Lus di Dios Ta Ilumina Scuridad!

“SEÑOR ta ilumina mi scuridad.”—2 SAMUEL 22:29.

1. Kico lus tin di aber cu bida?

“DIOS a bisa: ‘Laga tin lus.’ Y tawatin lus.” (Genesis 1:3) Cu e palabranan memorabel ei, e relato di creacion den Genesis ta mustra cu ta Yehova ta e fuente di lus. Y sin lus lo no por tawatin bida riba tera. Yehova ta e fuente di lus spiritual tambe. E lus aki ta vital. E ta sirbi como nos guia riba e caminda di bida. (Salmo 43:3) Rey David a mustra con importante lus spiritual ta pa bida, ora el a skirbi: “Ta cerca bo e fuente di bida ta; den bo lus nos ta mira lus.”—Salmo 36:9.

2. Manera Pablo a mustra, cu kico lus ta estrechamente liga?

² Mas o menos 1.000 aña despues cu David a biba, apostel Pablo a haci referencia na e relato di creacion. Den su carta pa e congregacion Cristian na Corinto, el a skirbi: “Dios a bisa: ‘Lus lo resplandece for di scuridad.’” Despues Pablo a mustra cu lus spiritual tin hopi di aber cu e conocemento cu Yehova ta duna. El a sigui bisa: “[Dios] a resplandece den nos curason pa duna e lus di e conocemento di e gloria di Dios den cara di Cristo.” (2 Corintionan 4:6) Con e lus aki ta yega cerca nos?

Bijbel Ta Transmiti Lus

3. Ki lus Yehova ta percura pa nos via Bijbel?

³ Yehova ta transmiti lus spiritual principalmente via Bijbel, su Palabra inspira. Pesei, segun cu nos studia Bijbel y gana conocemento di Dios, nos ta laga su lus briya riba nos. Via Bijbel Yehova ta tira lus riba su propositonan, y e ta siña nos con nos por haci su boluntad. E informacion ei ta duna nos bida proposito, y ta yuda satisface nos necesidad spiritual. (Eclesiastes 12:1; Mateo 5:3) Hesus a mustra cu ta importante pa nos duna atencion na nos necesidadnan spiritual. Citando e Lei di Moises, el a bisa: “Ta para skirbi: ‘Hende lo no biba di pan so, ma di tur palabra cu ta sali for di boca di Dios.’”—Mateo 4:4; Deuteronomio 8:3.

4. Den ki sentido Hesus ta “e lus di mundo”?

⁴ Hesus ta ser asocia hopi cu lus spiritual. De echo, e mes a bisa cu e ta “e lus di mundo”, y cu ‘esun cu siguie lo no cana den scuridad, ma lo tin e lus di bida.’ (Juan 8:12) E expresion aki ta yuda nos comprende e papel crucial cu Hesus ta hunga den transmiti e berdad di Yehova na humanidad. Si nos kier evita scuridad  y cana den e lus di Dios, nos tin cu scucha tur loke Hesus ta bisa, y cu sumo cuidou nos mester sigui su ehempel y siñansanan skirbi den Bijbel.

5. Ki responsabilidad e siguidonan di Hesus tawatin despues di su morto?

⁵ Un par di dia prome cu Hesus a muri, el a bolbe referi na su mes como e lus, y a bisa su disipelnan: “Pa un poco tempo mas e lus ta meimei di boso. Cana mientras cu boso tin e lus, pa scuridad no sorprende boso; esun cu ta cana den scuridad no sa unda e ta bai. Mientras cu boso tin e lus, kere den e lus, pa boso por bira yiunan di lus.” (Juan 12:35, 36) Esnan cu a bira yiunan di lus a siña e patronchi di “palabranan sano” cu tin den Bijbel. (2 Timoteo 1:13, 14) Despues nan a uza e palabranan sano aki pa atrae hende sinsero for di den scuridad, pa nan bini den e lus di Dios.

6. Ki berdad basico tocante lus y scuridad nos ta mira na 1 Juan 1:5?

⁶ Apostel Juan a skirbi: “Dios ta lus y den dje no tin nada nada di scuridad.” (1 Juan 1:5) Aki Juan ta haci un contraste entre lus y scuridad. Lus spiritual ta bini di Yehova, y scuridad spiritual no por tin nada di aber cu ne. Ken ta e fuente di scuridad spiritual anto?

