais ta celebra dia di defunto den e temporada di aña ei.

Ainda bo por topa rastro di e Dilubio den tradicion di hende. Casi tur pueblo antiguo tin un leyenda cu ta bisa cu nan antepasadonan a sobrevivi un dilubio mundial. Pigmeonan di Africa, Keltanan di Europa, Incanan di Sur America; tur tin leyenda similar, y tambe pueblonan di Alaska, China, India, Lituania, Mexico, Micronesia, Nueva Zelandia, Australia y algun parti di Nort America, djis pa menciona un par so.

Claro cu segun tempo a pasa, hende a floria e leyendanan. Toch nan tur ta contene varios detaye cu ta indica cu nan a bini for di e mesun historia original: Dios a rabia pa maldad di hende. El a trece un dilubio grandi. Tur hende a ser destrui, cu excepcion di un par di hende husto cu a scapa. Nan a traha un nave den cua hende y bestia a scapa. Cu tempo nan a manda parha bai busca tera seco. Finalmente e nave a bin baha riba un sero. Despues cu e hendenan a sali, nan a ofrece un sacrificio.

Kico esaki ta proba? Ta imposibel pa e similaridadnan aki ta puro casualidad. E evidencia cu tur e leyendanan aki ta duna, ta confirma e testimonio antiguo di Bijbel. Segun Bijbel, tur hende a bini di e sobrevivientenan di un dilubio cu a destrui un mundo di humanidad. Pesei, nos no tin nodi depende riba leyenda y mito pa nos sa ta kico a pasa. Nos tin e relato conserva cuidadosamente den e parti Hebreo di Bijbel.—Genesis capitulo 6-8.

Bijbel ta contene un registro inspira di historia cu ta bai bek te na comienso di bida.  Pero evidencia ta mustra cu Bijbel ta mas cu historia so. Su profecianan infalibel y su sabiduria profundo ta mustra cu Bijbel ta loke e ta bisa cu e ta: Dios su manera di comunica cu humanidad. Contrario cu mitonan, Bijbel si ta menciona nomber y fecha, y tambe detayenan di genealogia y geografia den su relatonan historico. E ta duna nos un idea di con bida tawata prome cu Dilubio, y e ta revela pakico henter un mundo a yega na su fin diripiente.

Ta kico a bai robes cu e sociedad cu tawatin prome cu Dilubio? E siguiente articulo ta trata e pregunta ei. E ta un pregunta importante pa hende cu ta puntra nan mes con sigur e futuro di nos civilisacion actual ta.

[Nota]

[Tabel na pagina 4]

(Pa texto den su formato completo, wak publicacion)

Leyendanan di Dilubio Rond Mundo

Pais Puntonan Cu Ta Cuadra 1 2 3 4 5 6 7 8 9 10

Grecia 7 ◆ ◆ ◆ ◆ ◆ ◆ ◆

Roma 6 ◆ ◆ ◆ ◆ ◆ ◆

Lituania 6 ◆ ◆ ◆ ◆ ◆ ◆

Asiria 9 ◆ ◆ ◆ ◆ ◆ ◆ ◆ ◆ ◆

Tanzania 7 ◆ ◆ ◆ ◆ ◆ ◆ ◆

India - Hindu 6 ◆ ◆ ◆ ◆ ◆ ◆

Nueva Zelandia - Maori 5 ◆ ◆ ◆ ◆ ◆

Micronesia 7 ◆ ◆ ◆ ◆ ◆ ◆ ◆

Washington, Merca - Yakima 7 ◆ ◆ ◆ ◆ ◆ ◆ ◆

Mississippi, Merca - Choctaw 7 ◆ ◆ ◆ ◆ ◆ ◆ ◆

Mexico - Michoacan 5 ◆ ◆ ◆ ◆ ◆

Sur America - Quechua 4 ◆ ◆ ◆ ◆

Bolivia - Chiriguano 5 ◆ ◆ ◆ ◆ ◆

Guyana - Arawak 6 ◆ ◆ ◆ ◆ ◆ ◆

1: Maldad a pone Dios rabia

2: Destruccion door di Dilubio

3: Manda door di Dios

4: Cu advertencia dibino

5: Poco hende a sobrevivi

6: A scapa den un nave

7: Bestia a scapa

8: A manda parha of otro sorto di bestia

9: Nave a bin resulta riba un sero

10: Sacrificio ofreci