E Fuente di Scuridad Spiritual

7. Ken ta tras di e scuridad spiritual cu mundo ta aden, y ki influencia e tin?

⁷ Apostel Pablo a papia di “e dios di e mundo aki.” Cu esei e tawata kiermen Satanas e Diabel. El a sigui bisa cu Satanas “a ciega mente di esnan cu no ta kere, pa nan no mira e lus di e evangelio di e gloria di Cristo, kende ta e imagen di Dios.” (2 Corintionan 4:4) Hopi hende ta bisa cu nan ta kere den Dios. Sinembargo, cada bes menos di e hendenan aki ta kere cu ta existi un Diabel. Dicon? Debi cu nan no ta dispuesto di acepta cu por ta existi un poder sobrehumano malbado cu por influencia nan manera di pensa. Sinembargo, manera Pablo ta mustra, Diabel ta existi, y e ta influencia hende di manera cu nan no por mira e lus di e berdad. E poder cu Satanas tin pa influencia mente di hende ta bini bon cla padilanti caminda Bijbel ta describie profeticamente como esun cu “ta gaña henter mundo.” (Revelacion 12:9) Debi na e actividadnan di Satanas, awor henter humanidad, cu excepcion di esnan cu ta sirbi Yehova, ta den e situacion cu Isaias a profetisa: “Mira, scuridad lo tapa tera, y scuridad profundo e pueblonan.”—Isaias 60:2.

8. Kico ta mustra cu hende den scuridad spiritual ta desorienta?

⁸ Den scuridad diki bo no por mira absolutamente nada. Ta facil pa bo perde of desorienta. Mescos, hende cu ta den scuridad spiritual no tin nocion di unda nan ta para, y nan ta bira desorienta den sentido spiritual. Nan por perde nan capasidad di distingui berdad for di mentira, y bon for di malo. Profeta Isaias a papia di hende den scuridad spiritual asina, ora el a skirbi: “Ai di esnan cu ta yama loke ta malo, bon, y loke ta bon, malo, loke ta scuridad, lus, y loke ta lus, scuridad, loke ta marga, dushi, y loke ta dushi, marga.” (Isaias 5:20) Hende cu ta biba den scuridad spiritual ta bou di influencia di e dios di scuridad, Satanas e Diabel, y como resultado nan ta biba aleha for di e fuente di lus y di bida.—Efesionan 4:17-19.

E Reto di Pasa di Scuridad pa Lus

9. Splica con scuridad ta atrae hacidonan di maldad, tanto literalmente como den sentido spiritual.

⁹ Job, un homber fiel, a hala atencion na e echo cu hacidonan di maldad ta gusta scuridad. El a bisa: “Wowo di e kibrado di matrimonio ta warda te ora cuminsa bira scur, y ta bisa: ‘Ningun wowo lo mira mi.’ Y e ta disfrasa su cara.” (Job 24:15) Hacidonan di maldad tambe ta den scuridad spiritual, y e scuridad ei por ta un forsa cu ta domina nan. Apostel Pablo a bisa cu inmoralidad sexual,  ladronicia, golosidad, buracheria, insulto y extorsion ta cos di tur dia pa hende cu ta den gara di scuridad. Pero ken cu bini na e lus di e Palabra di Dios por cambia. Den su carta pa e Corintionan, Pablo ta mustra cu un cambio asina ta posibel. Hopi di e Cristiannan di Corinto a yega di practica obranan di scuridad. Apesar di esei, Pablo a bisa nan: “Ma boso a wordo laba, ma boso a wordo santifica, ma boso a wordo hustifica den e nomber di Señor Hesucristo y den e spirito di nos Dios.”—1 Corintionan 6:9-11.

10, 11. (a) Con Hesus a mustra consideracion pa un homber cu el a duna bista? (b) Pakico hopi hende no ta scohe pa e lus?

¹⁰ Ora un hende sali for di scuridad diki, bai den lus, su wowonan tin mester di un tiki tempo pa nan adapta. Na Betsaida Hesus a cura un homber ciego. Pero bondadosamente el a hacie den fase. “El a cohe e ciego na su man y a hib’e pafo di e pueblito; y despues di a scupi riba su wowonan y di a pone su mannan riba dje, el a puntr’e: ‘Bo ta mira algo?’ Y e homber a hisa cara wak y a bisa: ‘Mi ta mira hende, pasobra mi ta mira nan manera palo ta cana rond.’ Djei el a bolbe pone su mannan riba wowo di e homber; y el a mira bon y a keda restaura, y tawata mira tur cos cla cla.” (Marco 8:23-25) Parce cu Hesus a restaura e homber su bista pocopoco pa e por a custumbra cu lus skerpi di solo. Nos por imagina nos cuanto goso e homber lo a sinti ora cu e por a mira.

¹¹ Sinembargo, e goso di hende cu ta haya yudansa pa sali, paso pa paso, for di scuridad spiritual, y drenta den e lus di e berdad ta asta mas grandi ainda. Ora nos mira cuanto goso nan tin, nos por puntra nos mes ta con bini mas tanto hende no ta sinti nan atrai na e lus. Hesus ta bisa nos dicon: “Esaki ta e condenacion, cu e lus a bin den mundo, y hende tawata stima e scuridad mas cu e lus; pasobra nan echonan tawata malo. Pasobra esun cu ta haci maldad ta odia e lus, y no ta bin na e lus, pa su echonan no wordo exponi.” (Juan 3:19, 20) Si, hopi hende ta gusta “haci maldad”, manera comete inmoralidad, oprimi hende, gaña, comete fraude y horta. Satanas su scuridad spiritual ta net bon pa nan haci manera nan ke.

Haci Progreso den e Lus

12. Den ki maneranan nos a beneficia door di bini den e lus?

¹² Ki cambionan nos a mira sosode den nos mes for di tempo cu nos a siña conoce e lus? Tin biaha ta bon pa nos wak atras y examina e progreso spiritual cu nos a haci. Ki mal habitonan nos a libra di dje? Ki problemanan den nos bida nos a resolve? Ki cambio nos a haci den nos plannan pa futuro? Cu Yehova su forsa, y cu yudansa di su spirito santo, nos por sigui haci cambio den nos personalidad y nos manera di pensa, pa asina nos mustra cu e lus ta produciendo un bon reaccion den nos. (Efesionan 4:23, 24) Pablo a expres’e asin’aki: ‘Antes boso tawata scuridad, ma awor boso ta lus den Señor; cana como yiunan di lus, pasobra e fruta di e lus ta consisti di tur bondad y husticia y berdad.’ (Efesionan 5:8, 9) Door di laga Yehova su lus guia nos, nos ta haya speransa y proposito. Ademas  esaki ta contribui na e goso di hende rond di nos tambe. Y esta un goso Yehova ta sinti ora e mira e cambionan cu nos ta haci!—Proverbionan 27:11.

13. Con nos por mustra gratitud pa Yehova su lus, y kico nos tin mester pa por hacie?

¹³ Door di refleha Yehova su lus, esta, door di comparti loke nos a siña for di Bijbel cu nos miembronan di famia, nos amigonan y nos biciñanan, nos ta mustra gratitud pa e bida mas felis cu nos ta disfruta di dje. (Mateo 5:12-16; 24:14) Nos predicacion y nos bida Cristian ehemplar ta sirbi pa reprende esnan cu no kier tende. Pablo ta splica: “Siña loke ta agradabel na Señor. Y no participa den e obranan infructifero di scuridad, sino mas bien expone nan.” (Efesionan 5:10, 11) Nos tin mester di curashi pa yuda hende bandona scuridad y scohe pa e lus. Asta mas importante ta cu nos tin mester di compasion y interes den hende, y un deseo sinsero di comparti e lus di e berdad cu nan, pa nan beneficio eterno.—Mateo 28:19, 20.

Tene Cuidou cu Lus Falso!

14. Papiando tocante lus, na ki spiertamento nos mester presta atencion ?

¹⁴ Ora hende ta den scuridad riba lama, nan ta keda contento cu cualkier lus cu nan mira. Antes hende tawata sende candela riba e barancanan di costa di Inglatera pa mustra barconan unda nan por a haya refugio ora di mal tempo. Tripulantenan di barco tawata gradicido cu e lusnan aki por a guia nan na haf pa siguridad. Pero algun di e candelanan ei tawata pa gaña nan. Hopi barco a cai den trampa, y na luga di haya un haf, nan tawata bai dal den baranca, y hende tawata horta nan cargamento. Den e mundo yen di mentira aki, nos mester paga tino pa no laga lus falso atrae nos y hiba nos na naufragio spiritual. Bijbel ta bisa nos cu “Satanas mes ta disfrasa su mes como un angel di lus.” Y su sirbidonan tambe, incluso hende apostata, ta “trahadonan engañoso” cu “tambe ta disfrasa nan mes como sirbidonan di husticia.” Si nos keda pensa riba nan rasonamento falso, nos confiansa den Bijbel—Yehova su Palabra di berdad—por bira suak, y nos fe por muri.—2 Corintionan 11:13-15; 1 Timoteo 1:19.

15. Kico lo yuda nos keda riba e “caminda cu ta hiba na bida”?

¹⁵ E salmista a skirbi: “Bo palabra ta un lampi pa mi pia y un lus pa mi caminda.” (Salmo  119:105) Si, e ‘caminda smal cu ta hiba na bida’ ta bon ilumina door di Yehova, nos Dios amoroso, “kende ta desea pa tur hende wordo salba y yega na conocemento di e berdad.” (Mateo 7:14; 1 Timoteo 2:4) Door di cumpli cu mandamentonan di Bijbel nos lo evita di dual for di riba e caminda smal ei, y cohe e rumbo di maldad. Pablo a skirbi: “Tur scritura ta inspira pa Dios y ta util pa siñansa, pa reprendemento, pa coreccion, pa educa den husticia.” (2 Timoteo 3:16) Segun cu nos ta crece spiritualmente, e Palabra di Dios ta instrui nos. Cu e lus di e Palabra di Dios nos por reprende nos mes of, si ta necesario, nos lo por ricibi reprendemento cerca wardadonan amoroso den e congregacion. Mescos nos por acepta ‘disiplina den husticia’ (NW) humildemente, pa evita di dual for di riba e caminda cu ta hiba na bida.

Cana cu Aprecio den e Lus

16. Con nos por mustra nos gratitud pa e lus cu Yehova a duna nos como un percuracion maravioso?

¹⁶ Con nos por mustra nos gratitud pa e percuracion maravioso aki di Yehova, esta, lus? Juan capitulo 9 ta bisa nos cu ora Hesus a cura un homber cu a nace ciego, e homber a sintie motiva pa expresa su aprecio. Con? El a pone fe den Hesus como e Yiu di Dios, y a identific’e publicamente como “un profeta.” Ademas, el a papia cu curashi contra esnan cu a purba minimisa e importancia di e milager di Hesus. (Juan 9:17, 30-34) Apostel Pedro ta yama e miembronan ungi di e congregacion Cristian “un pueblo peculiar [pa posesion special, NW].” Dicon? Debi cu nan ta gradicido mescos cu e homber cu a nace ciego y a ser cura. Nan ta mustra aprecio pa Yehova como nan Benefactor, door di ‘proclama e alabansanan di esun cu a yama nan for di scuridad na su lus maravioso.’ (1 Pedro 2:9; Colosencenan 1:13) Cristiannan cu un speransa terenal tambe ta mustra gratitud, y nan ta apoya nan rumannan ungi den declara Yehova su “alabansanan” publicamente. Esta un privilegio sin igual Dios a duna hende imperfecto!

17, 18. (a) Ki responsabilidad cada un di nos tin individualmente? (b) Mescos cu Timoteo, kico tur Cristian ta ser anima pa evita?

¹⁷ Ta esencial pa nos tin aprecio sinsero pa e lus di e berdad. Corda cu nos ningun no ta nace conociendo e berdad. Algun di nos ta siña conoc’e ora nos ta adulto caba, y mesora nos ta mira e superioridad di lus riba scuridad. Otronan tin e gran privilegio di ser cria door di mayornan cu ta teme Dios. Por ta facil pa nan perde e balor di lus for di bista. Un Testigo kende su mayornan tawata sirbi Yehova for di prome cu el a nace, ta admiti cu a tum’e basta tempo y esfuerso pa capta e nificacion y importancia completo di e berdad cu el a siña for di infancia. Sea cu nos ta hoben of bieu, nos tur mester cultiva aprecio profundo pa e berdad cu Yehova a revela na nos.

¹⁸ E hoben Timoteo a siña “e scrituranan santo” for di su infancia. (2 Timoteo 3:15) Pero e mester a haci esfuerso den e ministerio Cristian pa e por a bira un Cristian maduro. E ora ei e tawata den posicion di yuda apostel Pablo, kende a anim’e: “Haci tur bo esfuerso pa presenta bo mes aproba dilanti di Dios manera un trahado cu no tin motibo pa tin berguensa, cu ta parti e palabra di berdad na  un manera corecto.” Mescos cu Timoteo, laga nos tur evita di haci cualkier cos cu por duna nos berguensa, of duna Yehova berguensa di nos!—2 Timoteo 2:15.

19. (a) Mescos cu David, kico nos tur tin motibo pa bisa? (b) Kico nos lo trata den e siguiente articulo?

¹⁹ Nos tin tur motibo pa alaba Yehova, cu a duna nos e lus di su berdad. Nos ta bisa mescos cu Rei David: “Bo ta mi lampi, o SEÑOR; y SEÑOR ta ilumina mi scuridad.” (2 Samuel 22:29) Y sinembargo, nos lo no risca di bira satisfecho cu nos mes y baha nos vigilancia, pasobra nos lo por drif bai bek den e scuridad cu nos a scapa for di dje. Pesei, e siguiente articulo lo yuda nos examina cuanto importancia nos ta duna e berdad di Dios den nos bida.

Kico Bo A Siña?

• Con Yehova ta percura iluminacion spiritual?

• Den ki sentido e scuridad spiritual cu ta rondona nos ta un reto?

• Ki peligernan nos mester evita?

• Con nos por mustra nos gratitud pa e lus di e berdad?

[Preguntanan di Estudio]

[Plachi na pagina 8]

Yehova ta e fuente di lus literal y spiritual

[Plachi na pagina 10]

Mescos cu Hesus a cura un homber ciego pocopoco, asina e ta yuda nos tambe sali for di scuridad spiritual

[Plachi na pagina 11]

Si Satanas su lusnan falso haci nos dual, nan lo hiba nos na naufragio spiritual